Aṅguttara Nikāya
VIII. Aṭṭhaka Nipāta
VI. Gotamī Vagga aka Sa-ādhāna-Vagga

Sutta 52

Bhikkhun-Ovādaka Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[279]

[1][pts] Evaṁ me sutaṁ:|| ||

Ekaṁ samayaṁ Bhagavā Vesāliyaṁ viharati Mahāvane Kūṭāgāra-sālāyaṁ.|| ||

Atha kho āyasmā Ānando yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Ānando Bhagavantaṁ etad avoca:|| ||

'Kati hi nū kho bhante,||
dhammehi samannāgato bhikkhu bhikkhun-ovādako sammantitabbo' ti?|| ||

2. Aṭṭhahi kho Ānanda, dhammehi samannāgato bhikkhu bhikkhun-ovādako sammannitabbo.|| ||

Katamehi aṭṭhahi?|| ||

■

3. Idha, Ānanda, sīlavā ca hoti Pātimokkha-saṁvara-saṁvuto viharati,||
ācāra-gocara-sampanno aṇumattesu vajjesu bhaya-dassāvī samādāya sikkhati sikkhā-padesu.|| ||

■

4. Bahu-s-suto hoti suta-dharo suta-sannicayo,||
ye te dhammā ādi-kalyāṇā majjhe-kalyāṇā pariyosāna-kalyāṇā sātthaṁ savyañ janaṁ kevala-paripuṇṇaṁ parisuddhaṁ Brahma-cariyaṁ abhivadanti,||
tathā-rūpassa dhammā bahu-s-sutā honti.|| ||

Dhatā vacasā paricitā manas-ā-nupekkhitā diṭṭhiyā suppaṭi-viddhā.|| ||

■

5. Ubhayāni kho pan'assa Pātimokkhāni vitthārena svāgatāni honti su-vibhattāni su-p-pavattīni su-vinicchitāni suttaso anuvyañjanaso.|| ||

■

6. Kalyāṇa-vāco hoti kalāṇa-vākkaraṇo poriya vācaya samannāgato vissaṭṭhāya aneḷa-gaḷāya atthassa viññpaniyā.|| ||

■

7. Paṭibalo [280] hoti bhikkhunī-Saṅghassa dhammiyā kathāya sanda-s-setuṁ sam-ā-dapetuṁ samuttejetuṁ sampahaṁsetuṁ.|| ||

■

8. Yebhuyyena bhikkhunīnaṁ piyo hoti manāpo.|| ||

9. Na kho pan'etaṁ Bhagavantaṁ uddīsaṁ pabba-jitāya kāsāya-vavattha-nivasanāya garu-dhammaṁ ajjhāpann-u-pubbo hoti.|| ||

■

10. Vīsati-vasso vā hoti atireka-vīsati vasso vā.|| ||

Imehi kho Ānanda, aṭṭhahi dhammehi samannāgato bhikkhu bhikkhun-ovādako sammantitabbo ti.|| ||