Aṅguttara Nikāya
Pañcaka-Nipāta
XIX. Arañña Vaggo

Sutta 182

Paṁsu-Kūlika Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[219]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañc'ime bhikkhave paṁsukulikā.|| ||

Katame pañca?|| ||

Mandattā momūhattā paṁsu-kūlikā hoti.|| ||

Pāpiccho icchā-pakato paṁsu-kūlikā hoti.|| ||

Ummādā cittakkhepā paṁsu-kūlikā hoti.|| ||

Vaṇaṇitaṁ buddhehi Buddha-sāvakehiti paṁsu-kūlikā hoti.|| ||

Appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya paṁsu-kūlikā.|| ||

Ime kho bhikkhave pañca paṁsu-kūlikā.|| ||

3. Imesaṁ kho bhikkhave pañcannaṁ paṁsu-kūlikānaṁ yvāyaṁ paṁsu-kūliko appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya paṁsu-kūliko hoti,||
ayaṁ imesaṁ pañcannaṁ paṁsu-kūlikānaṁ aggo ca||
seṭṭho ca||
mokkho ca||
uttamo ca||
pavaro ca.|| ||

 

§

 

Seyyathā pi, bhikkhave, gavā khīraṁ,||
khīramhā dadhi,||
dadhimhā navanītaṁ,||
navanitamhā sappi,||
sappimhā sappi-maṇḍo tattha aggam akkhāyati;|| ||

evam eva kho bhikkhave imesaṁ pañcannaṁ paṁsu-kūlikānaṁ yvāyaṁ paṁsu-kūliko appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya paṁsu-kūliko hoti,||
ayaṁ imesaṁ pañcannaṁ paṁsu-kūlikānaṁ aggo ca||
seṭṭho ca||
mokkho ca||
uttamo ca||
pavaro cā" ti.|| ||