Aṅguttara Nikāya
Pañcaka-Nipāta
XIX. Arañña Vaggo
Sutta 183
Rukkha-Mūlika Suttaṁ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṁ samayaṁ Bhagavā Sāvatthiyaṁ viharati.|| ||
Tatra kho Bhagavā bhikkhu āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṁ.|| ||
Bhagavā etad avoca:|| ||
Pañc'ime bhikkhave rukkha-mūlikā.|| ||
Katame pañca?|| ||
Mandattā momūhattā rukkha-mūliko hoti.|| ||
Pāpiccho icchā-pakato rukkha-mūliko hoti.|| ||
Ummādā cittakkhepā rukkha-mūliko hoti.|| ||
Vaṇṇitaṁ buddhehi Buddha-sāvakehiti rukkha-mūliko hoti.|| ||
Appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya rukkha-mūliko hoti.|| ||
Ime kho bhikkhave pañca rukkha-mūlikā.|| ||
§
Imesaṁ kho bhikkhave pañcannaṁ rukkha-mūlikānaṁ yvāyaṁ rukkha-mūliko appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya,||
rukkha-mūliko hoti,||
ayaṁ imesaṁ pañcannaṁ,||
rukkha-mūlikānaṁ aggo ca||
seṭṭho ca||
mokkho ca||
uttamo ca||
pavaro ca.|| ||
■
Seyyathā pi, bhikkhave, gavā khīraṁ,||
khīramhā dadhi,||
dadhimhā navanītaṁ,||
navanitamhā sappi,||
sappimhā sappi-maṇḍo tattha aggam akkhāyati,||
evam eva kho, bhikkhave,||
imesaṁ pañcannaṁ rukkha-mūlikānaṁ yvāyaṁ rukkha-mūliko appicchataṁ yeva nissāya,||
santuṭṭhiṁ yeva nissāya||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya rukkha-mūliko hoti,||
ayaṁ imesaṁ pañcannaṁ rukkha-mūlikānaṁ aggo ca||
seṭṭho ca||
mokkho ca||
uttamo ca||
pavaro cā" ti.|| ||