Pāḷi English Dictionary
Sutta Search
Dhammatalk SearchAṅguttara Nikāya
X. Dasaka-Nipāta
IX: Thera-Vagga
Sutta 89
Kokālika Suttaṁ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṁ samayaṁ Bhagavā Sāvatthiyaṁ viharati||
Jetavane Anāthapiṇḍikassa ārāme.|| ||
Atha kho Kokāliko bhikkhu yena Bhagavā ten'upasaṅkami.|| ||
Upasaṅkamitvā Bhagavantaṁ abhivādetvā eka-m-antaṁ nisīdi.|| ||
Eka-m-antaṁ nisinno kho Kokāliko bhikkhu Bhagavantaṁ etad avoca:|| ||
"Pāpicchā bhante Sāriputta Moggallānā,||
pāpikānaṁ icchānaṁ vasaṁ gatā" ti.|| ||
"Mā h'evaṁ Kokālika,||
mā h'evaṁ Kokālika,||
pasādehi Kokālika Sāriputta-Moggallānesu cittaṁ,||
pesalā Sāriputta-Moggallānā" ti.|| ||
§
Dutiyam pi kho Kokāliko bhikkhu Bhagavantaṁ etad avoca:|| ||
"Kiñ cāpi me bhante Bhagavā saddhāyiko paccayiko,||
atha kho pāpicchā va Sāriputta-Moggallānā,||
pāpikānaṁ icchānaṁ vasaṁ gatā" ti.|| ||
"Mā h'evaṁ Kokālika,||
mā h'evaṁ Kokālika,||
pasādehi Kokālika Sāriputta-Moggallānesu cittaṁ,||
pesalā Sāriputta-Moggallānā" ti.|| ||
§
Tatiyam pi kho Kokāliko bhikkhu Bhagavantaṁ etad avoca:|| ||
"Kiñ cāpi me bhante Bhagavā saddhāyiko paccayiko,||
atha kho pāpicchā va Sāriputta-Moggallānā,||
pāpikānaṁ icchānaṁ vasaṁ gatā" ti.|| ||
"Mā h'evaṁ Kokālika,||
mā h'evaṁ Kokālika,||
pasādehi Kokālika Sāriputta-Moggallānesu cittaṁ,||
pesalā Sāriputta-Moggallānā" ti.|| ||
■
2. Atha kho Kokāliko bhikkhu uṭṭhāy āsanā Bhagavantaṁ abhivādetvā padakkhiṇaṁ katvā pakkāmi.|| ||
■
Acira-pakkantassa ca Kokālikassa bhikkhuno sāsapa-mattāhi pḷakāhi sabbo kāyo phuṭo ahosi.|| ||
Sāsapa-mattiyo hutvā mugga-mattiyo ahesuṁ.|| ||
Mugga-mattiyo hutvā kalāya-mattiyo ahesuṁ.|| ||
Kalāya-mattiyo hutvā kolaṭṭhi-mattiyo ahesuṁ.|| ||
Kolaṭṭhi-mattiyo hutvā kola-mattiyo ahesuṁ|| ||
Kola-mattiyo hutvā āmalaka-mattiyo ahesuṁ.|| ||
Āmalaka-mattiyo hutvā beluva-salāṭuka-mattiyo ahesuṁ.|| ||
Beluva-salāṭuka-mattiyo hutvā billa-mattiyo ahesuṁ.|| ||
Billa-mattiyo hutvā pabhijjiṁsu.|| ||
[171] Pubbañ ca lohitañ ca pagghariṁsu.|| ||
Svāssudaṁ kadali-pattesu seti maccho va visagilito.|| ||
§
3. Atha kho Tudu-pacceka-brahmā yena Kokāliko bhikkhu ten'upasaṅkami,||
upasaṅkamitvā vehāse ṭhatvā Kokālikaṁ bhikkhuṁ etad avoca:|| ||
"Pasādehi Kokālika Sāriputta-Moggallānesu cittaṁ,||
pesalā Sāriputta Moggallānā" ti.|| ||
■
"Kosi tvaṁ āvuso" ti?|| ||
"Ahaṁ Tudu-pacceka-brahmā" ti.|| ||
■
"Nanu tvaṁ āvuso Bhagavatā Anāgāmī vyākato,||
atha kiṁ carahi idhāgato?|| ||
Passa yāvañ ca te idaṁ aparaddhan" ti.|| ||
§
Atha kho Tudu-pacceka-brahmā Kokālikaṁ bhikkhuṁ gāthāhi ajjhabhāsi:|| ||
Purisassa hi jātassa kuṭhārī jāyate mukhe,||
Yāya chindati attāṇaṁ bālo du-b-bhāsitaṁ bhaṇaṁ.|| ||
Yo nindiyaṁ pasaṁsati||
taṁ vā nindati yo pasaṁsiyo,||
Vicināti mukhena so kaliṁ kalinā||
tena sukhaṁ na vindati.|| ||
Appamatto ayaṁ kali||
yo akkhesu dhanaparājayo,||
Sabbassā pi sahā pi attanā||
ayam eva mahantataro kali||
Yo sugatesu manaṁ padosaye|| ||
Sataṁ sahassānaṁ nirabbudānaṁ,||
cha-t-tiṁsati pañca ca abbudāni||
Yam ariyagarahī Nirayaṁ upetī,||
vācaṁ manañ ca paṇidhāya pāpakan' ti.|| ||
■
[172] 4. Atha kho Kokāliko bhikkhu ten'eva ābādhena kālam akāsi|| ||
Kālakato ca Kokāliko bhikkhu Paduma Nirayaṁ upapajji Sāriputta-Moggallānesu cittaṁ āghātetvā.|| ||
§
