Majjhima Nikāya
III. Upari Paṇṇāsa
4. Vibhaṅga Vagga
Sutta 141
Sacca-Vibhaṅga Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][chlm][pts][than][piya][ntbb][upal] Evaṃ me sutaṃ:
Ekaṃ samayaṃ Bhagavā Bārāṇasiyaṃ viharati||
Isipatane Migadāye.
Tatra kho Bhagavā bhikkhū āmantesi:
"Bhikkhavo" ti.
"Bhadante" ti||
te bhikkhū Bhagavato paccassosuṃ||
Bhagavā etad avoca:|| ||
2. Tathāgatena bhikkhave,||
arahatā Sammā-SamBuddhena Bārāṇasiyaṃ Isipatane Migadāye anuttaraṃ Dhamma-cakkaṃ pavattitaṃ appavattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmiṃ,||
yad idaṃ catunnaṃ ariya-saccānaṃ ācikkhanā desanā paññapanā paṭṭhapanā vivaraṇā vibhajanā uttānīkammaṃ.
Katamesaṃ catunnaṃ:|| ||
3. Dukkhassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaṃ,||
dukkha-samudayassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaṃ.
Dukkha-nirodhassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaṃ.
Dukkha-nirodha-gāmiyā paṭipadāya ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaṃ.|| ||
4. Tathāgatena bhikkhave,||
arahatā Sammā-SamBuddhena Bārāṇasiyaṃ Isipatane Migadāye anuttaraṃ Dhamma-cakkaṃ pavattitaṃ appavattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmiṃ,||
yad idaṃ imesaṃ catunnaṃ ariya-saccānaṃ ācikkhanā desanā paññapanā paṭṭhapanā vivaraṇā vibhajanā uttānīkammaṃ.|| ||
5. Sevetha bhikkhave,||
Sāriputta-Moggallāne.
Bhajatha bhikkhave,||
Sāriputta-Moggallāne.
Paṇḍitā bhikkhū anuggāhakā sabrahma-cārīnaṃ.
Seyyathāpī bhikkhave,||
janetti evaṃ Sāriputto.
Seyyathā pi jātassa āpādetā evaṃ kho Moggallāno.
Sāriputto bhikkhave,||
sot'āpattiphale vineti.
Moggallāno uttamatthe.
Sāriputto bhikkhave,||
pahoti cattāri ariya-saccāni vitthārena ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātunti.|| ||
6. Idam avoca Bhagavā,||
idaṃ vatvā Sugato uṭṭhāy āsanā vihāraṃ pāvisi.|| ||
[249] 7. Tatra kho āyasmā Sāriputto acira-pakkantassa Bhagavato bhikkhū āmantesi: āvuso Bhikkhavo ti.
Āvusoti kho te bhikkhū āyasmato Sāriputtassa paccassosuṃ.
Āyasmā Sāriputto etad avoca:|| ||
8. Tathāgatena āvuso,||
arahatā Sammā-SamBuddhena Bārāṇasiyaṃ Isipatane Migadāye anuttaraṃ Dhamma-cakkaṃ pavattitaṃ appavattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmiṃ,||
yad idaṃ catunnaṃ ariya-saccānaṃ ācikkhanā desanā paññapanā paṭṭhapanā vivaraṇā vibhajanā uttānīkammaṃ.
Katamesaṃ catunnaṃ:|| ||
9. Dukkhassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaṃ.
Dukkha-samudayassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaṃ.
Dukkha-nirodhassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaṃ.
