Aṇguttara Nikāya
VIII. Navaka Nipāta
IV. Mahā Vagga
Sutta 39
Dev-ā-sura-Saṇgāma
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than] Evaṃ me sutaṃ:|| ||
Sāvatthi nidānaṃ.|| ||
Bhūta-pubbaṃ bhikkhave,||
dev-ā-sura-saṇgāmo samūp'abbuḷho ahosi.|| ||
Tasmiṃ kho pana bhikkhave,||
saṇgāme Asurā jiniṃsu devā parājiyiṃsu.|| ||
Parājitā ca bhikkhave devā apayaṃsveva,||
uttarena mukhā abhiyaṃsu Asurā.|| ||
Atha kho bhikkhave,||
devānaṃ etad ahosi:|| ||
'Abhiyant eva kho Asurā yan nūna mayaṃ dutiyam pi asurehi saṇgāmemayyāmā' ti.|| ||
■
2. Dutiyam pi kho bhikkhave,||
devā asurehi saṇgāmesuṃ.|| ||
Dutiyam pi kho bhikkhave,||
Asurā va jiniṃsu,||
devā parājiyiṃsu.|| ||
Parājitā ca bhikkhave devā bhītā apayaṃsveva uttarenābhimukhā abhiyaṃsu Asurā.|| ||
Atha kho bhikkhave devānaṃ etad ahosi:|| ||
'Abhiyant'eva kho Asurā,||
yan nūna mayaṃ tatiyam pi asurehi saṇgāmeyyāmā' ti.|| ||
■
3. Tatiyam pi kho bhikkhave,||
devā asurehi saṇgāmesuṃ.|| ||
Tatiyam pi kho bhikkhave,||
Asurā va jiniṃsu,||
devā parājiyiṃsu.|| ||
Parājitā ca bhikkhave devā bhītā devapuraṃ yeva pavisiṃsu.|| ||
Devapuragatānañ ca pana bhikkhave,||
devānaṃ etad ahosi:|| ||
'Biruttānagatena kho dāni mahaṃ [433] etarahi attanā viharāma akaraṇīyā asurehī' ti.|| ||
Asurānam pi bhikkhave,||
etad ahosi:|| ||
'Bhīru-t-tāna-gatena kho dāni devā etarahi attanā viharanti akaraṇīyā amhehī' ti.|| ||
§
4. Bhuta-pubbaṃ bhikkhave,||
dev-ā-sura-saṇgāmo samūp'abbuḷho ahosi.|| ||
Tasmiṃ kho pana bhikkhave,||
saṇgāme devā jīniṃsu,||
Asurā parājiyisu.|| ||
Parājitā ca bhikkhave Asurā apayaṃsveva dakkhiṇenābhimukhā abhiyaṃsu devā.|| ||
Atha kho bhikkhave,||
Asurānaṃ etad ahosi:|| ||
'Abhiyant'eva kho devā,||
yan nūna mayaṃ dutiyam pi devehi saṇgāmeyyāmā' ti.|| ||
■
5. Dutiyam pi kho bhikkhave,||
Asurā devehi saṇgāmesuṃ.|| ||
Dutiyam pi kho bhikkave,||
devā'va jiniṃsu,||
Asurā parājiṃsu.|| ||
Parājitā ca bhikkhave, Asurā apayaṃsveva,||
dakkhiṇenābhimukhā abhiyaṃsu devā.|| ||
Atha kho bhikkhave Asurānaṃ etad ahosi:|| ||
"Abhiyant'eva kho devā,||
yan nūna mayaṃ tatiyam pi devehi saṇgāmeyyāmā ti.|| ||
■
6. Tatiyam pi kho bhikkhave,||
Asurā devehi saṇgāmesuṃ|| ||
Tatiyam pi kho bhikkhave, devā va jiniṃsu,||
Asurā parājiyiṃsu.|| ||
Parājitā ca bhikkhave,||
Asurā bhītā Asurapuraṃ yeva pavisiṃsu,||
Asurapuragatānañ ca pana bhikkhave,||
Asurānaṃ etad ahosi:|| ||
'Bhīru-t-tāna-gatena kho dāni mayaṃ etarahi attanā viharāma akaraṇiyā devehī' ti.|| ||
Devānām pi bhikkhave, etad ahosi:|| ||
'Bhīru-t-tāna-gatena kho dāni Asurā etarahi attanā viharanti akaraṇiyā amhehī' ti.|| ||
7. Evam eva kho bhikkhave,||
yasmiṃ samaye bhikkhu
vivicc'eva kāmehi||
vivicca akusalehi dhammehi||
sa-vitakkaṃ sa-vicāraṃ||
viveka-jaṃ pīti-sukhaṃ||
paṭhamaṃ-jhānaṃ upasampajja viharati.|| ||
Tasmiṃ bhikkhave samaye bhikkhussa evaṃ hoti:|| ||
"Bhīru-t-tāna-gatena kho dānāhaṃ etarahi attanā viharāmi akaraṇīyo Mārassā' ti.|| ||
Mārassa pi bhikkhave pāpimato evaṃ hoti:|| ||
