Aṅguttara Nikāya
VIII. Navaka Nipāta
IV. Mahā Vagga

Sutta 35

Gāvī-Upamā Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[418]

[1][pts][than] Evaṁ me sutaṁ.|| ||

Ekaṁ samayaṁ Bhagavā Sāvātthiyaṁ viharati Jetavane Anāthapiṇḍikassa ārāme,||
tatra kho Bhagavā bhikkhu āmantesi.|| ||

"Bhikkhavo" ti.|| ||

"Bhadante" ti te bhikkhu Bhagavato paccassosuṁ Bhagavā etad avoca:|| ||

"Seyyathā pi, bhikkhave,||
gāvī pabbateyyā bālā avyatta akhett-a-ññū akusalā visame pabbate carituṁ.|| ||

Tassā evam assa:|| ||

'Yan nūn-ā-haṁ agata-pubbañ c'eva disaṁ gaccheyyaṁ,||
akhāditapubbāni ca tiṇāni khādeyyaṁ,||
apītapubbāni ca pānīyāni piveyyan' ti?|| ||

Sā purimaṁ pādaṁ na suppati-ṭ-ṭhitaṁ patiṭṭhāpetvā pacchimaṁ pādaṁ uddhareyya,||
sā na c'eva agata-pubbaṁ disaṁ gaccheyya,||
na ca akhāditapubbāni tiṇāni khādeyya,||
na ca apitapubbāni pānīyāni piveyya;||
yasmiṁ c'assā pade ṭhitāya evam assa:|| ||

'Yan nūn-ā-haṁ agata-pubbañ c'eva disaṁ gaccheyyaṁ,||
akhāditapubbāni ca tiṇāni khādeyyaṁ,||
apītapubbāni ce pānīyāni piveyyan' ti,

tañ ca padesaṁ na sotthinā paccāgaccheyya.|| ||

Taṁ kissa hetu?|| ||

Tathā hi sā bhikkhave,||
gāvī pabbateyyā bālā avyattā akhett-a-ññū akusalā visame pabbate carituṁ.|| ||

Evam eva kho bhikkhave idh'ekacco bhikkhu||
bālo avyatto akhett-a-ññū akusalo vivicc'eva kāmehi||
vivicca akusalehi dhammehi||
sa-vitakkaṁ sa-vicāraṁ viveka-jaṁ pīti-sukhaṁ||
paṭhamaṁ jhānaṁ upasampajja viharituṁ.|| ||

So taṁ nimittaṁ na āsevati,||
na bhāveti,||
na bahulī-karoti,||
na svādhiṭṭhitaṁ adhiṭṭhāti.|| ||

Tassa evaṁ hoti:|| ||

'Yan nūn-ā-haṁ vitakka-vicārānaṁ vūpasamā||
ajjhattaṁ sampasādanaṁ cetaso ekodi-bhāvaṁ||
avitakkaṁ avicāraṁ samādhi-jaṁ pīti-sukhaṁ||
dutiyaṁ-jhānaṁ upasampajja vihareyyan' ti.|| ||

So na sakkoti vitakka-vicārānaṁ vūpasamā||
ajjhattaṁ sampasādanaṁ cetaso ekodi-bhāvaṁ||
avitakkaṁ avicāraṁ samādhi-jaṁ pīti-sukhaṁ||
dutiyaṁ-jhānaṁ [419] upasampajja viharatuṁ.|| ||

Tassa evaṁ hoti:|| ||

'Yan nun-ā-haṁ vivicc'eva kāmehi||
vivicca akusalehi dhammehi||
sa-vitakkaṁ sa-vicāraṁ viveka-jaṁ pīti-sukhaṁ||
paṭhamaṁ-jhānaṁ upasampajja vihareyyan' ti.|| ||

So na Sakkoti vivicc'eva kāmehi||
vivicca akusalehi dhammehi||
sa-vitakkaṁ sa-vicāraṁ viveka-jaṁ pīti-sukhaṁ||
paṭhamaṁ-jhānaṁ upasampajja viharituṁ.|| ||

Ayaṁ vuccati bhikkhave,||
bhikkhu ubhato bhaṭṭho ubhato parihīno||
seyyathā pi sā gāvī pabbateyyā bālā avyattā akhett-a-ññū akusalā visame pabbate carituṁ.|| ||

