Aṅguttara Nikāya
Pañcaka-Nipāta
XIX. Arañña Vaggo

Sutta 188

Ekā-Sanika Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[220]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañc'ime bhikkhave ekā-sanikā.|| ||

Katame pañca?|| ||

Mandattā momūhattā ekā-saniko hoti.|| ||

Pāpiccho icchā-pakato ekasaniko hoti.|| ||

Ummādā cittakkhepā ekasaniko hoti.|| ||

Vaṇṇitaṁ buddhehi Buddha-sāvakehiti ekā-saniko hoti,||
appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya ekā-saniko hoti.|| ||

Ime kho bhikkhave pañca ekā-sanikā.|| ||

 

§

 

Imesaṁ kho bhikkhave pañcannaṁ ekā-sanikānaṁ yvāyaṁ ekā-saniko appicchataṁ yeva nissāya,||
santuṭṭhiṁ yeva nissāya,||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya ekā-saniko hoti,||
ayaṁ imesaṁ pañcannaṁ ekā-sanikānaṁ aggo ca||
seṭṭho ca||
mokkho ca||
uttamo ca||
pavaro ca.|| ||

■

Seyyathā pi, bhikkhave, gavā khīraṁ,||
khīramhā dadhi,||
dadhimhā navanītaṁ,||
navanitamhā sappi,||
sappimhā sappi-maṇḍo tattha aggam akkhāyati,||
evam eva kho, bhikkhave,||
imesaṁ pañcannaṁ ekā-sanikānaṁ yvāyaṁ ekā-saniko appicchataṁ yeva nissāya,||
santuṭṭhiṁ yeva nissāya||
sallekhaṁ yeva nissāya,||
pavivekaṁ yeva nissāya,||
idam atthikaṁ yeva nissāya ekā-saniko hoti,||
ayaṁ imesaṁ pañcannaṁ ekā-sanikānaṁ aggo ca||
seṭṭho ca||
mokkho ca||
uttamo ca||
pavaro cā" ti.|| ||