Aṅguttara Nikāya
Chakka Nipāta
V. Dhammika Vagga

Sutta 54

Dhammika Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evaṁ me sutaṁ:|| ||

Ekaṁ samayaṁ Bhagavā Rājagahe viharati Gijjhakūṭe pabbate.|| ||

Tena kho pana samayen'āyasmā Dhammiko jāti-bhūmiyaṁ āvāsiko hoti sabbaso jāti-bhūmiyaṁ sattasu āvāsesu.|| ||

Tatra sudaṁ āyasmā Dhammiko āgantuke bhikkhū||
akkosati,||
paribhāsati,||
vihiṁsati,||
vitudati,||
roseti vācāya.|| ||

Te ca āgantukā bhikkhu āyasmatā Dhammikena||
akkosiyamānā,||
paribhāsiyamānā,||
vihesiyamānā,||
vitudiyamānā,||
rosiyamānā vācāya,||
pakkamanti,||
na saṇṭhahanti||
riñcanti āvāsaṁ.|| ||

Atha kho jāti-bhūmakānaṁ upāsakānaṁ etad ahosi:|| ||

"Mayaṁ kho bhikkhu-saṅghaṁ pacc'upaṭṭhitā cīvara-piṇḍa-pāta-sen'āsana-gilāna-paccaya-bhesajja-parikkhārena||
atha kho pana āgantukā bhikkhu pakkamanti,||
na sanṭhahanti,||
riñcanti āvāsaṁ.|| ||

Ko nu kho hetu,||
ko paccayo||
yena āgantukā bhikkhū||
pakkamanti,||
na saṇṭhahanti,||
riñcanti āvāsan" ti?|| ||

Atha kho jāti-bhūmakānaṁ upāsakānaṁ etad ahosi:|| ||

"Ayaṁ kho āyasmā Dhammiko āgantuke bhikkhu||
akkosati,||
paribhāsati,||
vihiṁsati,||
vitudati,||
roseti vācāya.|| ||

Te ca āgantukā bhikkhū āyasmatā Dhammikena||
akkosiyamānā,||
paribhāsiyamānā,||
vihesiyamānā,||
vitudiyamānā,||
rosiyamānā vācāya,||
pakkamanti,||
na saṇṭhahanti,||
riñcanti āvāsaṁ.|| ||

Yan nūna mayaṁ āyasmantaṁ Dhammikaṁ pabbājeyyāmā" ti.|| ||

Atha kho jāti-bhūmakā upāsakā yen'āyasmā Dhammiko ten'upasaṅkamiṁsu.|| ||

Upasaṅkamitvā āyasmantaṁ Dhammikaṁ etad avocuṁ:|| ||

"Pakkamatu bhante āyasmā Dhammiko imamhā āvāsā,||
alaṁ te idha vāsenā" ti.|| ||

2. Atha kho āyasmā Dhammiko tamhā āvāsaṁ aññaṁ avāsaṁ agamāsi.|| ||

■

Tatra pi sudaṁ āyasmā Dhammiko āgantuke bhikkhu||
akkosati,||
paribhāsati,||
vihiṁsati,||
vitudati,||
roseti vācāya.|| ||

Atha kho jāti-bhūmakānaṁ upāsakānaṁ etad ahosi:|| ||

Ko nu kho hetu,||
ko paccayo||
yena āgantukā bhikkhū||
pakkamanti,||
na saṇṭhahanti,||
riñcanti āvāsan" ti?|| ||

Atha kho jāti-bhūmakānaṁ upāsakānaṁ etad ahosi:|| ||

"Ayaṁ kho āyasmā Dhammiko āgantuke bhikkhu||
akkosati,||
paribhāsati,||
vihiṁsati,||
vitudati,||
roseti vācāya.|| ||

Yan nūna mayaṁ āyasmantaṁ Dhammikaṁ pabbājeyyāmā" ti.|| ||

Atha kho jāti-bhūmakā upāsakā yen'āyasmā Dhammiko ten'upasaṅkamiṁsu.|| ||

Upasaṅkamitvā āyasmantaṁ Dhammikaṁ etad avocuṁ:|| ||

"Pakkamatu bhante āyasmā Dhammiko imamhā āvāsā,||
alaṁ te idha vāsenā" ti.|| ||

3. Atha kho āyasmā Dhammiko tamhā āvāsaṁ aññaṁ avāsaṁ agamāsi.|| ||

■

Tatra pi sudaṁ āyasmā Dhammiko āgantuke bhikkhū||
akkosati,||
paribhāsati,||
vihiṁsati,||
vitudati,||
roseti vācāya.|| ||

