Aṅguttara Nikāya
X. Dasaka-Nipāta
X: Upāsaka-Vagga

Sutta 92

Bhaya Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[182]

[1][pts][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati||
Jetavane Anāthapiṇḍikassa ārāme.|| ||

Atha kho Anāthapiṇḍiko gahapati yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinnaṁ kho Anāthapiṇḍikaṁ gahapati Bhagavā etad avoca:|| ||

"Yato kho gahapati ariya-sāvakassa||
pañca-bhayāni verāni vūpasantāni honti,||
catūhi sot'āpattiyaṅgehi samannāgato hoti,||
ariyo c'assa ñāyo paññāya su-diṭṭho hoti suppaṭi-viddho,||
ākaṅkha-māno attanā va attāṇaṁ vyākareyya:|| ||

'Khīṇa-Nirayomhi||
khīṇa-tiracchāna-yoni||
khīṇa-petti-visayo||
khīṇ-ā-pāya-duggati-vinipāto||
Sotāpanno ham'asmī,||
avinipāta dhammo niyato||
sambodhi parāyano' ti.|| ||

 

§

 

Katamāni pañca bhayāni verāni vūpasantāni honti?|| ||

[183] Yaṁ gahapati, pāṇ-ā-tipātī pāṇ-ā-tipāta-p-paccayā diṭṭha-dhammikam pi bhayaṁ veraṁ pasavati,||
samparāyikam pi bhayaṁ veraṁ pasavati,||
ceta-sikam pi dukkhaṁ domanassaṁ paṭisaṁvedeti.|| ||

Pāṇ-ā-tipātā paṭivirato n'eva diṭṭha-dhammikaṁ bhayaṁ veraṁ pasavati||
na samparāyikaṁ bhayaṁ veraṁ pasavati||
na cetasikaṁ dukkhaṁ domanassaṁ paṭisaṁvedeti,||
pāṇ-ā-tipātā paṭiviratassa||
evaṁ taṁ bhayaṁ veraṁ vūpasannaṁ hoti.|| ||

■

Yaṁ gahapati adinn'ādāyī adinn'ādāna-paccayā diṭṭha-dhammikam pi bhayaṁ veraṁ pasavati,||
samparāyikam pi bhayaṁ veraṁ pasavati,||
ceta-sikam pi dukkhaṁ domanassaṁ paṭisaṁvedeti.|| ||

Adinn'ādānā paṭivirato n'eva diṭṭha-dhammikaṁ bhayaṁ veraṁ pasavati||
na samparāyikaṁ bhayaṁ veraṁ pasavati||
na cetasikaṁ dukkhaṁ domanassaṁ paṭisaṁvedeti,||
adinn'ādānā paṭiviratassa||
evaṁ taṁ bhayaṁ veraṁ vupasannaṁ hoti.|| ||

■

Yaṁ gahapati kāmesu micchā-cārī kāmesu micchāra-paccayā diṭṭha-dhammikam pi bhayaṁ veraṁ pasavati,||
samparāyikam pi bhayaṁ veraṁ pasavati,||
ceta-sikam pi dukkhaṁ domanassaṁ paṭisaṁvedeti.|| ||

Kāmesu-micchā-cārā paṭivirato n'eva diṭṭha-dhammikaṁ bhayaṁ veraṁ pasavati||
na samparāyikaṁ bhayaṁ veraṁ pasavati||
na cetasikaṁ dukkhaṁ domanassaṁ paṭisaṁvedeti||
kāmesu-micchā-cārā paṭiviratassa||
evaṁ taṁ bhayaṁ veraṁ vupasannaṁ hoti.|| ||

■

Yaṁ gahapati musā-vādī musā-vāda-paccayā diṭṭha-dhammikam pi bhayaṁ veraṁ pasavati,||
samparāyikam pi bhayaṁ veraṁ pasavati,||
ceta-sikam pi dukkhaṁ domanassaṁ paṭisaṁvedeti.|| ||

Musā-vādā paṭivirato n'eva diṭṭha-dhammikaṁ bhayaṁ veraṁ pasavati||
na samparāyikaṁ bhayaṁ veraṁ pasavati||
na cetasikaṁ dukkhaṁ domanassaṁ paṭisaṁvedeti,||
musā-vādā paṭiviratassa||
evaṁ taṁ bhayaṁ veraṁ vupasannaṁ hoti.|| ||

■

Yaṁ gahapati surā-mera-yamajja-pamā-daṭṭhāyī surā-mera-yamajja-pamā-daṭṭhāna-paccayā diṭṭha-dhammikam pi bhayaṁ veraṁ pasavati,||
samparāyikam pi bhayaṁ veraṁ pasavati,||
ceta-sikam pi dukkhaṁ domanassaṁ paṭisaṁvedeti.|| ||

Surā-mera-yamajja-pamā-daṭṭhānā paṭivirato n'eva diṭṭha-dhammikaṁ bhayaṁ veraṁ pasavati||
na samparāyikaṁ bhayaṁ veraṁ pasavati||
na cetasikaṁ dukkhaṁ domanassaṁ paṭisaṁvedeti,||
surā-mera-yamajja-pamā-daṭṭhānā paṭiviratassa||
evaṁ taṁ bhayaṁ veraṁ vupasannaṁ hoti.|| ||

