Aṇguttara Nikāya
Sattaka Nipāta
Mahā Vagga
Sutta 70
Araka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
Bhuta-pubbaṃ bhikkhave, Arako nāma Satthā ahosi,||
titthakaro kāmesu vīta-rāgo:|| ||
Arakassa kho pana bhikkhave,||
Satthuno anekānī sāvakasatāni ahesuṃ.|| ||
Arako Satthā sāvakānaṃ evaṃ dhammaṃ deseti:|| ||
2. Appakaṃ brāhmaṇā, jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhab- [137] baṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇaṃ.|| ||
Seyyathā pi brāhmaṇā, tiṇagge ussāvabindu suriye uggacchante khippam yeva paṭivigacchati na cira-ṭ-ṭhitikaṃ hoti,||
evam eva kho brāhmaṇā, ussāvabinadupamaṃ,||
jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇaṃ.|| ||
Seyyathā pibrāhmaṇā, thulla-phusitake deve vassante udake udakabubbulaṃ khippam yeva paṭivigacchati na cira-ṭ-ṭhitikaṃ hoti,||
evam eva kho brāhmaṇā, udakabubbūpāpamaṃ,||
jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇaṃ.|| ||
Seyyathā pi brāhmaṇā, udake daṇḍarāji khīppaṃ yeva paṭivigacchati,||
na cira-ṭ-ṭhitikā hoti,||
evam eva kho brāhmaṇā, udake daṇḍarājūpamaṃ,||
jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇaṃ.|| ||
Seyyathā pi brāhmaṇā, nadī pabbateyyā dūraṇ-gamā sīgha-sotā hāra-hārīnī||
n'atthi so khaṇo vā layo vā muhutto vā||
yaṃ sā aramati,||
atha ko sā gacchat'eva vattat'eva sandat'eva,||
evam eva kho brāhmaṇā, nadīpabbateyyupamaṃ,||
jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇaṃ.|| ||
Seyyathā pi brāhmaṇā, balavā puriso jivhagge kheḷapiṇḍaṃ saññuhitvā appakasiren'eva vameyya,||
evam eva kho brāhmaṇā kheḷapiṇḍūpamaṃ,||
jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇaṃ.|| ||
Seyyathā pi brāhmaṇā, divasasaṃtatte [138] ayokaṭāhe maṃsapesī pakkhittā khippaṃ yeva paṭivigacchati,||
na cira-ṭ-ṭhitikā hoti,||
evam eva kho brāhmaṇā, maṃsasūpemaṃ,||
jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇaṃ.|| ||
Seyyathā pi brāhmaṇā, gāvī vajjhā āghātanaṃ nīyamānā yañ ñad eva pādaṃ uddharati santike'va hoti vadhassa santike'va maraṇassa,||
evam eva kho brāhmaṇa, govajjhūpamaṃ,||
jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇaṃ.|| ||
3. Tena kho pana bhikkhave samayena manussānaṃ saṭṭhivassa-sahassāni āyu-p-pamāṇaṃ ahosi.|| ||
Pañcavassasatikā kumārikā alampateyyā ahosi.|| ||
Tena kho pana bhikkhave,||
samayena manussānaṃ chaḷ eva ābādhā ahesuṃ:||
sītaṃ,||
uṇhaṃ,||
jigacchā,||
pipāsā,||
uccāro,||
passāvo.|| ||
So hi nāma bhikkhave,||
arako sattā evaṃ dīghāyukesu manussesu evaṃ ciraṭṭitikesu evaṃ appābādhesu sāvakānaṃ evaṃ dhammaṃ desessati:|| ||
"Appakaṃ brāhmaṇā,||
jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇan' ti.|| ||
Etarahi kho taṃ bhikkhave,||
sammā vadamāno vadeyya
'appakaṃ, jīvitaṃ manussānaṃ parittaṃ lahukaṃ bahu-dukkhaṃ bahupāyāsaṃ.|| ||
Mantāya boddhabbaṃ.|| ||
Kattabbaṃ kusalaṃ,||
caritabbaṃ Brahma-cariyaṃ.|| ||
N'atthi jātassa amaraṇan' ti.|| ||
Etarahi kho bhikkhave, yo ciraṃ jivati,||
so vassa-sataṃ appaṃ vā bhīyyo.|| ||
Vassasataṃ kho pana bhikkhave,||
jīvanto tīṇīyeva utusatāni jīvati:||
utusataṃ hemantānaṃ,||
utusataṃ gimhānaṃ,||
utusataṃ vassānaṃ.|| ||
Tīṇi kho pana bhikkhave,||
utusatāni jivanto dvādasa yeva māsasatāni jīvati:||
cattāri māsa satāni [139] hemantānaṃ,||
cattāri māsa satāni gimhānaṃ,||
cattāri māsa satāni vassānaṃ.|| ||
Dvādasaṃ kho, pana bhikkhave,||
māsasatāni jivanto catu-vīsatiṃ yeva addhamāsa satāni jīvati:||
aṭṭhaddha māsa satāni hemantānaṃ,||
aṭṭhaddha māsa satāni gimhānaṃ,||
aṭṭhaddha māsa satāni vassānaṃ.|| ||
Catuvisatiṃ kho pana bhikkhave,||
aṭṭhaddha māsa satāni jivanto chattiṃsaṃ yeva ratti sahassāni jīvati:||
dvādasa rattisahassāni hemantānaṃ,||
dvādasa rattisahassāni gimhānaṃ,||
dvādasa rattisahassāni gimhānaṃ,||
dvādasa rattisahassāni vasānaṃ.|| ||
Chattiṃsaṃ kho paṇa bhikkhave,||
ratti sahassāni jīvanto dvesattatiñ ñeva bhattasahassāni bhuñjati:||
catu-vīsati bhattasahassāni hemantānaṃ,||
catu-vīsati bhattasahassāni gimhānaṃ,||
catu-vīsati bhattasahassāni vassānaṃ saddhiṃ mātuthaññāya,||
saddhiṃ bhattantarāya.|| ||
Tatr'ime bhattantarāyā:||
kupito pi bhattaṃ na bhuñjati,||
dukkhito pi bhattaṃ na bhuñajati,||
vyādhito pi bhattaṃ na bhūñjati,||
uposathiko pi bhattaṃ na bhūñjati,||
alābhakena pi bhattaṃ na bhuñjati.|| ||
Iti kho bhikkhave, mayā vassa-satāyukassa manussassa āyu pi saṇkhātaṃ,||
āyu-p-pamāṇam pi saṇkhātaṃ,||
utu pi saṇkhātā,||
saṃvaccharā pi saṇkhātā,||
māsā pi saṇkhātā,||
addhamāsā pi saṇkhātā,||
ratti pi saṇkhātā,||
divā pi saṇkhātā,||
bhattā pi saṇkhātā,||
bhattantarāyā pi saṇkhātā.|| ||
4. Yaṃ bhikkhave Satthārā karaṇīyaṃ sāvakānaṃ hitesinā anukampa-kena anukampaṃ upādāya,||
kataṃ vo taṃ mayā.|| ||
Etāni bhikkhave,||
rukkha-mūlāni,||
etāni suññ-ā-gārāni.|| ||
Jhāyatha bhikkhave,||
māpamādattha,||
mā pacchā vippaṭi-sārino ahuvattha.|| ||
Ayaṃ vo amhākaṃ anusāsanī ti.|| ||