Atha kho jāti-bhūmakānaṁ upāsakānaṁ etad ahosi:|| ||

Ko nu kho hetu,||
ko paccayo||
yena āgantukā bhikkhū||
pakkamanti,||
na saṇṭhahanti,||
riñcanti āvāsan" ti?|| ||

Atha kho jāti-bhūmakānaṁ upāsakānaṁ etad ahosi:|| ||

"Ayaṁ kho āyasmā Dhammiko āgantuke bhikkhu||
akkosati,||
paribhāsati,||
vihiṁsati,||
vitudati,||
roseti vācāya.|| ||

Yan nūna mayaṁ āyasmantaṁ Dhammikaṁ pabbājeyyāmā" ti.|| ||

Atha kho jāti-bhūmakā upāsakā yen'āyasmā Dhammiko ten'upasaṅkamiṁsu.|| ||

Upasaṅkamitvā āyasmantaṁ Dhammikaṁ etad avocuṁ:|| ||

"Pakkamatu bhante āyasmā Dhammiko sabbaso jāti-bhūmiyaṁ sattahi āvāsehī" ti.|| ||

■

4. Atha kho āyasmato Dhammikassa etad ahosi:|| ||

"Pabbājito kho'mhi||
jāti-bhūmakehi upāsakehi sabbaso jāti-bhūmiyaṁ sattahi āvāsehi,||
kahan nū kho dāni gacchāmī" ti?|| ||

Atha kho āyasmato Dhammikassa etad ahosi:|| ||

"Yan nūn-ā-haṁ yena Bhagavā ten'upasaṅkameyyan" ti?|| ||

Atha kho āyasmā Dhammiko patta-cīvaram ādāya yena Rājagahaṁ tena pakkāmi.|| ||

Anupubbena yena Rājagahaṁ Gijjhakūṭo pabbato,||
yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinnaṁ kho āyasmantaṁ Dhammikaṁ Bhagavā etad avoca:|| ||

"Handa kuto nu tvaṁ brāhmaṇa Dhammika,||
āgachchasī" ti?|| ||

"Pabbājito ahaṁ bhante jāti-bhūmakehi upāsakehi sabbaso jāti-bhūmiyaṁ sattahi āvāsehī" ti.|| ||

"Alaṁ brāhmaṇa Dhammika, kiṁ te iminā?|| ||

Yaṁ tvaṁ tato tato pabbā-jenti,||
so tvaṁ tato tato pabbājito mam eva santike āgacchasi.|| ||

5. Bhūta-pubbaṁ, brāhmaṇa Dhammika,||
sāmuddikā vāṇijā tīra-dassiṁ sakuṇaṁ gahetvā nāvāya samuddaṁ ajjho-gāhanti.|| ||

Te atīradakkhīṇīyā nāvāya tīra-dassiṁ sakuṇaṁ muñcanti.|| ||

So gacchat'eva purattimaṁ disaṁ,||
gacchati pacchimaṁ disaṁ,||
gacchati uttaraṁ disaṁ,||
gacchati dakkhiṇaṁ disaṁ,||
gacchati uddhaṁ,||
gacchati anudisaṁ.|| ||

Sace so samantā tīraṁ passati,||
tathā gatako va hoti.|| ||

Sace pana so samantā tīraṁ na passati,||
tam eva nāvaṁ paccā-gacchati.|| ||

Evam eva kho brāhmaṇa Dhammika,||
yaṁ tvaṁ tato tato pabbā-jenti,||
so tvaṁ tato tato pabbājito mam'eva santikaṁ āgacchasi.|| ||

[369] Bhūta-pubbaṁ, brāhmaṇa Dhammika,||
rañño Koravyassa Suppatiṭṭho nāma Nigrodha-rājā ahosi pañcasākho sītacchāyo manoramo.|| ||

