Udāyī Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series

[1][pts][than] Evaṁ me sutaṁ:|| ||

Ekaṁ samayaṁ Bhagavā Kosambīyaṁ viharati Ghositārāme.|| ||

Tena kho pana samayen'āyasmā Udāyī mahatiyā gihīparisāya parivuto dhammaṁ desento nisinno hoti.|| ||

Addasā kho āyasmā Ānando āyasmantaṁ Udāyiṁ mahatiyā gihīparisāya parivutaṁ dhammaṁ desentaṁ nisinnaṁ.|| ||

Disvāna yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisidi.|| ||

Eka-m-antaṁ nisinno kho ayasmā Ānando Bhagavantaṁ etad avoca:|| ||

'Āyasmā bhante Udāyī mahatiyā gihīparisāya parivuto dhammaṁ desetī' ti.|| ||

Na kho Ānanda sukaraṁ paresaṁ dhammaṁ desetuṁ.|| ||

Paresaṁ Ānanda dhammaṁ desentena pañca dhamme ajjhattaṁ upaṭṭha-petvā paresaṁ dhammo desetabbo.|| ||

Katame pañca?|| ||

2. Ānupubbi-kathaṁ kathessāmī ti paresaṁ dhammo desetabbo.|| ||

Pariyāya-dassāvī kathaṁ kathessāmī ti paresaṁ dhammo desetabbā.|| ||

Anuddayataṁ paṭicca kathaṁ kathessāmī ti paresaṁ dhammo desetabbo.|| ||

Na āmisantaro kathaṁ kathessāmī ti paresaṁ dhammo desetabbo.|| ||

Attānaṁ ca paraṁ ca anupahacca kathaṁ kathessāmī ti paresaṁ dhammo desetabbo.|| ||

Na kho Ānanda sukaraṁ paresaṁ dhammaṁ desetuṁ.|| ||

Paresaṁ Ānanda dhammaṁ desentena ime pañca dhamme ajjhattaṁ upaṭṭha-petvā paresaṁ dhammo desetabbo ti.|| ||