2. Seyyathā pi, bhikkhave, gāvī pabbateyyā paṇḍitā vyattā khettaññū kusalā visame pabbate carituṁ.|| ||

Tassā evam assa:|| ||

'Yan nūn-ā-haṁ agata-pubbañ c'eva disaṁ gaccheyyaṁ,||
akhāditapubbāni ca tiṇāni khādeyyaṁ,||
apitapubbāni ca pānīyāni piveyyan' ti?|| ||

Sā purimaṁ pādaṁ suppati-ṭ-ṭhitaṁ patiṭṭhāpetvā pacchimaṁ pādaṁ uddhareyya,||
sā agata-pubbañ c'eva disaṁ gaccheyya,||
akhāditapubbāni ca tiṇāni khādeyya,||
apitapubbāni ca pānīyāni piveyya||
yasmiṁ c'assā pade ṭhitāya evam assa:|| ||

'Yan nūn-ā-haṁ agata-pubbañ c'eva disaṁ gaccheyyaṁ,||
akhāditapubbāni ca tiṇāni khādeyyaṁ,||
apitapubbāni ca pānīyāni piveyyan' ti.|| ||

Tañ ca padesaṁ sotthinā paccāgaccheyya.|| ||

Taṁ kissa hetu?|| ||

Tathā hi sā bhikkhave gāvī pabbateyyā panḍitā vyattā khettaññu kusalā visame pabbate carituṁ.|| ||

Evam eva kho bhikkhave idh'ekacco bhikkhu paṇḍito vyatto khettaññu kusalo vivicc'eva kāmehi||
vivicca akusalehi dhammehi||
sa-vitakkaṁ sa-vicāraṁ viveka-jaṁ pīti-sukhaṁ||
paṭhamaṁ-jhānaṁ upasampajja viharituṁ.|| ||

So taṁ nimittaṁ āsevati bhāveti bahulī-karoti svādhiṭṭhitaṁ adhiṭṭhāti.|| ||

Tassa evaṁ hoti:|| ||

'Vitakka-vicārānaṁ vūpasamā||
ajjhattaṁ sampasādanaṁ cetaso ekodi-bhāvaṁ||
avitakkaṁ avicāraṁ samādhi-jaṁ pīti-sukhaṁ||
dutiyaṁ-jhānaṁ upasampajja vihareyyan' ti.|| ||

So dutiyaṁ jhānaṁ anabhihiṁsamāno||
vitakka-vicārānaṁ vūpasamā||
ajjhattaṁ sampasādanaṁ cetaso ekodi-bhāvaṁ||
avitakkaṁ avicāraṁ samādhi-jaṁ pīti-sukhaṁ||
dutiyaṁ-jhānaṁ upasampajja viharati.|| ||

So taṁ nimittaṁ āsevati bhāveti bahulī-karoti svādiṭṭhitaṁ adhiṭṭhāti.|| ||

Tassa evaṁ hoti:|| ||

'Yan nūnāham pītiyā ca virāgā [420] upekkhako ca viharati,||
sato ca sampajāno sukhañ ca kāyena paṭisaṁvedeti,||
yantaṁ ariyā āvikkhanti:||
'Upekkhako satimā sukha-vihārī'||
ti taṁ tatiyaṁ-jhānaṁ upasampajja vihareyyan' ti;|| ||

So tatiyaṁm jhānam anabhihiṁsamāno||
pītiyā ca virāgā upekkhako ca viharati,||
sato ca sampajāno sukhañ ca kāyena paṭisaṁvedeti,||
yantaṁ ariyā āvikkhanti:||
'Upekkhako satimā sukha-vihārī'||
ti taṁ tatiyaṁ-jhānaṁ upasampajja viharati.|| ||

So taṁ nimittaṁ āsevati bhāveti bahulī-karoti svādiṭṭhitaṁ adhiṭṭhāti.|| ||

Tassa evaṁ hoti:|| ||

'Yan nūnāham sukhassa ca pahānā dukkhassa ca pahānā pubb'eva somanassa-domanassānaṁ atthaṅgamā adukkha-m-asukhaṁ upekkhā-sati-pārisuddhiṁ catutthaṁ-jhānaṁ upasampajja vihareyyan' ti;|| ||