Suppatiṭṭassa kho pana brāhmaṇa Dhammika,||
Nigrodha-rājassa dvādasa yojanāni abhiniveso ahosi,||
pañca yojanāni mulakasantānakānaṁ.|| ||

Suppatiṭṭhassa kho pana brāhmaṇa Dhammika,||
nigodharājassa tāva mahantāni phalāni ahesuṁ.|| ||

Seyyathā pi nāma āḷhakathālikā,||
evam assa sāduni phalāni ahesuṁ,||
seyyathā pi nāma khuddam madhuṁ anīlakaṁ.|| ||

Suppatiṭṭhassa kho pana brāhmaṇa Dhammika,||
Nigrodha-rājassa||
ekaṁ khandhaṁ rājā paribhuñjati saddhiṁ itthāgārena,||
ekaṁ khandhaṁ balakāyo paribhuñjati,||
ekaṁ khandhaṁ negamajāna-padā paribhuñjanti,||
ekaṁ khandhaṁ samaṇa-brāhmaṇā paribhuñjanti,||
ekaṁ khandhaṁ miga-pakkino paribhuñjanti.|| ||

Suppatiṭṭhassa kho pana brāhmaṇa Dhammika Nigrodha-rājassa na koci phalāni rakkhati.|| ||

Na ca sudaṁ añña-maññassa phalāni hiṁsanti.|| ||

Atha kho brāhmaṇa Dhammika,||
aññataro pūriso Suppatiṭṭhassa Nigrodha-rājassa yāva-datthaṁ phalāni bhakkhitvā sākhaṁ bhañjitvā pakkāmi.|| ||

Atha kho brāhmaṇa Dhammika,||
Suppatiṭṭhe Nigrodha-rāje adhivatthāya devatāya etad ahosi:|| ||

'Acchariyaṁ vata bho,||
abbhūtaṁ vata bho,||
yāva pāpo manusso yatra hi nāma Suppatiṭṭhassa Nigrodha-rājassa yāva-datthaṁ phalāni bhakkhitvā sākhaṁ bhañjitvā pakkamissati,||
yan nūna Suppatiṭṭho Nigrodha-rājā āyatiṁ phalaṁ na dadeyyā' ti.|| ||

Atha kho brāhmaṇa Dhammika,||
Suppatiṭṭho Nigrodha-rājā āyatiṁ phalaṁ nādāsi.|| ||

Atha kho brāhmana Dhammika,||
[370] rājā Koravyo yena Sakko devanam Indo ten'upasaṅkami.|| ||

Upasakamitvā Sakkaṁ devānam indaṁ etad avoca:|| ||

'Yagghe mārisa, jāneyyāsi,||
Suppatiṭṭho Nigrodha-rājā phalaṁ na detī' ti?|| ||

Atha kho brāhmaṇa Dhammika,||
Sakko devānam Indo tathā-rūpaṁ iddhābhi-saṅkhāraṁ abhisaṅkhāsi,||
yathā bhusā vāta-vuṭṭhi āgantvā Suppatiṭṭhaṁ Nigrodha-rājaṁ pātesi ummūlam akāsi.|| ||

Atha kho brāhmaṇa Dhammika,||
Suppatiṭṭhe Nigrodha-rāje adhivatthā devatā dukkhī dummanā assumukhī rudamānā eka-m-antaṁ aṭṭhāsi.|| ||

Atha kho brāhmaṇa Dhammika,||
Sakko devānam Indo yena Suppatiṭṭhe Nigrodha-rāje adhivatthā devatā ten'upasaṅkami.|| ||

Upasaṅkamitvā Suppatiṭṭhe Nigrodha-rāje adhivatthaṁ devataṁ etad avoca:|| ||

'Kin nu tvaṁ devate dukkhī dummanā assumukhī rudamānā eka-m-antaṁ ṭhitā' ti?|| ||

'Tathā hi pana me mārisa,||
bhūsā vāta-vuṭṭhi āgantvā bhavanaṁ pātesi ummūlam akāsī' ti.|| ||

'Api nu tvaṁ devate,||
rukkha-dhamme ṭhitāya bhūsā vāta-vuṭṭhi āgantvā bhavanaṁ pavattesi ummūlam akāsī' ti?|| ||

