Aṅguttara Nikāya
Pañcaka-Nipāta
XVIII. Upāsaka Vaggo

Sutta 176

Pīti Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[206]

[1][than][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho Anāthapiṇḍiko gahapati pañca-mattehi upāsaka-satehi parivuto yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisidi.||
Eka-m-antaṁ nisinnaṁ kho Anāthapiṇḍikaṁ gahapatiṁ Bhagavā etad avoca:|| ||

2. Tumhe pi kho gahapati,
bhikkhu-saṅghaṁ pacc'upaṭṭhitā cīvara-piṇḍa-pāta-senā-sanagilāna-paccay-abhesajja-parikkhārena.|| ||

Na kho gahapati,
tāvataken'eva tuṭṭhi karaṇiyā:|| ||

'Mayaṁ bhikkhu-saṅghaṁ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārenā' ti.|| ||

Tasmātiha gahapati,
evaṁ sikkhitabbaṁ:|| ||

[207]3."Kinti mayaṁ kālena kālaṁ pavivekaṁ pītiṁ upasampajja vihareyyāmā" ti.|| ||

Evaṁ hi vo gahapati sikkhitabban ti.|| ||

 

§

 

4. Evaṁ vutte āyasmā Sāriputto Bhagavantaṁ etad avoca:|| ||

Acchariyaṁ bhante!|| ||

Abbhutaṁ bhante!|| ||

Yāva su-bhāsitatañ c'idaṁ bhante, Bhagavatā:-|| ||

"Tumhe kho gahapati,
bhikkhu-saṅghaṁ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārena.|| ||

Na kho gahapati tāvataken'eva tuṭṭhi karaṇiyā:|| ||

'Mayaṁ bhikkhu-saṅghaṁ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārenā' ti.|| ||

Tasmātiha gahapati,
evaṁ sikkhitabbaṁ:|| ||

"Kinti mayaṁ kālena kālaṁ pavivekaṁ pītiṁ upasampajja vihareyyāmā' ti.|| ||

Evaṁ hi vo gahapati,
sikkhitabban' ti.|| ||

■

Yasmiṁ bhante,
samaye ariya-sāvako pavivekaṁ pītiṁ upasampajja viharati.|| ||

Pañc'assa ṭhānāni tasmiṁ samaye na honti:|| ||

Yam pi'ssa kām'ūpasaṁhitaṁ dukkhaṁ domanassaṁ,
tam pi'ssa tasmiṁ samaye na hoti.|| ||

■

Yam pi'ssa kām'ūpasaṁhitaṁ sukhaṁ somanassaṁ,
tam pi'ssa tasmiṁ samaye na hoti.|| ||

■

Yam pi'ssa akusalupasaṁhitaṁ dukkhaṁ domanassaṁ,
tam pi'ssa tasmiṁ samaye na hoti.|| ||

■

Yam pi'ssa akusal'ūpasaṁhitaṁ sukhaṁ somanassaṁ,
tam pi'ssa tasmiṁ samaye na hoti.|| ||

■

Yam pi'ssa kusal'ūpasaṁhitaṁ dukkhaṁ domanassaṁ,
tam pi'ssa tasmiṁ samaye na hoti.|| ||

Yasmiṁ bhante,
samaye ariya-sāvako pavivekaṁ pītiṁ upasampajja viharati.
Imāni'ssa pañca ṭhānāni tasmiṁ samaye na hontī ti.|| ||

 

§

 

Sādhu! Sādhu! Sāriputta.|| ||

Yasmiṁ Sāriputta, samaye [208] ariya-sāvako pavivekaṁ pītiṁ upasampajja viharati,
pañc'assa ṭhānāni tasmiṁ samaye na honti:|| ||

Yam pi'ssa kām'ūpasaṁhitaṁ dukkhaṁ domansasaṁ,
tam pi'ssa tasmim samaye na hoti.|| ||

■

Yam pi'ssa kām'ūpasaṁhitaṁ sukhaṁ somanassaṁ,
tam pi'ssa tasmiṁ samaye na hoti.|| ||

■

Yam pi'ssa akusal'ūpasaṁhitaṁ dukkhaṁ domanassaṁ,
tam pi'ssa tasmiṁ samaye na hoti.|| ||

■

Yam pi'ssa akusal'ūpasaṁhitaṁ sukhaṁ somanassaṁ,
tam pi'ssa tasmiṁ samaye na hoti.|| ||

■

Yam pi'ssa kusal'ūpasaṁhitaṁ dukkhaṁ domanassaṁ,
tam pi'ssa tasmiṁ samaye na hoti.|| ||

Yasmiṁ Sāriputta samaye ariya-sāvako pavivekaṁ pītiṁ upasampajja viharati,
imāni'ssa pañca ṭhānāni tasmiṁ samaye na hontī ti.|| ||