Aṅguttara Nikāya
Chakka-Nipāta
II: Sārāṇīya-Vagga

Sutta 17

Kusala Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[298]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho Bhagavā sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā paññatte āsane nisīdi.|| ||

Āyasmā pi kho Sāriputto sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Āyasmā pi kho Mahā Moggallāno sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā Bhagavantaṁ [299] abhivādetvā eka-m-antaṁ nisīdī.|| ||

Āyasmā pi kho Mahā Kaccāyano sayanhasamayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdī.|| ||

Āyasmā pi kho Mahā Koṭṭhito sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisidi.|| ||

Āyasmā pi kho Mahā Cundo sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdī.|| ||

Āyasmā pi kho Mahā Kappino sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdī.|| ||

Āyasmā pi kho Anuruddho sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdī.|| ||

Āyasmā pi kho Revato sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkamī.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Āyasmā pi kho Ānando sāyaṇha-samayaṁ patisallānā vuṭṭhito yen'upaṭṭhāna-sālā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdī.|| ||

 

§

 

Atha kho Bhagavā bahu-d-eva rattiṁ nisajjāya vītināmetvā uṭṭhāy āsanā vihāraṁ pāvisi.|| ||

Te pi kho āyasmanto acira-pakkantassa Bhagavato uṭṭhāy āsanā yathāvihāraṁ agamaṁsu.|| ||

Ye pana tattha bhikkhū navā acira-pabba-jitā ādhunāgatā imaṁ Dhamma-Vinayaṁ,||
te yāva suriyuggamanā kākacchamānā supiṁsu.|| ||

■

Addasā kho Bhagavā dibbena cakkhunā visuddhena atikkanta-mānusakena te bhikkhū yāva suriyuggamanā kākacchamāne supante.|| ||

Disvā yen'upaṭṭhāna-sālā ten'upasaṅkamī.|| ||

Upasaṅkamitvā paññatte āsane nisīdi.|| ||

Nisajja kho Bhagavā te bhikkhū āmantesi:|| ||

"Kahaṁ nu kho bikkhave Sāriputto,||
kahaṁ Mahā Moggallāno,||
kahaṁ Mahā Kassapo,||
kahaṁ Mahā Kaccāyano,||
kahaṁ Mahā Koṭṭhito,||
kahaṁ Mahā Cundo,||
kahaṁ Mahā Kappino,||
kahaṁ Anuruddho,||
kahaṁ Revato,||
kahaṁ Ānando,||
kahaṁ nu kho te bikkhave therā sāvakā gatā" ti?|| ||

■

Te pi kho bhante āyasmanto acira-pakkantassa Bhagavato uṭṭhāy āsanā yathāvihāraṁ agamaṁsūti.|| ||

■

Tena no tumhe bikkhave therā,||
bhikkhū navā yāva suriyass'uggamanā kākacchamānā supatha.|| ||

 

---

 

Taṁ kiṁ maññatha bikkhave api nu tumhehi diṭṭhaṁ vā sutaṁ vā:|| ||

'Rājā khattiyo muddhā-vasitto yāva-datthaṁ [300] seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ rajjaṁ kārento jana-padassa vā piyo manāpo' ti?|| ||

"No h'etaṁ bhante".|| ||

"Sādhu bikkhave, mayā pi kho etaṁ bikkhave n'eva diṭṭhaṁ na sutaṁ:|| ||

'Rājā khattiyo muddhā-vasitto yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ rajjaṁ kārento jana-padassa vā piyo manāpo' ti.|| ||

■

Taṁ kiṁ maññatha bikkhave api nu tumhehi diṭṭhaṁ vā sutaṁ vā:|| ||

'Raṭṭhiko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ pūga-gāmaṇikattaṁ kārento pūgassa va piyo manāpo' ti?|| ||

No h'etaṁ bhante.|| ||

Sādhu bikkhave, mayā pi kho etaṁ bikkhave n'eva diṭṭhaṁ na sutaṁ:|| ||

'Raṭṭhiko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ pūga-gāmaṇikattaṁ kārento pūgassa va piyo manāpo' ti.|| ||

■

Taṁ kiṁ maññatha bikkhave api nu tumhehi diṭṭhaṁ vā sutaṁ vā:|| ||

'Pettaniko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ pettanikaṁ kārento piyo manāpo' ti?|| ||

No h'etaṁ bhante.|| ||

Sādhu bikkhave, mayā pi kho etaṁ bikkhave n'eva diṭṭhaṁ na sutaṁ vā:|| ||

'Pettaniko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ pettanikattaṁ kārento pettani-kassa vā piyo manāpo' ti?|| ||

