Dutiya Sad'Dhamma-Sammosa Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Pañc'ime bhikkhave dhammā Sad'Dhammassa sammosāya antara-dhānya saṁvaṭṭanti.|| ||

Katame pañca?|| ||

Idha, bhikkhave, bhikkhu dhammaṁ na pariyāpuṇnti suttaṁ geyyaṁ veyyākaraṇaṁ gāthaṁ udānaṁ iti-vuttakaṁ jātakaṁ abbhuta-dhammaṁ vedallaṁ.|| ||

Ayaṁ bhikkhave, paṭhamo dhammo Sad'Dhammassa sammosāya antara-dhānya saṁvaṭṭati.|| ||

■

Puna ca paraṁ bhikkhave, bhikkhu yathā-sutaṁ yathā-pariyattaṁ dhammaṁ na vitthārena paresaṁ desenti.|| ||

Ayaṁ bhikkhave, dutiyo dhammo Sad'Dhammassa sammosāya antara-dhānya saṁvaṭṭati.|| ||

■

Puna ca paraṁ bhikkhave, bhikkhu yathā-sutaṁ yathā-pariyattaṁ dhammaṁ na vitthārena paresaṁ vācenti.|| ||

Ayaṁ bhikkhave, tatiyo dhammo Sad'Dhammassa sammosāya antara-dhānya saṁvaṭṭati.|| ||

■

Puna ca paraṁ bhikkhave, bhikkhu yathā-sutaṁ yathā-pariyattaṁ dhammaṁ na vitthārena sajjhāyaṁ karonti.|| ||

Ayaṁ bhikkhave, catuttho dhammo Sad'Dhammassa sammosāya antara-dhānya saṁvaṭṭati.|| ||

■

Puna ca paraṁ bhikkhave, bhikkhu yathā-sutaṁ yathā-pariyattaṁ dhammaṁ na cetasā anuvitakkenti, anuvicārenti, manas-ā-nupekkhanti.|| ||

Ayaṁ bhikkhave, pañcamo dhammo Sad'Dhammassa sammosāya antara-dhānya saṁvaṭṭati.|| ||

Ime kho bhikkhave, pañca dhammā Sad'Dhammassa sammosāya antara-dhānya saṁvaṭṭanti.|| ||

Pañc'ime bhikakhave, dhammā Sad'Dhammassa ṭhitiyā asammosāya anantara-dhānya saṁvaṭṭanti.|| ||

Katame pañca?|| ||

Idha, bhikkhave, bhikkhu dhammaṁ pariyāpuṇnti suttaṁ geyyaṁ veyyākaraṇaṁ gāthaṁ udānaṁ iti-vuttakaṁ jātakaṁ abbhuta-dhammaṁ vedallaṁ.|| ||

Ayaṁ bhikkhave, [178] paṭhamo dhammo Sad'Dhammassa ṭhitiyā asammosāya anantara-dhānya saṁvaṭṭati.|| ||

■

Puna ca paraṁ bhikkhave, bhikkhu yathā-sutaṁ yathā-pariyattaṁ dhammaṁ vitthārena paresaṁ desenti.|| ||

Ayaṁ bhikkhave, dutiyo dhammo Sad'Dhammassa ṭhitiyā asammosāya anantara-dhānya saṁvaṭṭati.|| ||

■

Puna ca paraṁ bhikkhave, bhikkhu yathā-sutaṁ yathā-pariyattaṁ dhammaṁ vitthārena paresaṁ vācenti.|| ||

Ayaṁ bhikkhave, tatiyo dhammo Sad'Dhammassa ṭhitiyā asammosāya anantara-dhānya saṁvaṭṭati.|| ||

■

Puna ca paraṁ bhikkhave, bhikkhu yathā-sutaṁ yathā-pariyattaṁ dhammaṁ vitthārena sajjhāyaṁ karonti.|| ||

Ayaṁ bhikkhave, catuttho dhammo Sad'Dhammassa ṭhitiyā asammosāya anantara-dhānya saṁvaṭṭati.|| ||

■

Puna ca paraṁ bhikkhave, bhikkhu yathā-sutaṁ yathā-pariyattaṁ dhammaṁ cetasā anuvitakkenti anuvicārenti manas-ā-nupekkhanti.|| ||

Ayaṁ bhikkhave, pañcamo dhammo Sad'Dhammassa ṭhitiyā asammosāya anantara-dhānya saṁvaṭṭati.|| ||

Ime kho bhikkhave, pañca dhammā Sad'Dhammassa ṭhitiyā asammosāya anantara-dhānya saṁvaṭṭantī" ti.|| ||