Aṅguttara Nikāya
VIII. Aṭṭhaka Nipāta
IV. Dāna Vagga

Sutta 34

Khett'Upama Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[237]

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

Aṭṭh'aṅga-samannāgate bhikkhave, khette bījaṁ vuttaṁ na maha-p-phalaṁ hoti||
na maha-s-sādaṁ||
na phātiyeyyaṁ.|| ||

Kathaṁ aṭṭh'aṅga-samannāgate?|| ||

2. Idha, bhikkhave, khettaṁ unnāmaninnāmī ca hoti,||
pāsāṇa-sakkharillañ ca hoti,||
usarañca hoti,||
na ca gambhīrasītaṁ hoti,||
aa āya-sampannaṁ hoti,||
na apāya-sampannaṁ hoti,||
na mātikā-sampannaṁ hoti,||
na mariyādā-sampannaṁ hoti.|| ||

Evaṁ aṭṭh'aṅga-samannāgate bhikkhave khette bījaṁ vuttaṁ na maha-p-phalaṁ hoti,||
na maha-s-sādaṁ,||
na phātiyeyyaṁ.|| ||

Evam eva kho bhikkhave aṭṭh'aṅga-samannāgatesu samaṇa-brāhmaṇesu dānaṁ dinnaṁ na maha-p-phalaṁ hoti,||
na mahā-nisaṁsaṁ||
na mahā-jutikaṁ||
na mahā-vipphāraṁ.|| ||

Kathaṁ aṭṭh'aṅga-samannāgatesu?|| ||

3. Idha, bhikkhave, samaṇa-brāhmaṇā,||
micchā-diṭṭhikā honti||
micchā-saṅkappā,||
micchā-vācā,||
micchā-kammantā,||
micchā-ājīvā,||
micchā-vāyāmā,||
micchā-satino,||
micchā-samādhino.|| ||

Evaṁ aṭṭh'aṅga-samannāgatesu bhikkhave samaṇa-brāhmaṇesu dānaṁ dinnaṁ na maha-p-phalaṁ hoti,||
na mahā-nisaṁsaṁ,||
na mahā-jutikaṁ,||
na mahā-vipphāraṁ.|| ||

 

---

 

4. Aṭṭh'aṅga-samannāgate bhikkhave, khette bījaṁ vuttaṁ maha-p-phalaṁ hoti,||
maha-s-sādaṁ phātiyeyyaṁ.|| ||

Kathaṁ aṭṭh'aṅga-samannāgate?|| ||

5. Idha, bhikkhave, khettaṁ anunnāmaninnāmī ca hoti,||
apāsāṇa-sakkharillañ ca hoti,||
anusarañ ca hoti,||
gambhī- [238] rasītaṁ hoti,||
āya-sampannaṁ hoti,||
apāya-sampannaṁ hoti,||
mātikā-sampannaṁ hoti,||
mariyādā-sampannaṁ hoti.|| ||

Evaṁ aṭṭh'aṅga-samannāgate bhikkhave, khette bījaṁ vuttaṁ maha-p-phalaṁ hoti,||
maha-s-sādaṁ phātiyeyyaṁ.|| ||

Evam eva kho bhikkhave, aṭṭh'aṅga-samannāgatesu samaṇa-brāhmaṇesu dānaṁ dinnaṁ maha-p-phalaṁ hoti,||
mahā-nisaṁsaṁ,||
mahā-jutikaṁ,||
mahāvipthāraṁ.|| ||

Kathaṁ aṭṭh'aṅga-samannāgatesu?|| ||

6. Idha bhikkhave, samaṇa-brāhmaṇā||
sammā-diṭṭhikā honti,||
sammā-saṅkappā,||
sammā-vācā,||
sammā-kammantā,||
sammā-ājīvā,||
sammā-vāyāmā,||
sammā-satino,||
sammā-samādhino.|| ||

Evaṁ aṭṭh'aṅga-samannāgatesu bhikkhave, samaṇa-brāhmaṇesu dānaṁ dinnaṁ maha-p-phalaṁ hoti,||
mahā-nisaṁsaṁ,||
mahā-jutikaṁ,||
mahā-vipphāranti.|| ||

Yathā pi khette sampanne - pavuttā bījasampadā,||
Deve sampādayantamhi - hoti dhaññassa sampadā|| ||

Anīti sampadā hoti - virūḷhī bhavati sampadā,||
Vepullaṁ sampadā hoti - phalaṁ ve hoti sampadā.|| ||

Evaṁ sampanna-sīlesu - dinnā bhojana-sampadā,||
Sampadānaṁ upaneti - sampannaṁ hi'ssa taṁ kataṁ|| ||

Tasmā sampadam ākaṅkhī - sampann'attho'dha puggalo,||
Sampanna-paññe sevetha - evaṁ ijjhanti sampadā.|| ||

Vijjā-caraṇa-sampanno - laddhā cittassa sampadaṁ,||
Karoti kamma-sampadaṁ - labhati c'attha-sampadaṁ.|| ||

Lokaṁ ñatvā yathā-bhūtaṁ - pappuyya diṭṭhi-sampadaṁ,||
Magga-sampadam āgamma - yāti sampanna-mānaso.|| ||

[239]Odhunitvā malaṁ sabbaṁ - patvā Nibbāna sampadaṁ,||
Muccati sabba-dukkhehi - sā hoti sabba-sampadā.|| ||