'Bhīru-t-tāna-gatena kho dāni bhikkhu etarahi attanā [434] viharati akaraṇīyo mayhan' ti.|| ||
Yasmiṃ bhikkhave samaye bhikkhu
vitakka-vicārānaṃ vūpasamā||
ajjhattaṃ sampasādanaṃ||
cetaso ekodi-bhāvaṃ||
avitakkaṃ avicāraṃ||
samādhi-jaṃ pīti-sukhaṃ||
dutiyaṃ-jhānaṃ upasampajja viharati.|| ||
Tasmiṃ bhikkhave samaye bhikkhussa evaṃ hoti:|| ||
"Bhīru-t-tāna-gatena kho dānāhaṃ etarahi attanā viharāmi akaraṇīyo Mārassā' ti.|| ||
Mārassa pi bhikkhave pāpimato evaṃ hoti:|| ||
'Bhīru-t-tāna-gatena kho dāni bhikkhu etarahi attanā viharati akaraṇīyo mayhan' ti.|| ||
Pītiyā ca virāgā upekkhako ca||
viharati sato ca sampajāno,||
sukhañ ca kāyena paṭisaṃvedeti,||
yaṃ taṃ ariyā āvikkhanti upekkhako satimā sukha-vihārī ti,||
tatiyaṃ-jhānaṃ upasampajja viharati.|| ||
Tasmiṃ bhikkhave samaye bhikkhussa evaṃ hoti:|| ||
"Bhīru-t-tāna-gatena kho dānāhaṃ etarahi attanā viharāmi akaraṇīyo Mārassā' ti.|| ||
Mārassa pi bhikkhave pāpimato evaṃ hoti:|| ||
'Bhīru-t-tāna-gatena kho dāni bhikkhu etarahi attanā viharati akaraṇīyo mayhan' ti.|| ||
Sukhassa ca pahānā dukkhassa ca pahānā||
pubb'eva somanassa-domanassānaṃ atthaṇgamā||
adukkha-ṃ-asukhaṃ upekkhā-sati-pārisuddhiṃ||
catutthaṃ-jhānaṃ upasampajja viharati.|| ||
Tasmiṃ bhikkhave,||
samaye bhikkhussa evaṃ hoti:|| ||
'Bhīru-t-tāna-gatena kho dānāhaṃ etarahi attanā viharāmi akaraṇīye Mārassā' ti.|| ||
Mārassā pi bhikkhave pāpimato evaṃ hoti:|| ||
'Bhīru-t-tāna-gatena kho dāni bhikkhu etarahi attanā viharati akaraṇīyo mayhan' ti.|| ||
[9] Yasmiṃ bhikkhave samaye bhikkhu
sabbaso rūpa-saññānaṃ samatikkamā paṭigasaññānaṃ atthaṇgamā nānatta-saññānaṃ amanasikārā 'Ananto ākāso' ti,||
Ākāsanañ-c'āyatanaṃ upasampajja viharati.|| ||
Ayaṃ vuccati bhikkhave,||
bhikkhu antam akāsi Māraṃ apadaṃ vadhitvā Māra-cakkhuṃ adassanaṃ gato pāpimato.|| ||
[10] Yasmiṃ bhikkhave, samaye bhikkhu sabbaso Ākāsanañ-c'āyatanaṃ samatikkamma||
'Anantaṃ viññāṇan' ti||
Viññāṇañ-c'āyatanaṃ upasampajja viharati.|| ||
Ayaṃ vuccati bhikkhave,||
bhikkhu antam akāsi Māraṃ apadaṃ vadhitvā Māra-cakkhuṃ adassanaṃ gato pāpimato.|| ||
Puna ca paraṃ bhikkhave,||
bhikkhu sabbaso Viññāṇañ-c'āyatanaṃ samatikkamma||
'N'atthi kiñcī' ti||
Ākiñcaññ'āyatanaṃ upasampajja viharati.|| ||
Ayaṃ vuccati bhikkhave,||
bhikkhu antam akāsi Māraṃ apadaṃ vadhitvā Māra-cakkhuṃ adassanaṃ gato pāpimato.|| ||
Puna ca paraṃ bhikkhave,||
bhikkhu sabbaso Ākiñcaññ'āyatanaṃ samatikkamma||
N'eva-saññā-nā-saññ'āyatanaṃ upasampajja viharati.|| ||
Ayaṃ vuccati bhikkhave,||
bhikkhu antam akāsi Māraṃ apadaṃ vadhitvā Māra-cakkhuṃ adassanaṃ gato pāpimato.|| ||
Puna ca paraṃ bhikkhave,||
bhikkhu sabbaso N'eva-saññā-nā-saññ'āyatanaṃ samatikkamma||
saññā-vedayita-nirodhaṃ upasampajja viharati.|| ||
Paññāya c'assa disvā āsavā parikkhiṇā honti:|| ||
Ayaṃ vuccati bhikkhave, bhikkhu antaṃ akāsi Māraṃ apadaṃ vadhitvā Māra-cakkhuṃ adassanaṃ gato pāpimato tiṇṇo loke visattikan ti.|| ||
