Dūpaṭṭhāka-Gilāna Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Pañcahi bhikkhave dhammehi samannāgato gilāno dūpaṭṭhāko hoti.|| ||

Katamehi pañcahi?|| ||

Asappāya-kāri hoti.

■

Sappāye mattaṁ na jānāti.|| ||

■

Bhesajjaṁ na paṭisevitā hoti.|| ||

■

Atthakāmassa gilānūpaṭṭhākassa na yathā-bhūtaṁ ābādhaṁ āvīkattā hoti:|| ||

"Abhi-k-kamantaṁ vā abhi-k-kamatī" ti.|| ||

"Paṭikkamantaṁ vā paṭikkamatī" ti.|| ||

"Ṭhitaṁ vā ṭhito" ti.|| ||

■

Uppannānaṁ vā sāririkānaṁ vedanānaṁ dukkhānaṁ tippānaṁ kharānaṁ kaṭukānaṁ asātānaṁ amanāpānaṁ pāṇaharānaṁ anadhivāsaka-jātiko hoti.|| ||

[144] Imehi kho bhikkhave pañcahi dhammehi samannāgato gilāno dūpaṭṭhāko hoti.|| ||

Pañcahi bhikkhave dhammehi samannāgato gilāno sūpaṭṭhāko hoti.|| ||

Katamehi pañcahi?|| ||

Sappāya-kāri hoti.|| ||

■

Sappāye mattaṁ jānāti.|| ||

■

Bhesajjaṁ paṭisevitā hoti;|| ||

■

Atthakāmassa gilānūpaṭṭhākassa yathā-bhūtaṁ ābādhaṁ āvīkattā hoti:|| ||

"Abhi-k-kamantaṁ vā abhi-k-kamatī" ti.|| ||

"Paṭikkamantaṁ vā paṭikkamatī" ti.|| ||

"Ṭhitaṁ vā ṭhito" ti.|| ||

■

Uppannānaṁ vā sāririkānaṁ vedanānaṁ dukkhānaṁ tippānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsaka-jātiko hoti.|| ||

Imehi kho bhikkhave pañcahi dhammehi samannāgato gilāno sūpaṭṭhāko hotī ti.|| ||