Aṅguttara Nikāya
X. Dasaka-Nipāta
VIII: Ākaṅkha-Vagga

Sutta 73

Iṭṭha-Dhamma Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[135]

[1][pts][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Dasa yime bhikkhave dhammā iṭṭhā kantā manāpā dullabhā lokasmiṁ.|| ||

 

§

 

Katame dasa?|| ||

Bhogā iṭṭhā kantā manāpā dullabhā lokasmiṁ.|| ||

■

Vaṇṇo iṭṭho kanto manāpo dullabho lokasmiṁ.|| ||

■

Ārogyaṁ iṭṭhaṁ kantaṁ manāpaṁ dullabhaṁ lokasmiṁ.|| ||

■

Sīlāni iṭṭhaṁ kantaṁ manāpaṁ dullabhaṁ lokasmiṁ.|| ||

■

Brahma-cariyaṁ iṭṭhaṁ kantaṁ manāpaṁ dullabhaṁ lokasmiṁ.|| ||

■

Mittā iṭṭhā kantā manāpā dullabhā lokasmiṁ.|| ||

■

Bāhu-saccaṁ iṭṭhaṁ kantaṁ dullabhaṁ lokasmiṁ.|| ||

■

Paññā iṭṭhā kantā manāpā dullabhā lokasmiṁ.|| ||

■

Dhammā iṭṭhā kantā manāpā dullabhā lokasmiṁ.|| ||

■

Saggā iṭṭhā kantā manāpā dullabhā lokasmiṁ.|| ||

[136] Ime kho bhikkhave dasa dhammā iṭṭhā kantā manāpā dullabhā lokasmiṁ.|| ||

 

§

 

3. Imesaṁ kho bhikkhave dasannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ,||
dasa-dhammā paripanthā:|| ||

4. Ālassa anuṭṭhānaṁ bhogānaṁ paripantho.|| ||

■

Amaṇḍanā abhūsaṇā vaṇṇassa paripantho.|| ||

■

Asappāya kiriyā ārogyassa paripantho.|| ||

■

Pāpa-mittatā sīlānaṁ paripantho.|| ||

■

Indriyā-saṁvaro Brahma-cariyassa paripantho.|| ||

■

Visaṁvādanā mittānaṁ paripantho.|| ||

■

Asajjhāya kiriyā bāhu-saccassa paripantho.|| ||

■

Asussusā aparipucchā paññāya paripantho.|| ||

■

Ananuyogo apacc'avekkhanā dhammānaṁ paripantho.|| ||

■

Micchā-paṭipatti saggānaṁ paripantho.|| ||

Imesaṁ kho bhikkhave dasannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ,||
ime dasa dhammā paripanthā.|| ||

 

§

 

5. Imesaṁ kho bhikkhave dasannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ||
dasa dhammā āhārā|| ||

6. Anālassaṁ uṭṭhānaṁ bhogānaṁ āhāro.|| ||

■

Maṇḍanā vibhūsanā vaṇṇassa āhāro.|| ||

■

Sappāya-kiriyā ārogyassa āhāro.|| ||

■

Kalyāṇa-mittatā sīlānaṁ āhāro.|| ||

■

Indriya-saṁvaro Brahma-cariyassa āhāro.|| ||

■

Avisaṁvādanā mittānaṁ āhāro.|| ||

■

Sajjhāyakiriyā bāhu-saccassa āhāro.|| ||

■

Sussusā paripucchā paññāya āhāro.|| ||

■

Anuyogo pacc'avekkhanā dhammānaṁ āhāro.|| ||

■

Sammāpaṭipatti saggānaṁ āhāro.|| ||

Imesaṁ kho bhikkhave dasannaṁ dhammānaṁ iṭṭhānaṁ kantānaṁ manāpānaṁ dullabhānaṁ lokasmiṁ||
ime dasa-dhammā āhārā" ti.|| ||