Taṁ bhayaṁ veraṁ vūpasannaṁ hoti.|| ||

Imāni pañca-bhayāni verāni vūpasantāni honti.|| ||

 

§

 

Katamehi catūhi sot'āpattiyaṅgehi samannāgato hoti?|| ||

Idha gahapati ariya-sāvako Buddhe avecca-p-pasādena samannāgato hoti:|| ||

'Iti pi so Bhagavā arahaṁ Sammā Sambuddho vijjā-caraṇa sampanno Sugato loka-vidū anuttaro purisa-dhamma-sārathī Satthā deva-manussānaṁ Buddho Bhagavā' ti.|| ||

■

Dhamme avecca-p-pasādena samannāgato hoti:|| ||

'Svākkhāto Bhagavatā dhammo sandiṭṭhiko akāliko ehi passiko opanayiko paccattaṁ veditabbo viññūhī' ti.|| ||

■

Saṅghe avecca-p-pasādena samannāgato hoti:|| ||

'Su-paṭipanno Bhagavato sāvaka-saṅgho,||
uju-paṭipanno Bhagavato sāvaka-saṅgho,||
ñāya-paṭipanno Bhagavato sāvaka saṅgho sāmīci-paṭipanno Bhagavato sāvaka-saṅgho,||
yad idaṁ cattāri purisa-yugāni aṭṭhapurisa-puggalā,||
esa Bhagavato sāvaka-saṅgho āhuṇeyyo pāhuṇeyyo dakkhiṇeyyo añjali-karaṇīyo anuttaraṁ puñña-k-khettaṁ lokassā' ti.|| ||

■

Ariya-kantehi sīlehi samannāgato [184] hoti,||
akhaṇḍehi acchiddehi asabalehi akammāsehi bhujissehi viññūppasatthehi aparām-aṭṭhehi samādhi-saṁvaṭṭa-nikehi imehi catūhi sotipattiyaṅgehi samannāgato hoti.|| ||

 

§

 

Katamo c'assa ariyo ñāyo paññāya su-diṭṭho hoti suppaṭi-viddho?|| ||

Idha gahapati ariya-sāvako iti paṭisañcikkhati:|| ||

'Iti imasmiṁ sati idaṁ hoti,||
imass'uppādā idaṁ uppajjati,||
imasmiṁ asati idaṁ na hoti,||
imassa nirodhā idaṁ nirujjhati.|| ||

■

Yad idaṁ avijjā-paccayā saṅkhārā,||
saṅkhāra-paccayā viññāṇaṁ,||
viñṇāṇa paccayā nāma rūpaṁ,||
nāma rūpa paccayā saḷāyatanaṁ,||
saḷāyatana paccayā phasso,||
phassa paccayā vedanā,||
vedanā paccayā taṇhā,||
taṇhā paccayā upādānaṁ,||
upādāna paccayā bhavo,||
bhava paccayā jāti,||
jāti paccayā jarā-maraṇaṁ||
soka-parideva-dukkha domanass'upāyāsā sambhavanti.|| ||

Evam etassa kevalassa dukkha-k-khandhassa samudayo hoti.|| ||

■

Avijjāya tv'eva asesa-virāga nirodhā saṅkhāra nirodho,||
saṅkhāra nirodhā viñṇāṇa nirodho,||
viññāṇa nirodhā nāma rūpa nirodho,||
nāma rūpa nirodhā saḷāyatana nirodho,||
saḷāyatana nirodhā phassa nirodho,||
phassa nirodhā vedanā nirodho,||
vedanā nirodhā taṇhā nirodho,||
taṇhā nirodhā upādāna nirodho,||
upādāna nirodhā bhava nirodho,||
bhava nirodhā jāti nirodho,||
jāti nirodhā jarā maraṇaṁ||
soka-parideva-dukkha domanass'upāyāsā nirujjhanti.|| ||

Evam etassa kevalassa dukkha-k-khandhassa nirodho hoti.|| ||

Ayañc'assa ariyo ñāyo paññāya su-diṭṭho hoti suppaṭi viddho.|| ||

 

§

 

Yato kho gahapati ariya-sāvakassa imāni pañca-bhayāni verāni vūpasantāni honti.|| ||

Imehi catūhi sotipattiyaṅgehi samannāgato hoti.|| ||

Ayam assa ariyo ñāyo paññāya su-diṭṭho hoti suppaṭi-viddho,||
so ākaṅkha-māno attanā va attāṇaṁ vyākareyya:|| ||

'Khīṇa-Nirayomhi||
khīṇa-tiracchāna-yoniyo||
khīṇa-petti-visayo||
khīṇ-ā-pāya-duggati-vinipāto.|| ||

Sotāpanno hamasmi avinipāta dhammo niyato sambodhi-parāyano'" ti.|| ||