So catutthaṁ-jhānaṁ anabhihiṁsamāno||
sukhassa ca pahānā dukkhassa ca pahānā pubb'eva somanassa-domanassānaṁ atthaṅgamā adukkha-m-asukhaṁ upekkhā-sati-pārisuddhiṁ catutthaṁ-jhānaṁ upasampajja upasampajja viharati.|| ||

So taṁ nimittaṁ āsevati bhāveti bahulī-karoti svādiṭṭhitaṁ adhiṭṭhāti.|| ||

Tassa evaṁ hoti:|| ||

'Yan nūnāham sabbaso rūpa-saññānaṁ samatikkamā paṭigha-saññānaṁ atthaṅgamā nānatta-saññānaṁ amana-sikārā 'anatto ākāso' ti Ākāsanañ-c'āyatanaṁ upasampajja vihareyyan' ti;|| ||

So Ākāsanañ-c'āyatanaṁ anabhihiṁsamāno||
sabbaso rūpa-saññānaṁ samatikkamā paṭigha-saññānaṁ atthaṅgamā nānatta-saññānaṁ amana-sikārā 'anatto ākāso' ti Ākāsanañ-c'āyatanaṁ upasampajja viharati.|| ||

So taṁ nimittaṁ āsevati bhāveti bahulī-karoti svādiṭṭhitaṁ adhiṭṭhāti.|| ||

Tassa evaṁ hoti:|| ||

'Yan nūnāham sabbaso Ākāsanañ-c'āyatanaṁ samatikkamma 'Anantaṁ viññāṇan' ti Viññāṇañ-c'āyatanaṁ upasampajja vihareyyan' ti;|| ||

So Viññāṇañ-c'āyatanaṁ anabhihiṁsamāno||
sabbaso Ākāsanañ-c'āyatanaṁ samatikkamma 'Anantaṁ viññāṇan' ti Viññāṇañ-c'āyatanaṁ upasampajja viharati.|| ||

So taṁ nimittaṁ āsevati bhāveti bahulī-karoti svādiṭṭhitaṁ adhiṭṭhāti.|| ||

Tassa evaṁ hoti:|| ||

'Yan nūnāham sabbaso Viññāṇañ-c'āyatanaṁ samatikkamma 'n'atthi kiñci' ti Ākiñcaññ'āyatanaṁ upasampajja vihareyyan' ti;|| ||

So Ākiñcaññ'āyatanaṁ anabhihiṁsamāno||
sabbaso Viññāṇañ-c'āyatanaṁ samatikkamma 'n'atthi kiñci' ti Ākiñcaññ'āyatanaṁ upasampajja viharati.|| ||

So taṁ nimittaṁ āsevati bhāveti bahulī-karoti svādiṭṭhitaṁ adhiṭṭhāti.|| ||

Tassa evaṁ hoti:|| ||

'Yan nūnāham sabbaso Ākiñcaññ'āyatanaṁ samatikkamma N'eva-saññā-nā-saññ'āyatanaṁ upasampajja vihareyyan' ti;|| ||

So N'eva-saññā-nā-saññ'āyatanaṁ anabhihiṁsamāno||
sabbaso Ākiñcaññ'āyatanaṁ samatikkamma N'eva-saññā-nā-saññ'āyatanaṁ upasampajja viharati.|| ||

So taṁ nimittaṁ āsevati bhāveti bahulī- [421] karoti svādiṭṭhitaṁ adhiṭṭhāti.|| ||

Tassa evaṁ hoti:|| ||

'Yan nūnāham sabbaso N'eva-saññā-nā-saññ'āyatanaṁ samatikkamma saññā-vedayita nirodhaṁ upasampajja vihareyyan' ti;|| ||

So saññā-vedayita nirodhaṁ anabhihiṁsamāno||
sabbaso N'eva-saññā-nā-saññ'āyatanaṁ samatikkamma saññā-vedayita nirodhaṁ upasampajja viharati.|| ||

3. Yato kho bhikkhave bhikkhu taṁ tad eva samāpattiṁ samāpajjatī pi vuṭṭhāti pi,||
tassa muduṁ cittaṁ hoti kammaññaṁ,||
mudunā cittena kammaññena appamāṇo samādhi hoti subhāvito.|| ||

So appamāṇena samādhinā subhāvitena yassa yassa abhiññā sacchi-karaṇīyassa dhammassa cittaṁ abhininnāmeti abhiññā sacchi-kiriyāya.|| ||