Paṭhama Ānanda Saṇgha-Bheda Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh] Evaṃ me sutaṃ:|| ||

Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||

Atha kho āyasmā Ānanda yena Bhagavā ten'upasaṇkami.|| ||

Upasaṃkamitvā Bhagavantaṃ abhivādetvā eka-m-antaṃ nisīdi.|| ||

Eka-m-antaṃ nisinno kho āyasmā Ānanda Bhagavantaṃ etad avoca:|| ||

"Saṇgha-bhedo Saṇgha-bhedo" ti bhante vuccati.|| ||

Kittāvatā nukho bhante saṇgho bhinno hotī" ti?|| ||

"Idh'Ānanda bhikkhu adhammaṃ 'dhammo' ti dipenti,||

■

dhammaṃ 'adhammo' ti dīpenti,||

■

avinayaṃ 'vinayo' ti dīpenti,||

■

vinayaṃ 'avinayo' ti dīpenti,||

■

abhāsitaṃ alapitaṃ Tathāgatena 'bhāsitaṃ lapitaṃ Tathāgatenā' ti dīpenti,||

■

bhāsitaṃ lapitaṃ Tathāgatena 'abhāsitaṃ alapitaṃ Tathāgatenā' ti dīpenti,||

■

anāciṇṇaṃ Tathāgatena 'āciṇṇaṃ Tathāgatenā' ti dīpenti,||

■

āciṇṇaṃ Tathāgatena 'anāciṇṇaṃ Tathāgatenā' ti dīpenti,||

■

appaññattaṃ Tathāgatena 'paññattaṃ Tathāgatenā' ti dīpenti,||

■

paññattaṃ Tathāgatena, 'appaññattaṃ Tathāgatenā' ti dīpenti.|| ||

Te imehi dasahi vatthūhi avakassanti,||
vavakassanti,||
āveni kammāni karonti,||
āveni Pātimokkhaṃ uddisanti.|| ||

Ettāvatā kho Ānanda saṇgho bhinno hotī" ti.|| ||