Bhāvanānuyutta Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[125]

[1][pts] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi bhikkhavo ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. Bhāvanaṁ ananuyttassa bhikkhave bhikkhuno viharato kiñ cāpi evaṁ icchā uppajjeyya:|| ||

"Aho vata me anupādāya āsavehi cittaṁ vimucceyyā" ti.|| ||

Atha khvassa n'eva anupādāya āsavehi cittaṁ vimuccati.|| ||

Taṁ kissa hetu?|| ||

"Abhāvitattātissa vacanīyaṁ."|| ||

Kissa abhāvitattā?|| ||

Catunnaṁ sati-paṭṭhānānaṁ,||
catunnaṁ samma-p-padhānānaṁ,||
catunnaṁ iddhi-pādānaṁ,||
pañcannaṁ indriyānaṁ,||
pañcannaṁ balānaṁ,||
sattannaṁ bojjh'aṅgānaṁ,||
ariyassa aṭṭhaṅgikassa Maggassa.|| ||

Seyyathā pi, bhikkhave, kukkuṭiyā aṇḍāni aṭṭha vā||
dasa vā dvādasa vā,||
tānassu kukkuṭiyā na sammā adhisayitāni na sammā pariseditāni na sammā paribhā- [126] vitāni.|| ||

Kiñ cāpi tassā kukkuṭiyā evaṁ icchā uppajjeyya:|| ||

"Aho vata me kukkuṭa-potakā pādanakha-sikhāya vā||
mukha-tuṇḍakena vā||
aṇḍakosaṁ padāletvā sottinā abhinibbhijjeyyun" ti.|| ||

Atha kho abhabbāva te kukkuṭa-potakā pādanakha-sikhāya vā||
mukha-tuṇḍakena vā||
aṇḍakosaṁ padāletvā sotthinā abhinibbhijjituṁ.|| ||

Taṁ kissa hetu?|| ||

Tathā hi bhikkhave kukkuṭiyā aṇḍāni na sammā adhisayitāni na sammā pariseditāni,||
na sammā paribhāvitāni,||
evam eva kho, bhikkhave,||
bhāvanaṁ ananuyuttassa bhikkhuno viharato kiñcā pi evaṁ icchā uppajjeyya:|| ||

"Aho vata me anupādāya āsavehi cittaṁ vimucceyyā" ti.|| ||

Atha khavassa n'eva anupādāya āsavehi cittaṁ vimuccati.|| ||

Taṁ kissa hetu?|| ||

Abhāvitattātissa vacanīyaṁ.|| ||

Kissa abhāvitattā?|| ||

3. Bhāvanaṁ anuyuttassa bhikkhave, bhikkhuno viharato kiñ cāpi na evaṁ icchā uppajjeyya:|| ||

"Aho vata me anupādāya āsavehi cittaṁ vimucceyyā" ti.|| ||

Atha khvassa anupādāya āsavehi cittaṁ vimuccati.|| ||

Taṁ kissa hetu?|| ||

Bhāvitattātissa vacanīyaṁ.|| ||

Kissa bhāvitattā?|| ||

Seyyathā pi, bhikkhave, kukkuṭiyā aṇḍāni aṭṭha vā dasa vā dvādasa vā,||
tān'assu kukkuṭiyā sammā-adhisayitāni sammā-pariseditāni sammā-paribhāvitāni.|| ||

Kiñ cāpi tassā kukkuṭiyā na evaṁ icchā uppajjeyya:|| ||

"Aho vata me kukkuṭa-potakā pādanakha-sikhāya vā mukha-tuṇḍakena vā||
aṇḍakosaṁ padāletvā sottinā abhinibbhijjeyyun" ti.|| ||

Atha kho bhabbā'va te kukkuṭa-potakā pādanakha-sikhāya vā mukha-tuṇḍakena vā aṇḍakosaṁ padāletvā sotthinā abhinibbhijjituṁ.|| ||

Taṁ kissa hetu?|| ||

Tathā h'amuni bhikkhave kukkuṭiyā aṇḍāni sammā-adhisayitāni sammā-pariseditāni, sammā-paribhāvitāni.|| ||

Evam eva kho bhikkhave bhāvanaṁ ananuyuttassa bhikkhuno viharato kiñ cāpi na evaṁ icchā uppajjeyya:|| ||

"Aho [127] vata me anupādāya āsavehi cittaṁ vimucceyyā" ti.|| ||

Atha khavassa anupādāya āsavehi cittaṁ vimuccati.|| ||

Taṁ kissa hetu?|| ||

Bhāvitattā ti'ssa vacanīyaṁ.|| ||

Kissa bhāvitattā?|| ||

4. Seyyathā pi, bhikkhave, palagaṇḍassa vā palagaṇḍantevāsikassa vā dissante'va vāsijaṭe aṅgulipadāni dissati aṅguṭṭhapadaṁ, no ca khvāssa evaṁ ñāṇaṁ hoti:|| ||

"Ettakaṁ vā me ajja vāsijaṭassa khīṇaṁ,||
ettakaṁ hīyyo,||
ettakaṁ pare" ti.|| ||

Atha khavāssa khīṇe khīṇante'va ñāṇaṁ hoti:|| ||

Evam eva kho bhikkhave, bhāvanaṁ anuyuttassa bhikkhuno viharato kiñ cāpi na evaṁ ñāṇaṁ hoti:|| ||

"Ettakaṁ me ajja āsavānaṁ khīṇaṁ,||
ettakaṁ vā bhiyyo,||
ettakaṁ vā pare" ti.|| ||

Atha khavāssa khīṇe khīṇante'va ñāṇaṁ hoti.|| ||

Seyyathā pi, bhikkhave, sāmuddikāya nāvāya vettabandhana-badadhāya chammāsāni udake pariyādāya hemantikena thale ukkhittāya vāt'ātapaparetāni bandhanāni,||
tāni pāvussakena meghena ahippavuṭṭāni appakasiren'eva paṭippassambhanti putikāni bhavanti:||
evam eva kho, bhikkhave, bhāvanaṁ anuyuttassa bhikkhuno viharato appakasiren'eva saṁyojanāni paṭippassambhanti pūtikānī bhavantī ti.|| ||

Aṅguttara Nikāya Sattaka Nipāta Mahā Vaggo

Sutta 67

Bhāvanānuyutta Suttaṁ

Aṅguttara Nikāya
Sattaka Nipāta
Mahā Vaggo