Atha kho Brahmā Sahampati abhikkantāya rattiyā abhikkanta-vaṇṇo kevala-kappaṁ Jetavanaṁ obhāsetvā yena Bhagavā ten'upasaṅkami,||
upasaṅkamitvā Bhagavantaṁ abhivādetvā eka-m-antaṁ aṭṭhāsi,||
eka-m-antaṁ ṭhito kho Brahmā samahpati Bhagavantaṁ etad avoca:|| ||
"Kokāliko bhante bhikkhu kāla-kato,||
kāla-kato ca bhante Kokāliko bhikkhu Paduma Nirayaṁ uppanno Sāriputta-Moggallānesu cittaṁ āghātetvā" ti.|| ||
Idam avoca Brahmā Sahampati,||
idaṁ vatvā Bhagavantaṁ abhivādetvā padakkhiṇaṁ katvā tatth'ev'antara-dhāyi.|| ||
■
5. Atha kho Bhagavā tassā rattiyā accayena bhikkhu āmantesi.|| ||
Imaṁ bhikkhave rattiṁ Brahmā Sahampati abhikkantāya rattiyā abhikkanta-vaṇṇo kevala-kappaṁ Jetavanaṁ obhāsetvā yenāhaṁ ten'upasaṅkami.|| ||
Upasaṅkamitvā maṁ abhivādetvā eka-m-antaṁ aṭṭhāsi.|| ||
Eka-m-antaṁ ṭhito kho bhikkhave Brahmā Sahampati maṁ etad avoca:|| ||
"Kokāliko bhante bhikkhu kāla-kato,||
kāla-kato ca bhante Kokāliko bhikkhu Paduma Nirayaṁ upapanno,||
Sāriputta-Moggallānesu cittaṁ āghātetvā" ti.|| ||
Idam avoca bhikkhave Brahmā Sahampati,||
idaṁ vatvā maṁ abhivādetvā padakkhiṇaṁ katvā tatth'ev'antara-dhāyī ti.|| ||
§
6. Evam vutte aññataro bhikkhu Bhagavantaṁ etad avoca:|| ||
"Kīva dīgaṁ nu kho bhante Paduma Niraye āyu-p-pamāṇan" ti?|| ||
"Dīghaṁ kho bhikkhu Padume Niraye āyu-p-pamāṇaṁ,||
na taṁ sukaraṁ saṅkhātuṁ|| ||
"Ettakāni [173] vassānī" ti iti vā||
"ettakāni vassa-satānī" ti iti vā||
"ettakāni vassa-sahassānī" ti iti vā||
"ettakāni vassa sata-sahassānī" ti iti vā" ti.|| ||
■
"Sakkā pana bhante upamaṁ kātun" ti?|| ||
"Sakkā bhikkhū" ti.|| ||
Bhagavā avoca:|| ||
"Seyyathā pi bhikkhu vīsatikhāriko Kosalako tilavāho,||
tato puriso vassa-satassa vassa-satassa accayena ekam ekaṁ tilaṁ uddhareyya.|| ||
-◦-
Khippataraṁ kho so bhikkhu vīsatikhāriko Kosalako tilavāho iminā upakkamena parikkhayaṁ pariyādānaṁ gaccheyya,||
na tv'eva eko Abbudo Nirayo.|| ||
-◦-
Seyyathā pi bhikkhu vīsati Abbudā Nirayā evam eko Nirabbudo Nirayo.|| ||
-◦-
Seyyathā pi bhikkhu vīsati Nirabbudā Nirayā evam eko Ababo Nirayo.|| ||
-◦-
Seyyathā pi bhikkhu vīsati Ababā Nirayā evam eko Ahaho Nirayo.|| ||
-◦-
Seyyathā pi bhikkhu vīsati Ahahā Nirayā evam eko Aṭaṭo Nirayo.|| ||
-◦-
Seyyathā pi bhikkhu vīsati Aṭaṭā Nirayā evam eko Kumudo Nirayo.|| ||
-◦-
Seyyathā pi bhikkhu vīsati Kumudā Nirayā evam eko Sogandhiko Nirayo.|| ||
-◦-
Seyyathā pi bhikkhu vīsati Sogandhikā Nirayā evam eko Uppalako Nirayo.|| ||
-◦-
Seyyathā pi bhikkhu vīsati Uppalakā Nirayā evam eko Puṇḍarīko Nirayo.|| ||
-◦-
Seyyathā pi bhikkhu vīsati Puṇḍarikā Nirayā evam eko Padumo Nirayo.|| ||
■
Padumaṁ kho pana bhikkhu Nirayaṁ Kokāliko bhikkhu upapanno Sāriputta-Moggallānesu cittaṁ āghātetvā ti.|| ||
Idam avoca Bhagavā idaṁ vatvā Sugato athāparaṁ etad avoca Satthā.|| ||
[174]|| ||
Purisassa hi jātassa kuṭhārī jāyate mukhe,||
Yāya chindati attāṇaṁ bālo du-b-bhāsitaṁ bhaṇaṁ.|| ||
Yo nindiyaṁ pasaṁsati||
taṁ vā nindati yo pasaṁsiyo,||
Vicināti mukhena so kaliṁ kalinā||
tena sukhaṁ na vindati.|| ||
Appamatto ayaṁ kali||
yo akkhesu dhanaparājayo,||
Sabbassā pi sahā pi attanā||
ayam eva mahantataro kali||
Yo sugatesu manaṁ padosaye|| ||
Sataṁ sahassānaṁ nirabbudānaṁ,||
cha-t-tiṁsati pañca ca abbudāni||
Yam ariyagarahī Nirayaṁ upetī,||
vācaṁ manañ ca paṇidhāya pāpakan' ti.|| ||
