Aṅguttara Nikāya
Chakka Nipāta
V. Dhammika Vagga

Sutta 45

Iṇa Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[351]

[1][pts][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Dāliddiyaṁ bhikkhave dukkhaṁ lokasmiṁ kāma-bhogino ti?|| ||

"Evaṁ bhante" ti.|| ||

2. Yam pi bhikkhave daḷiddo [352] assako anāḷhiyo iṇaṁ ādiyati.|| ||

Itādānam pi bhikkhave dukkhaṁ lokasmiṁ kāma-bhogino ti?|| ||

"Evaṁ bhante" ti.|| ||

3. Yam pi bhikkhave daḷiddo assako anāḷhiyo iṇaṁ ādiyitvā vaḍḍhiṁ paṭisuṇāti.|| ||

Vaḍḍhi pi bhikkhave dukkhā lokasmiṁ sāmabhogino ti?|| ||

"Evaṁ bhante" ti.|| ||

4. Yam pi bhikkhave daḷiddo assako anāḷhiyo vaḍḍhiṁ paṭisuṇitvā kālābhataṁ vaḍḍhiṁ na deti.|| ||

Codenti pi naṁ codanā pi bhikkhave dukkhā lokasmiṁ kāma-bhogino ti?|| ||

"Evaṁ bhante" ti.|| ||

5. Yam pi bhikkhave daḷiddo assako anāḷhiyo codiyamāno na deti.|| ||

Anucaranti pi naṁ.|| ||

Anucariyā pi bhikkhave dukkhā lokasmiṁ kāma-bhogino ti?|| ||

"Evaṁ bhante" ti.|| ||

6. Yam pi bhikkhave daḷiddo assako anāḷhiyo anucariyamāno na deti.|| ||

Bandhanti pi naṁ.|| ||

Bandhanam pi bhikkhave dukkhaṁ lokasmiṁ kāma-bhogino ti?|| ||

"Evaṁ bhante" ti.|| ||

Iti kho bhikkhave dāḷiddyam pi dukkhaṁ lokasmiṁ kāma-bhogino.|| ||

Iṇādānam pi dukkhaṁ lokasmiṁ kāma-bhogino.|| ||

Vaḍḍhī pi dukkhā lokasmiṁ kāma-bhogino,||
codanā pi dukkhā lokasmiṁ kāma-bhogino.|| ||

Anucariyā pi dukkhā lokasmiṁ kāma-bhogino.|| ||

Bandhanam pi dukkhaṁ lokasmiṁ kāma-bhogino.|| ||

Evam eva kho bhikkhave yassa kassaci saddhā n'atthi kusalesu dhammesu,||
hiri n'atthi kusalesu dhammesu,||
ottappaṁ n'atthi kusalesu dhammesu,||
viriyaṁ n'atthi kusalesu dhammesu,||
paññā n'atthi kusalesu dhammesu,||
ayaṁ vuccati bhikkhave ariyassa vinaye daḷiddo assako anāḷhiyo.|| ||

Sa kho so bhikkhave dasiddo assako anāḷhiyo,||
saddhāya asati kusalesu dhammesu,||
hiriyā asati kusalesu dhammesu,||
ottappe asati kusalesu dhammesu,||
viriye asati kusalesu dhammesu,||
paññāya asati kusalesu dhammesu,||
kāyena du-c-caritaṁ carati.|| ||

Vācāya du-c-caritaṁ carati.|| ||

Manasā du-c-caritaṁ carati.|| ||

Idam assa iṇādānasmiṁ vadāmi.|| ||

So tassa kāya-du-c-caritassa paṭicchā-dana-hetu pāpikaṁ icchaṁ paṇidahati:||
'Mā maṁ jaññā' ti icchati,||
'Mā maṁ jaññā' ti [353] saṅkappeti,||
'Mā maṁ jaññā' ti vācaṁ bhāsati,||
'Mā maṁ jaññā' ti kāyena parakkamati.|| ||

So tassa vacī-du-c-caritassa paṭicchā-dana-hetu pāpikaṁ icchaṁ paṇidahati:||
'mā maṁ chaññā' ti icchati,||
'Mā maṁ jaññā' ti saṅkappeti,||
'Mā maṁ jaññā' ti vācaṁ bhāsati,||
'Mā maṁ jaññā' ti kāyena parakkamati.|| ||

So tassa mano-du-c-caritassa paṭicchā-dana-hetu pāpikaṁ icchaṁ paṇidahati:||
'Mā maṁ jaññā' ti icchati,||
'Mā maṁ jaññā' ti saṅkappeti,||
'Mā maṁ jaññā' ti vācaṁ bhāsati,||
'Mā maṁ jaññā' ti kāyena parakkamati.|| ||

