Aṅguttara Nikāya
Pañcaka Nipāta
13. Gilāna Vaggo

Sutta 121

Gilāna Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[142]

[1][pts][than] Evaṁ me sutaṁ:|| ||

Ekaṁ samayaṁ Bhagavā Vesāliyaṁ viharati Mahāvane Kuṭāgārasālāyaṁ.|| ||

Atha kho Bhagavā sāyaṇha-samayaṁ patisallānā vuṭṭhito yena gilānasālā ten'upasaṅkami.|| ||

Addasā kho Bhagavā aññataraṁ bhikkhuṁ dubbalaṁ gilānakaṁ.|| ||

Disvā paññatena āsane nisidi.|| ||

Nisajja kho Bhagavā bhikkhu āmantesi:|| ||

Yaṁ kañci bhikkhave dubbalraṁ gilānakaṁ pañca dhammā na vijahanti,||
tass'etaṁ pāṭikaṅkhaṁ:||
na cirass'eva āsavānaṁ khayā anāsavaṁ ceto-vimuttiṁ paññā-vimuttiṁ diṭṭhe'va dhamme sayaṁ abhiññā sacchi-katvā upasampajja viharissatī ti.|| ||

Katamehi pañca?|| ||

Idha, bhikkhave, bhikkhu asubhānupassī kāye viharati,||
āhāre paṭikkula-saññī,||
sabba-loke anabhirata-saññī,||
sabba- [143] saṅkhāresu anicc'ānupassī,||
maraṇa-saññā kho panassa ajjhattaṁ s'upaṭṭhitā hoti.|| ||

Yaṁ kañci bhikkhave dubbalaṁ gilānakāṁ ime pañca dhammā na vijahanti,||
tass'etaṁ pāṭikaṅkhaṁ:||
na cirass'eva āsavānaṁ khayā anāsavaṁ ceto-vimuttiṁ paññā-vimuttiṁ diṭṭhe'va dhamme sayaṁ abhiññā sacchi-katvā upasampajja viharissatī ti.|| ||