Aṅguttara Nikāya
VIII. Navaka Nipāta
III. Satt'Āvāsa Vagga

Sutta 24

Satt'Āvāsa Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[401]

[1][pts][than] Evaṁ me sutaṁ ekaṁ samayaṁ Bhagavā Sāvātthiyaṁ viharati Jetavane Anāthapiṇḍikassa ārāme.|| ||

Nava bhikkhave, taṇhā mūlake dhamme desessāmi.|| ||

Taṁ suṇātha, sādhukaṁ manasi-karotha, bhāsissāmī" ti.|| ||

Evaṁ bhante ti kho te bhikkhu Bhagavato paccassosuṁ.|| ||

Bhagavā etad avoca:|| ||

Nava ime bhikkhave, satt'āvāsā.|| ||

Katame nava?|| ||

2. Santi, bhikkhave, sattā nānatta-kāyā nānatta saññino,||
seyyathā pi manussā ekacce ca devā ekacce ca vinipātikā.|| ||

Ayaṁ paṭhamo satt'āvāso.|| ||

■

3. Santi, bhikkhave, sattā nānatta-kāyā ekattasaññino||
seyyathā pi devā Brahma-kāyikā paṭhamāhi nibbattā.|| ||

Ayaṁ dutiyo satt'āvāso.|| ||

■

4. Santi, bhikkhave, sattā ekattakāyā nānatta-saññino||
seyyathā pi devā Ābhāssarā.|| ||

Ayaṁ tatiyo satt'āvāso.|| ||

■

5. Santi, bhikkhave, sattā ekattakāyā ekattasaññino||
seyyathā pi devā Subhakiṇṇā.|| ||

Ayaṁ catuttho satt'āvāso.|| ||

■

6. Santi, bhikkhave, sattā asaññino appaṭisaṁvedino,||
seyyathā pi devā Asaññasattā.|| ||

Ayaṁ pañcamo satt'āvāso.|| ||

■

7. Santi, bhikkhave, sattā sabbaso rūpa-saññānaṁ samatikkamā||
paṭigha-saññānaṁ atthaṅgamā||
nānatta-saññānaṁ amanasikārā||
'anatto ākāso' ti||
Ākāsānañ-c'āyatanūpagā.|| ||

Ayaṁ chaṭṭho satt'āvāso.|| ||

■

8. Santi, bhikkhave, sattā sabbaso Ākāsanañ-c'āyatanaṁ samatikkamma||
'Anantaṁ viññāṇan' ti||
Viññāṇañ-c'āyatanūpagā.|| ||

Ayaṁ sattamo satt'āvāso.|| ||

■

9. Santi, bhikkhave, sattā sabbaso Viññāṇañ-c'āyatanaṁ samatikkamma||
'n'atthi kiñci' ti||
Ākiñ caññ'āyatanūpagā.|| ||

Ayaṁ aṭṭhamo satt'āvāso.|| ||

■

10. Santi, bhikkhave, sattā sabbaso Ākiñcaññ'āyatanaṁ samatikkamma||
N'eva-saññā-nāsaññāyatanūpagā.|| ||

Ayaṁ navamo satt'āvāso.|| ||

Ime kho bhikkhave nava satt'āvāsā ti.|| ||