'Kathaṁ pana mārisa rukkho rukkha-dhamme ṭhito hotī' ti?|| ||

'Idh'eva devate,||
rukkhassa mūlaṁ mūlatthikā haranti,||
tacaṁ tacatthikā haranti,||
pattaṁ pattatthikā haranti,||
pupphaṁ pupphatthikā haranti,||
phalaṁ phalatthikā haranti||
na ca tena devatāya anatta-manatā vā||
anabhiraddhi vā||
karaṇīyā.|| ||

Evaṁ kho devate rukkho rukkha-dhamme ṭhito hotī' ti.|| ||

'Aṭṭhitāy'eva kho me mārisa rukkha-dhamme bhūsā vāta-vuṭṭhi āgantvā bhavanaṁ pātesi ummūlam akāsi' ti.|| ||

'Sace kho tvaṁ devate rukkha-dhamme tiṭṭheyyāsi,||
siyā pe te bhavanaṁ yathāpure' ti.|| ||

'Ṭhassām'ahaṁ [371] mārisa rukkha-dhamme,||
hotu me bhavanaṁ yathāpūre' ti.|| ||

Atha kho brāhmaṇa Dhammika,||
Sakko devānam Indo tathā-rūpaṁ iddhābhi-saṅkhāraṁ abhisaṅkhāsi,||
yathā bhūsā vāta-vuṭṭhi āgantvā Suppatiṭṭhaṁ Nigrodha-rājaṁ ussāpesi,||
sacchavīni mūlāni ahesuṁ.|| ||

Evam eva kho brāhmaṇa Dhammika,||
api nū taṁ samaṇa-dhamme ṭhitaṁ jāti-bhūmikā upāsakā pabbājeyyuṁ sabbaso jāti-bhūmiyaṁ sattahi āvāsehī" ti?|| ||

"Kathaṁ pana bhante samaṇo samaṇa-dhamme ṭhito hoti" ti?|| ||

"Idha brāhmaṇa Dhammika,||
samaṇo akkosantaṁ na paccakkosati,||
rosentaṁ na paṭirosati,||
bhaṇḍantaṁ na paṭibhaṇḍati.|| ||

Evaṁ kho brāhmaṇa Dhammika,||
samaṇo samaṇa-dhamme ṭhito hotī" ti.|| ||

"Aṭṭhitaṁ yeva kho maṁ bhante samaṇa-dhamme jāti-bhūmikā upāsakā pabbājesuṁ sabbaso jāti-bhūmiyaṁ sattahī āvāsehī" ti.|| ||

7. "Bhūta-pubbaṁ brāhmaṇa Dhammika,||
Sunetto nāma Satthā ahosi titthakaro kāmesu vīta-rāgo.|| ||

Sunettassa kho pana brāhmaṇa Dhammika,||
Satthuno anekāni sāvakasatāni ahesuṁ.|| ||

Sunetto Satthā sāvakānaṁ Brahma-lokasahavyatāya dhammaṁ deseti.|| ||

Ye kho pana brāhmaṇa Dhammika,||
Sunettassa Satthuno Brahma-lokasahavyatāya dhammaṁ desentassa cittāni na pasādesuṁ,||
te kāyassa bhedā param maraṇā apāyaṁ duggatiṁ vinipātaṁ Nirayaṁ upapajjiṁsu.|| ||

Ye kho pana brāhmaṇa Dhammika,||
Sunettassa Satthuno Brahma-lokasahavyatāya dhammaṁ desentassa cittāni pasādesuṁ,||
te kāyassa bhedā param maraṇā sugatiṁ saggaṁ lokaṁ upapajjiṁsu.|| ||

■

Bhūta-pubbaṁ brāhmaṇa Dhammika, Mūgapakkho nāma Satthā ahosi titthakaro kāmesu vīta-rāgo.|| ||

Mūgapakkhassa kho pana brāhmaṇa Dhammika,||
Satthuno anekāni sāvakasatāni ahesuṁ.|| ||

Mūgapakkho Satthā sāvakānaṁ Brahma-lokasahavyatāya dhammaṁ deseti.|| ||

Ye kho pana brāhmaṇa Dhammika,||
Mūgapakkhassa Satthuno Brahma-lokasahavyatāya dhammaṁ desentassa cittāni na pasādesuṁ,||
te kāyassa bhedā param maraṇā apāyaṁ duggatiṁ vinipātaṁ Nirayaṁ upapajjiṁsu.|| ||

