Aṅguttara Nikāya
Pañcaka-Nipāta
XIX. Arañña Vaggo

Sutta 183a

Piṇḍa-Pātika Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[219]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañc'ime bhikkhave piṇḍa-pātikā.|| ||

Katame pañca?|| ||

Mandattā momūhattā piṇḍa-pātiko hoti.|| ||

Pāpiccho icchā-pakato piṇḍa-pātiko hoti.|| ||

Ummādā cittakkhepā piṇḍa-pātiko hoti.|| ||

Vaṇṇitaṁ buddhehi Buddha-sāvakehiti piṇḍa-pātiko hoti.|| ||

Appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya piṇḍa-pātiko hoti.|| ||

Ime kho bhikkhave pañca piṇḍa-pātikā.|| ||

 

§

 

3. Imesaṁ kho bhikkhave pañcannaṁ piṇḍa-pātikānaṁ yvāyaṁ piṇḍa-pātiko appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya piṇḍa-pātiko hoti,||
ayaṁ imesaṁ pañcannaṁ, piṇḍa-pātikānaṁ aggo ca||
seṭṭho ca||
mokkho ca||
uttamo ca||
pavaro ca.|| ||

■

Seyyathā pi, bhikkhave, gavā khīraṁ,||
khīramhā dadhi,||
dadhimhā navanītaṁ,||
navanitamhā sappi,||
sappimhā sappi-maṇḍo tattha aggam akkhāyati;|| ||

evam eva kho bhikkhave imesaṁ pañcannaṁ piṇḍa-pātikānaṁ yvāyaṁ piṇḍa-pātiko appicchataṁ yeva nissāya,||
santuṭṭhiṁ yeva nissāya sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya piṇḍa-pātiko hoti,||
ayaṁ imesaṁ pañcannaṁ piṇḍa-pātikānaṁ aggo ca||
seṭṭho ca||
mokkho ca||
uttamo ca||
pavaro cā" ti.|| ||