Aṅguttara Nikāya
Pañcaka Nipāta
14. Rāja Vaggo

Sutta 131

Paṭhama Cakkānuvattana Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[147]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Pañcahi bhikkhave aṅgehi samannāgato rājā cakka-vatti dhammen'eva cakkaṁ pavatteti,||
taṁ hoti cakkaṁ [148] appati-vattiyaṁ kenaci manussa-bhūtena pacc'atthi-kena pāṇinā.|| ||

Katamehi pañcahi?|| ||

3. Idha, bhikkhave, rājā cakka-vatti atth'aññū ca hoti,||
Dhamm'aññū ca,||
matt'aññū ca,||
kāl'aññū ca,||
paris'aññū ca.|| ||

Imehi kho pañcahi aṅgehi samannāgato rājā cakka-vatti dhammen'eva cakkaṁ vatteti,||
taṁ hoti cakkaṁ appati-vattiyaṁ kenaci manussa-bhutena pacc'atthi-kena pāṇinā.|| ||

 

§

 

4. Evam eva kho bhikkhave pañcahi dhammehi samannāgato Tathāgato arahaṁ Sammā Sambuddho dhammen'eva anuttaraṁ Dhamma-cakkaṁ pavatteti,||
taṁ hoti cakkaṁ appati-vattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmiṁ.|| ||

Katamehi pañcahi?|| ||

Idha, bhikkhave, Tathāgato arahaṁ Sammā Sambuddho atth'aññū,||
Dhamm'aññū,||
matt'aññū,||
kāl'aññū,||
paris'aññū.|| ||

Imehi kho bhikkhave pañcahi dhammehi samannāgato Tathāgato arahaṁ Sammā Sambuddho Dhammen'eva anuttaraṁ Dhamma-cakkaṁ pavatteti,||
taṁ hoti cakkaṁ appati-vattiyaṁ samaṇena vā brāhmaṇena vā devena vā mārena vā brahmunā vā kenaci vā lokasmin" ti.|| ||