■

Taṁ kiṁ maññatha bikkhave api nu tumhehi diṭṭhaṁ vā sutaṁ vā:|| ||

'Senāya yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ senāpatikattaṁ kārento senāpati-kassa piyo manāpo' ti?|| ||

No h'etaṁ bhante.|| ||

Sādhu bikkhave, mayā pi kho etaṁ bikkhave n'eva diṭṭhaṁ na sutaṁ vā:|| ||

'Senāya yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ snopatikattaṁ kārento senāpati-kassa vā piyo manāpo' ti?|| ||

■

Taṁ kiṁ maññatha bikkhave api nu tumhehi diṭṭhaṁ vā sutaṁ:|| ||

'Senāpatiko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ senāpatikattaṁ kārento senāpati-kassa piyo manāpo' ti?|| ||

No h'etaṁ bhante.|| ||

Sādhu bikkhave, mayā pi kho etaṁ bikkhave n'eva diṭṭhaṁ na sutaṁ:|| ||

'Senāpatiko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ senāpatikattaṁ kārento senāpati-kassa vā piyo manāpo' ti?|| ||

■

Taṁ kiṁ maññatha bikkhave api nu tumhehi diṭṭhaṁ vā sutaṁ vā:|| ||

'Gāma-gāmaṇiko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ gāma-gāmaṇi-kattaṁ kārento gāmagāmaṇikassa vā piyo manāpo' ti?|| ||

No h'etaṁ bhante.|| ||

Sādhu bikkhave, mayā pi kho etaṁ bikkhave n'eva diṭṭhaṁ na sutaṁ:|| ||

'Gāma-gāmaṇiko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ gāmagāmanikattaṁ kārento gāmagāmanikassa vā piyo manāpo' ti?|| ||

■

Taṁ kiṁ maññatha bikkhave api nu tumhehi diṭṭhaṁ vā sutaṁ:|| ||

'Pūga-gāmaṇiko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ pūga-gāmaṇikattaṁ kārento pūgassa vā piyo manāpo' ti?|| ||

No h'etaṁ bhante.|| ||

Sādhu bikkhave, mayā pi kho etaṁ bikkhave n'eva diṭṭhaṁ na sutaṁ vā:|| ||

'Pūga-gāmaṇiko yāva-datthaṁ seyya-sukhaṁ phassa-sukhaṁ middha-sukhaṁ anuyutto viharanto yāva-jīvaṁ pūga-gāmaṇikattaṁ kārento pūgassa vā piyo manāpo" ti.|| ||

■

Taṁ kiṁ maññatha bikkhave api nu tumhehi diṭṭhaṁ vā sutaṁ:|| ||

'Samaṇo vā brāhmaṇo vā yāva-datthaṁ seyya-sukhaṁ phassa-sukhaṁ middha-sukhaṁ anuyutto indriyesu agutta-dvāro bhojane amattaññu jāgariyaṁ ananuyutto avipassako kusalānaṁ dhammānaṁ pubba-ratt-ā-pararattaṁ bodha-pakkhiyānaṁ dhammānaṁ bhāvan-ā-nuyogaṁ ananuyutto āsavānaṁ khayā anāsavaṁ ceto-vimuttiṁ paññā-vimuttiṁ diṭṭhe'va dhamme sayaṁ abhiññā sacchi-katvā upasampajja viharanto' ti?|| ||

No h'etaṁ bhante.|| ||

Sādhu bikkhave, mayā pi kho etaṁ bikkhave n'eva diṭṭhaṁ na [301] sutaṁ|| ||

"Samaṇo vā brāhmaṇo vā yāva-datthaṁ seyya-sukhaṁ phassa-sukhaṁ middha-sukhaṁ anuyutto indriyesu agutta-dvāro bhojane amatt'aññū jāgariyaṁ ananuyutto avipassako kusalānaṁ dhammānaṁ pubba-ratt-ā-pararattaṁ bodha-pakkhiyānaṁ dhammānaṁ bhāvan-ā-nuyogaṁ ananuyutto āsavānaṁ khayā anāsavaṁ ceto-vimuttiṁ paññā-vimuttiṁ diṭṭhe'va dhamme sayaṁ abhiññā sacchi-katvā upasampajja viharanto' ti.|| ||

Tasmātiha bikkhave evaṁ sikkhitabbaṁ:|| ||

"Indriyesu gutta-dvārā bhavissāma bhojane mattaññuno jāgariyaṁ anuyuttā vipassakā kusalānaṁ dhammānaṁ pubba-ratt-ā-pararattaṁ bodha-pakkhiyānaṁ dhammānaṁ bhāvan-ā-nuyogaṁ anuyuttā viharissāmā" ti.|| ||

Evaṁ hi vo bikkhave sikkhitabban" ti.|| ||