Ye kho pana brāhmaṇa Dhammika,||
Mūgapakkhassa Satthuno Brahma-lokasahavyatāya dhammaṁ desentassa cittāni pasādesuṁ,||
te kāyassa bhedā param maraṇā sugatiṁ saggaṁ lokaṁ upapajjiṁsu.|| ||

■

Bhūta-pubbaṁ brāhmaṇa Dhammika, Araṇemi nāma Satthā ahosi titthakaro kāmesu vīta-rāgo.|| ||

Araṇemissa kho pana brāhmaṇa Dhammika,||
Satthuno anekāni sāvakasatāni ahesuṁ.|| ||

Araṇemino Satthā sāvakānaṁ Brahma-lokasahavyatāya dhammaṁ deseti.|| ||

Ye kho pana brāhmaṇa Dhammika,||
Araṇemissa Satthuno Brahma-lokasahavyatāya dhammaṁ desentassa cittāni na pasādesuṁ,||
te kāyassa bhedā param maraṇā apāyaṁ duggatiṁ vinipātaṁ Nirayaṁ upapajjiṁsu.|| ||

Ye kho pana brāhmaṇa Dhammika,||
Araṇemissa Satthuno Brahma-lokasahavyatāya dhammaṁ desentassa cittāni pasādesuṁ,||
te kāyassa bhedā param maraṇā sugatiṁ saggaṁ lokaṁ upapajjiṁsu.|| ||

■

Bhūta-pubbaṁ brāhmaṇa Dhammika, Kuddālako nāma Satthā ahosi titthakaro kāmesu vīta-rāgo.|| ||

Kuddālakassa kho pana brāhmaṇa Dhammika,||
Satthuno anekāni sāvakasatāni ahesuṁ.|| ||

Kuddālako Satthā sāvakānaṁ Brahma-lokasahavyatāya dhammaṁ deseti.|| ||

Ye kho pana brāhmaṇa Dhammika,||
Kuddālakassa Satthuno Brahma-lokasahavyatāya dhammaṁ desentassa cittāni na pasādesuṁ,||
te kāyassa bhedā param maraṇā apāyaṁ duggatiṁ vinipātaṁ Nirayaṁ upapajjiṁsu.|| ||

Ye kho pana brāhmaṇa Dhammika,||
Kuddālakassa Satthuno Brahma-lokasahavyatāya dhammaṁ desentassa cittāni pasādesuṁ,||
te kāyassa bhedā param maraṇā sugatiṁ saggaṁ lokaṁ upapajjiṁsu.|| ||

■

Bhūta-pubbaṁ brāhmaṇa Dhammika, Hatthipālo nāma Satthā ahosi titthakaro kāmesu vīta-rāgo.|| ||

Hatthipālassa kho pana brāhmaṇa Dhammika,||
Satthuno anekāni sāvakasatāni ahesuṁ.|| ||

Hatthipālo Satthā sāvakānaṁ Brahma-lokasahavyatāya dhammaṁ deseti.|| ||

Ye kho pana brāhmaṇa Dhammika,||
Hatthipālassa Satthuno Brahma-lokasahavyatāya dhammaṁ desentassa cittāni na pasādesuṁ,||
te kāyassa bhedā param maraṇā apāyaṁ duggatiṁ vinipātaṁ Nirayaṁ upapajjiṁsu.|| ||

Ye kho pana brāhmaṇa Dhammika,||
Hatthipālassa Satthuno Brahma-lokasahavyatāya dhammaṁ desentassa cittāni pasādesuṁ,||
te kāyassa bhedā param maraṇā sugatiṁ saggaṁ lokaṁ upapajjiṁsu.|| ||

■

Bhūta-pubbaṁ brāhmaṇa Dhammika, [372] Jotipālo nāma Satthā ahosi titthakaro kāmesu vīta-rāgo.|| ||

Jotipālassa kho pana brāhmaṇa Dhammika,||
Satthuno anekāni sāvakasatāni ahesuṁ.|| ||