Idam assa vaḍḍhiyā vadāmi.|| ||

Tam enaṁ pesalā sabrahma-cārī evam āhaṁsu:|| ||

"Ayañ ca so āyasmā evaṁ-kārī evaṁ samā-cāro" ti.|| ||

Idam assa codanāya vadāmi.|| ||

Tam enaṁ arañña-gataṁ vā||
rukkha-mūla-gataṁ vā||
sūññā-gāra-gataṁ vā||
vippaṭi-sāra-saha-gatā pāpakā akusala-vitakkā samud'ācaranti.|| ||

Idam assa anucariyāya vadāmi.|| ||

Sa kho so bhikkhave daḷiddo assako anāḷhiyo||
kāyena du-c-caritaṁ caritvā||
vācāya du-c-caritaṁ caritvā||
manasā du-c-caritaṁ caritvā||
kāyassa bhedā param maraṇā Niraya-bandhane vā bajjhati,||
tiracchāna-yoni-bandhane vā.|| ||

Nāhaṁ bhikkhave aññaṁ eka-dhammam pi samanupassāmi evaṁ-dāruṇaṁ emaṁ kaṭukaṁ evaṁ antarāya-karaṁ anuttarassa yoga-k-khemassa adigamāya yatha-yidaṁ bhikkhave Niraya-bandhanaṁ vā tiracchāna-yoni-bandhanaṁ vā, ti.|| ||

 

---

 

Dāḷiddiyaṁ dukkhaṁ loke iṇādānaṁ ca vuccati,||
daḷiddo iṇam-ādāya bhuñjamāno vihaññati.|| ||

Tato anucarantī naṁ bandhanam pi nigacchati.|| ||

Etaṁ hi bandhanaṁ dukkhaṁ kāma-lābh-ā-bhijappinaṁ.|| ||

Tath'eva ariya-vinaye saddhā yassa na vijjati,||
[354] Ahiriko an-ottāpi pāpa-kammā-vinicchayo|| ||

Kāya-du-c-caritaṁ katvā vacī-du-c-caritāni ca,||
Mano-du-c-caritaṁ katvā 'Mā maṁ jaññā' ti icchati.|| ||

So saṁsappati kāyena vācāya uda-cetasā,||
Pāpa-kammā pavaḍḍhento tattha tattha puna-p-punaṁ|| ||

So pāpa-kammo dummedho jānaṁ dukkaṭa-mattano,||
daḷiddo iṇam-ādāya bhuñjamāno vihaññati,|| ||

Tato anucarantī naṁ saṅkappā mānasā dukkhā,||
Gāme vā yadi vā raññe yassa vippaṭi-sārajā.|| ||

So pāpa-kammo dummedho jānaṁ dukkaṭa-mattano,||
Yonim aññataraṁ gantvā Niraye vā pi bajjhati,||
Etaṁ hi bandhanaṁ dukkhaṁ yamhā dhīro pamuccati.|| ||

Dhamma-laddhehi bhogehi dadaṁ cittaṁ pasādayaṁ||
Ubhayattha kaṭa-g-gāho saddhassa ghara-mesino.|| ||

Diṭṭha-dhamma-hitatthāya samparāya sukhāya ca||
evam etaṁ gaha-ṭ-ṭhānaṁ cāgo puññaṁ pavaḍḍhati.|| ||

Tath'eva ariya-vinaye saddhā yassa pati-ṭ-ṭhitā||
Hirimano ca ottapī paññavā sīla-saṁvuto.|| ||

Eso kho ariya-vinaye sukhaṁ-jīvīti vuccati||
Nirāmisaṁ sukhaṁ laddhā upekhaṁ adhitiṭṭati.|| ||

Pañca-nīvaraṇe hitvā niccaṁ āraddha-vīriyo||
Jhānāni upasampajja ekodi nipako sato.|| ||

Evaṁ ñatvā yathā-bhūtaṁ sabba-saṁyojana-k-khaye||
Sabbaso anupādāya sammā-cittaṁ vimuccati.|| ||

Tassa sammā vimuttassa ñāṇaṁ ca hoti tādino||
'Akuppā me vimuttī' ti bhava-saṁyojana-k-khaye.|| ||

Etaṁ kho paramaṁ ñāṇaṁ etaṁ sukha-m-anuttaraṁ||
Asokaṁ virajaṁ khemaṁ etam ānaṇyam uttaman ti.|| ||