Vassantarāya Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañc'ime bhikkhave, vassassa antarāyā,||
yaṁ nemittā na jānanti,||
yattha nemittānaṁ cakkhuṁ na kamati.|| ||

Katame pañca?|| ||

2. Upari bhikkhave, ākāse tejo-dhātu pakuppati,||
tena uppannā meghā paṭivigacchanti.|| ||

Ayaṁ bhikkhave, paṭhamo vassassa antarāyo||
yaṁ nemittā na jānanti,||
yattha nemittānaṁ cakkhuṁ na kamati.|| ||

■

3. Puna ca paraṁ bhikkhave, upari ākāse vāyo-dhātu pakuppati,||
tena uppannā meghā paṭivigacchanti.|| ||

Ayaṁ bhikkhave, dutiyo vassassa antarāyo||
yaṁ nemittā na jānanti,||
yattha nemittānaṁ cakkhuṁ na kamati.|| ||

■

4. Puna ca paraṁ bhikkhave, Rāhu Asurindo pāṇinā udakaṁ paṭicchitvā mahā-samudde chaḍḍeti.|| ||

Ayaṁ bhikkhave, tatiyo vassassa antarāyo||
yaṁ nemittā na jānanti,||
yattha nemittānaṁ cakkhuṁ na kamati.|| ||

■

5. Puna ca paraṁ bhikkhave, vassavalāhakā devā pamattā honti.|| ||

Ayaṁ bhikkhave, catuttho vassassa antarāyo||
yaṁ nemittā na jānanti,||
yattha nemittānaṁ cakkhuṁ na kamati.|| ||

■

6. Puna ca paraṁ bhikkhave, manussā adhammikā honti.|| ||

Ayaṁ bhikkhave, pañcamo vassassa antarāyo||
yaṁ nemittā na jānanti,||
yattha nemittānaṁ cakkhuṁ na kamati.|| ||

Ime kho bhikkhave, pañca vassassa antarāyā,||
yaṁ nemittā na jānanti,||
yattha nemittānaṁ cakkhuṁ na kamatī" ti.|| ||