Jotipālo Satthā sāvakānaṁ Brahma-lokasahavyatāya dhammaṁ deseti.|| ||

Ye kho pana brāhmaṇa Dhammika,||
Jotipālassa Satthuno Brahma-lokasahavyatāya dhammaṁ desentassa cittāni na pasādesuṁ,||
te kāyassa bhedā param maraṇā apāyaṁ duggatiṁ vinipātaṁ Nirayaṁ upapajjiṁsu.|| ||

Ye kho pana brāhmaṇa Dhammika,||
Jotipālassa Satthuno Brahma-lokasahavyatāya dhammaṁ desentassa cittāni pasādesuṁ,||
te kāyassa bhedā param maraṇā sugatiṁ saggaṁ lokaṁ upapajjiṁsu.|| ||

■

Taṁ kiṁ maññasi brāhmaṇa Dhammika,||
yo ime cha Satthāre titthakare kāmesū vīta-rāge aneka-sataparivāre sasāvaka-saṅghe paduṭṭhacitto akkoseyya,||
paribhāseyya,||
bahuṁ so apuññaṁ pasaveyyā" ti?|| ||

"Evaṁ bhante."|| ||

8. "Yo kho brāhmaṇa Dhammika,||
ime cha Satthāre titthakare kāmesu vīta-rāge aneka-sataparivāre sasāvaka-saṅghe paduṭṭhacitto akkoseyya,||
paribhāseyya,||
bahuṁ so apuññaṁ pasaveyya.|| ||

Yo ekaṁ diṭṭhi-sampannaṁ puggalaṁ paduṭṭhacitto akkosati,||
paribhāsati,||
ayaṁ tato bahutaraṁ apuññaṁ pasavati.|| ||

Taṁ kissa hetu?|| ||

Nāhaṁ brāhmaṇa Dhammika,||
ito bahiddhā eva-rūpiṁ khantiṁ vadāmi yathā'maṁ sabrahma-cārīsu.|| ||

9. Tasmātiha brāhmaṇa Dhammika,||
evaṁ sikkhitabbaṁ:|| ||

"Na no sabrahma-cārisu cittāni paduṭṭhāni bhavissantī ti.|| ||

Evaṁ hi te brāhmaṇa Dhammika, sikkhitabban" ti.|| ||

[373] Sunetto Mūgapakkho ca Araṇemi ca brāhmaṇo||
Kuddālako ahu Satthā Hatthipālo ca māṇavo.

Jotipālo ca Govindo ahu satta purohito||
Ahiṁsaka atītaṁse cha Satthāro yasassino,

Nirāmagandhā karuṇe vimuttā kāmasaṁyojanātigā||
Kāmarāgaṁ virāchetvā brahma-lok'ūpagā ahu.

Ahesuṁ sāvakā tesaṁ anekāni satāni pi||
Nirāmagandhā karuṇe vimuttā kāmasaṁyojanātigā||
Kāmarāgaṁ virāchetvā Brahma-lokupagā ahu.

Ye te isī bāhirake vīta-rāge samāhite||
Paduṭṭhamanasaṅkappo yo naro paribhāsati,

Bahuñ ca so pasavati apuññaṁ tādiso naro||
Yo cekaṁ diṭṭhi-sampannaṁ bhikkhuṁ Buddhassa sāvakaṁ,

Paduṭṭhamanasaṅkappo yo naro paribhāsati.||
Ayaṁ tato bahutaraṁ apuññaṁ pasave naro.

Na sādhurūpaṁ āsīde diṭṭhi-ṭ-ṭhānappahāyinaṁ||
Sattamo puggalo eso ariyaSaṅghassa vuccati.

Avīta-rāgo kāmesu yassa pañc'indriyā mudu||
Saddhā satī ca viriyaṁ samatho ca vipassanā.

Tādisaṁ bhikkhum āsajja pubb'eva upahaññati.||
Attānaṁ upahantvāna pacchā aññaṁ vihiṁsati.

Yo ca rakkhati attāṇaṁ rakkhito tassa bāhiro||
Tasmā rakkheyya attāṇaṁ, akkhato paṇḍito sadā ti.|| ||

Dhammika Vagga Pañcamo

Aṅguttara Nikāya Chakka Nipāta V. Dhammika Vagga

Sutta 54

Dhammika Suttaṁ

Aṅguttara Nikāya
Chakka Nipāta
V. Dhammika Vagga