Aṅguttara Nikāya
Pañcaka Nipāta
14. Rāja Vaggo

Sutta 136

Dutiya Patthanā Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

 

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Pañcahi bhikkhave, aṅgehi samannāgato rañño khattiyassa muddhā-vasittassa jeṭṭho putto oparajjaṁ pattheti.|| ||

Katamehi pañcahi?|| ||

Idha, bhikkhave, rañño khattiyassa muddhā-vasittassa jeṭṭho putto ubhato sujāto hoti mātito ca pitito ca,||
saṁsuddha gahaṇiko,||
yāva sattamā pitā-mah'ayugā.|| ||

■

Akkhitto anupakkuṭṭho jāti-vādena.|| ||

■

Abhirūpo hoti dassaniyo pāsādiko paramāya vaṇṇa-pokkha-ratāya samannāgato mātā-pitunnaṁ piyo hoti manāpo.|| ||

■

Balakāyassa piyo hoti manāpo.|| ||

■

Paṇḍito hoti viyatto medhāvi paṭibalo atitānāgatapacc'uppanno atthe cintetuṁ.|| ||

 

§

 

Tassa evaṁ hoti:|| ||

'Ahaṁ kho'mhi ubhato sujāto mātito ca pitito ca, saṁsuddhagahaṇiko,||
yāva sattamā pitā-mah'ayugā akkhitto anupakkuṭṭho jāti-vādena.|| ||

Kasmāhaṁ oparajjaṁ na pattheyyaṁ?|| ||

■

Ahaṁ kho'mhi abhirūpo dassaniyo pāsādiko paramāya vaṇaṇapokkharatāya samannāgato.|| ||

Kasamāhaṁ oparajjaṁ na pattheyyaṁ?|| ||

■

Ahaṁ kho'mhi mātā-pitunnaṁ piyo manāpo.|| ||

Kasamāhaṁ oparajjaṁ na pattheyyaṁ?|| ||

■

[155] Ahaṁ kho'mhi balakāyassa piyo manāpo.|| ||

Kasmāhaṁ oparajjaṁ na pattheyyaṁ?|| ||

■

Ahaṁ kho'mhi paṇḍito viyatto medhāvi paṭibalo atitānāgatapacc'uppanne atthe cintetuṁ.|| ||

Kasmāhaṁ oparajjaṁ na pattheyyan ti?|| ||

Imehi kho bhikkhave pañcahi aṅgehi samannāgato rañño khattiyassa muddhā-vasittassa jeṭṭho putto oparajjaṁ pattheti.|| ||

 

---

 

Evam eva kho bhikkhave pañcahi dhammehi samannāgato bhikkhu āsavānaṁ khayaṁ pattheti.|| ||

Katamehi pañcahi?|| ||

Idha, bhikkhave, bhikkhu sīlavā hoti Pātimokkha-saṁvara-saṁvuto viharati ācāra-gocara-sampanno,||
aṇumattesu vajjesu bhaya-dassāvi samādāya sikkhati sikkhā-padesu.

■

Bahu-s-suto hoti suta-dharo suta-sannicayo.|| ||

■

Ye te dhammā ādi-kalyāṇā majjhakalyāṇā dhatā vacasā paricitā manusānupekkhitā diṭṭhiyā suppaṭi-viddhā,||
catusu sati paṭṭhānesu s'ūpatthika-citto hoti.|| ||

■

Āraddha-viriyo viharati akusalānaṁ dhammānaṁ pahānāya,||
kusalānaṁ dhammānaṁ upasampadāya,||
thāmavā daḷahaparakkamo anikkhitta-dhuro kusalesu dhammesu.|| ||

■

Paññavā hoti uday'attha-gāminiyā paññāya samannāgato ariyāya nibbedhi-kāya sammā dukkha-k-khaya-gāminiyā.|| ||

 

§

 

Tassa evaṁ hoti:|| ||

Ahaṁ kho'mhi sīlavā Pātimokkha-saṁvara saṁvuto viharāmi,||
ācāra-gocara-sampanno aṇumattesu vajjesu bhaya-dassāvi samādāya sikkhāmi sikkhā-padesu.|| ||

Kasmāhaṁ āsavānaṁ khayaṁ na pattheyyaṁ?|| ||

■

Ahaṁ kho'mhi bahu-s-suto suta-dharo suta-sannicayo 'ye te dhammā ādi-kalyāṇā,||
majjhe-kalyāṇā pariyosāna-kalyāṇā sātthā savyañjanā.|| ||

Kevala-paripuṇaṇaṁ parisuddhaṁ Brahma-cariyaṁ abhivadanti,||
tathā-rūpā me dhammā bahu-s-sutā honti.|| ||

Dhatā ca vacasā paricitā manas-ā-nupekkhitā diṭṭhiyā suppaṭi-viddhā.|| ||

Kasmāhaṁ āsavānaṁ khayaṁ na pattheyyaṁ?|| ||

■

Ahaṁ kho'mhi catusu sati-paṭṭhānesu supatthika-citto.|| ||

Kasmāhaṁ āsavānaṁ khayaṁ na pattheyyaṁ?|| ||

■

Ahaṁ kho'mhi āraddha-viriyo viharāmi akusalānaṁ dhammānaṁ pahānāya,||
kusalānaṁ dhammānaṁ upasampadāya,||
thāmavā daḷha-parakkamo anikkhitta-dhuro kusalesu dhammesu.|| ||

Kasmāhaṁ āsavānaṁ khayaṁ na pattheyyaṁ?|| ||

■

Ahaṁ kho'mhi paññavā uday'attha-gāminiyā paññāya samannāgato ariyāya nibbedhi-kāya [156] sammā dukkha-k-khaya-gāminiyā.|| ||

Kasmāhaṁ āsavānaṁ khayaṁ na pattheyyanti?|| ||

Imehi kho bhikkhave pañcahi dhammehi samannāgato bhikkhu āsavānaṁ khayaṁ patthetī' ti.|| ||