Pātu-Bhāva Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Channaṁ bhikkhave pātu-bhāvo dullabho lokasmiṁ.|| ||

Katamesaṁ channaṁ?|| ||

Tathāgatassa arahato Sammā Sambuddhassa pātu-bhāvo dullabho lokasmiṁ,|| ||

■

Tathāgata-p-paveditassa Dhamma-Vinayassa desetā puggalo dullabho lokasmiṁ,|| ||

■

ariy'āyatane paccā-jāti dullabhā lokasmiṁ,|| ||

■

indriyānaṁ avekallatā dullabhā lokasmiṁ,|| ||

■

ajaḷatā anela-mūgatā dullabhā lokasmiṁ,|| ||

■

kusala-dhamma-c-chando dullabho lokasmiṁ.|| ||

Imesaṁ kho bhikkhave channaṁ pātu-bhāvo dullabho lokasmin" ti.|| ||