Aṅguttara Nikāya
VIII. Aṭṭhaka Nipāta
II: Mahā Vagga

Sutta 16

Dūteyya Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[196]

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. Aṭṭhahi bhikkhave dhammehi samannāgato bhikkhu dūteyyaṁ gantum arahati.|| ||

Katamehi aṭṭhahi?|| ||

3. Idha, bhikkhave, bhikkhu sotā ca hoti sāvetā ca,||
uggahetā ca dhāretā ca,||
viññātā ca viññāpetā ca,||
kusalo ca sahit-ā-sahitassa,||
no ca kalahakārako.|| ||

Imehi kho bhikkhave, aṭṭhahi dhammehi samannāgato bhikkhu duteyyaṁ gantum arahati.|| ||

4. Aṭṭhahi bhikkhave dhammehi samannāgato Sāriputto duteyyaṁ gantum arahati.|| ||

Katamehi aṭṭhahi?|| ||

Idha, bhikkhave, Sāriputto sotā ca hoti sāvetā ca,||
uggahetā ca dhāretā ca,||
viññātā ca viññāpetā ca,||
kusalo ca sahit-ā-sahitassa,||
no ca kalahakārako.|| ||

Imehi kho bhikkhave aṭṭhahi dhammehi samannāgato Sāriputto duteyyaṁ gantum arahatī ti.|| ||

 

---

 

Yo ve na byadhati patvā parisaṁ uggahavā-diniṁ||
Na ca hāpeti vacanaṁ na ca cchādeti sāsanaṁ,||
Asandiṭṭhañ ca bhaṇati pucchito na ca kuppati,||
Sa ve tādisako bhikkhu duteyyaṁ gantum arahatī ti.|| ||