Aṅguttara Nikāya
Pañcaka Nipāta
15. Tikaṇḍaki Vaggo

Sutta 148

Sappurisa-Dāna Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[172]

[1][pts][than][olds] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Pañc'imāni bhikkhave sappurisa-dānāni.|| ||

Katamāni pañca?|| ||

Saddhāya dānaṁ deti,||
sakkaccaṁ dānaṁ deti,||
kālena dānaṁ deti,||
anaggahita-citto dānaṁ deti,||
attāṇaṁ ca paraṁ ca anupabhacca dānaṁ deti.|| ||

■

Saddhāya kho pana bhikkhave dānaṁ datvā yattha yattha tassa dānassa vipāko nibbattati,||
aḍḍho ca hoti maha-d-dhano mahā-bhogo.|| ||

Abhirūpo ca hoti dassanīyo pāsādiko paramāya vaṇṇa-pokkha-ratāya samannāgato.|| ||

■

Sakkaccaṁ kho pana bhikkhave dānaṁ datvā yattha yattha tassa dānassa vipāko nibbattati,||
aḍḍho ca hoti maha-d-dhano mahā-bhogo.|| ||

Yepissa te honti puttāti vā dārāti vā dāsāti vā pessāti vā kamma-karāti vā,||
tepi sussūsanti,||
sotaṁ odahanti,||
aññā-cittaṁ upaṭṭhapenti.|| ||

■

Kālena kho pana bhikkhave dānaṁ datvā yattha yattha tassa dānassa vipāko nibbattati,||
aḍḍho ca hoti maha-d-dhano mahā-bhogo.|| ||

Kālāgatā c'assa atthā pacurā honti.|| ||

■

Anaggahita-citto khopana bhikkhave dānaṁ datvā yattha yattha tassa dānassa vipāko nibbattati,||
aḍḍho ca hoti maha-d-dhano mahā-bhogo.|| ||

Uḷāresu ca pañcasu kāma-guṇesu bhogāya cittaṁ namati.|| ||

■

[173] Attānañ ca parañ ca anupahac ca kho pana bhikkhave dānaṁ datvā yattha yattha tassa dānassa vipāko nibbattati,||
aḍḍho ca hoti maha-d-dhano mahā-bhogo.|| ||

Na c'assa kuto ci bhogānaṁ upaghāto āgacchati aggito vā udakato vā rājato vā corato vā appiyadāyādato vā.|| ||

Imāni kho bhikkhave pañca sappurisa-dānānī" ti.|| ||