Aṅguttara Nikāya
Pañcaka Nipāta
16. Sad'Dhamma Vaggo

Sutta 154

Paṭhama Sad'Dhamma-Sammosa Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[176]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Pañc'ime bhikkhave, dhammā Sad'Dhammassa sammosāya antara-dānāya saṁvaṭṭanti.|| ||

Katame pañca?|| ||

Idha, bhikkhave, bhikkhu na sakkaccaṁ dhammaṁ suṇanti;||
na sakkaccaṁ dhammaṁ pariyāpuṇanti;||
na sakkaccaṁ dhammaṁ dhārenti;||
na sakkaccaṁ dhatānaṁ dhammānaṁ atthaṁ upparikkhanti;||
na sakkaccaṁ attham aññāya dhammam||
aññāya Dhammānudhammaṁ paṭipajjanti.|| ||

Ime kho bhikkhave, pañca dhammā Sad'Dhammassa sammosāya antara-dhānāya saṁvaṭṭanti.|| ||

 

§

 

Pañc'ime bhikkhave, dhammā Sad'Dhammassa ṭhitiyā asammosāya anantara-dhānāya saṁvaṭṭanti.|| ||

Katame pañca?|| ||

Idha, bhikkhave, bhikkhu sakkaccaṁ dhammaṁ suṇanti;||
sakkaccaṁ dhammaṁ pariyāpuṇanti;||
sakkaccaṁ dhammaṁ dhārenti;||
sakkaccaṁ dhatānaṁ dhammānaṁ atthaṁ upapari-k-khanti;||
sakkaccaṁ attham aññāya dhammam aññāya Dhammānudhammaṁ paṭipajjanti.|| ||

[177] Ime kho bhikkhave pañca dhammā Sad'Dhammassa ṭhitiyā asammosāya anantara-dhānāya saṁvaṭṭantī" ti.|| ||