Aṅguttara Nikāya
VIII. Atthaka Nipāta
IX. Sati-Vagga

Sutta 83

Kiṁ Mūlaka? Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

 

[1][pts][olds] Evaṁ me sutaṁ:|| ||

Sāvatthi nidānaṁ.|| ||

2. Sace bhikkhave, añña-titthiyā paribbājakā evaṁ puccheyyuṁ:|| ||

'Kiṁmūlakā āvuso, sabbe dhammā,||
kiṁ-sambhavā sabbe dhamma,||
kiṁ-samudayā sabbe dhammā,||
kiṁ-sam-osaraṇā sabbe dhammā,||
kiṁ-pamukhā sabbe dhammā||
kiṁ-ādhipateyyā sabbe dhammā,||
kiṁ-uttarā sabbe dhammā,||
kiṁ-sārā sabbe dhammā' ti?|| ||

Evaṁ puṭṭhā tumhe bhikkhave,||
tesaṁ añña-titthiyānaṁ paribbājakānaṁ kinti vyākareyyāthā ti?|| ||

3. Bhagava mūlakā no bhante,||
dhammā Bhagavannettikā||
Bhagavaṁ paṭisaraṇā.|| ||

Sādhu bhante, Bhagavantaṁ yeva paṭibhātu etassa bhāsitassa attho.|| ||

Bhagavato sutvā bhikkhu dhāressanti ti.|| ||

Tena hi bhikkhave, suṇātha.|| ||

Sādhukaṁ manasi-karotha||
bhāsissāmi ti.|| ||

"Evaṁ bhante" ti kho te bhikkhu Bhagavato paccassosuṁ.|| ||

Bhagavā etad avoca:|| ||

4. Sace bhikkhave, añña-titthīyā paribbājakā evaṁ puccheyyuṁ:|| ||

'Kiṁmūlakā āvuso, sabbe dhammā,||
kiṁ-sambhavā sabbe dhamma,||
kiṁ-samudayā sabbe dhammā,||
kiṁ-sam-osaraṇā sabbe dhammā,||
kiṁ-pamukhā sabbe dhammā||
kiṁ-ādhipateyyā sabbe dhammā,||
kiṁ-uttarā sabbe dhammā,||
kiṁ-sārā sabbe dhammā' ti?|| ||

Evaṁ puṭṭhā tumhe bhikkhave,||
tesaṁ añña-titthiyānaṁ paribbājakānaṁ evaṁ vyākareyyātha:|| ||

'Chanda-mūlakā āvuso, sabbe dhammā,||
mana-sikāra-sambhavā sabbe dhammā,||
phassa-samudayā sabbe dhammā,||
vedanā sam-osaraṇā sabbe dhammā,||
samādhi-pamukhā sabbe dhammā,||
sat'ādhipateyyā sabbe dhammā,||
paññuttarā sabbe dhammā,||
vimutti-sārā sabbe dhammā' ti.|| ||

Evaṁ phuṭṭhā tumhe bhikkhave,||
tesaṁ añña-titthiyānaṁ paribbājakānaṁ evaṁ vyākareyyā thā ti.|| ||