Dukkha-nirodha-gāminiyā paṭipadāya ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaṃ.|| ||
10. Katamañ c'āvuso dukkhaṃ ariya-saccaṃ?|| ||
Jāti pi dukkhā,||
jarāpi dukkhā,||
maraṇampi dukkhaṃ,||
[soka parideva dukkha domanass'upāyāsāpi] dukkhā,||
yamp'icchaṃ na labhati tampi dukkhaṃ,||
saṅkhittena pañc'upādāna-k-khandhā dukkhā.|| ||
11. Katamā c'āvuso jāti?|| ||
Yā tesaṃ tesaṃ sattāṇaṃ tamhi tamhi satta-nikāye jāti sañjāti okkanti abhinibbatti khandhānaṃ pātu-bhāvo āyatanānaṃ paṭilābho,||
ayaṃ vuccat'āvuso jāti.|| ||
12. Katamā c'āvuso jarā?|| ||
Yā tesaṃ tesaṃ sattāṇaṃ tamhi tamhi satta-nikāye jarā jīraṇatā khaṇḍiccaṃ pāliccaṃ valittacatā āyuno saṃhāni indriyānaṃ paripāko,||
ayaṃ vuccat'āvuso jarā.|| ||
13. Katamañ c'āvuso maraṇaṃ?|| ||
Yaṃ tesaṃ tesaṃ sattāṇaṃ tamhā tamhā satta-nikāyā cuti cavanatā bhedo antara-dhānaṃ maccu maraṇaṃ kāla-kiriyā khandhānaṃ bhedo kalebarassa nikkhepo,||
jīvit'indriyassa upacchedo idaṃ vuccat'āvuso maraṇaṃ.|| ||
14. Katamo cāvuso soko?|| ||
Yo kho āvuso aññataraññatarena vyasanena samannāgatassa aññataraññatarena dukkha-dhammena phuṭṭhassa soko socanā socittaṃ anto soko anto parisoko,||
ayaṃ vuttāvuso soko.|| ||
15. Katamo cāvuso paridevo?|| ||
Yo kho āvuso aññataraññatarena vyasanena samannāgatassa aññataraññatarena dukkha-dhammena phuṭṭhassa ādevo paridevo [250] ādevanā paridevanā ādevitattaṃ paridevitattaṃ,||
ayaṃ vuccat'āvuso paridevo.|| ||
16. Katamaṃ c'āvuso dukkhaṃ?|| ||
Yaṃ kho āvuso kāyikaṃ dukkhaṃ kāyikaṃ asātaṃ kāya-samphassajaṃ dukkhaṃ asātaṃ vedayitaṃ,||
idaṃ vuccat'āvuso dukkhaṃ.|| ||
17. Katamaṃ c'āvuso domanassaṃ?|| ||
Yaṃ kho āvuso cetasikaṃ dukkhaṃ cetasikaṃ asātaṃ vedayitaṃ mano-samphassajaṃ dukkhaṃ asātaṃ vedayitaṃ,||
idaṃ vuccat'āvuso domanassaṃ.|| ||
18. Katamo cāvuso upāyāso?|| ||
Yo kho āvuso aññataraññatarena vyasanena samannāgatassa aññataraññatarena dukkha-dhammena phuṭṭhassa āyāso upāyāso āyāsitattaṃ upāyāsitattaṃ,||
ayaṃ vuccat'āvuso upāyāso.|| ||
19. Katamaṃ c'āvuso yamp'icchaṃ na labhati tampi dukkhaṃ?|| ||
Jāti-dhammānaṃ āvuso,||
sattāṇaṃ evaṃ icchā uppajjati: aho vata mayaṃ na jāti-dhammā assāma,||
na ca vata no jāti āgaccheyyāti.|| ||
Na kho pan'etaṃ icchāya pattabbaṃ idam pi yamp'icchaṃ na labhati tampi dukkhaṃ.|| ||
Jarā-dhammānaṃ āvuso sattāṇaṃ evaṃ icchā uppajjati: aho vata mayaṃ na jarā-dhammā assāma,||
na ca vata no jarā āgaccheyyāti.|| ||
Na kho pan'etaṃ icchāya pattabbaṃ idam pi yamp'icchaṃ na labhati tampi dukkhaṃ.|| ||
Byādhidhammānaṃ āvuso,||
sattāṇaṃ evaṃ icchā uppajjati: aho vata mayaṃ na vyādhi-dhammā assāma,||
na ca vata no byādhi āgaccheyyāti.|| ||
Na kho pan'etaṃ icchāya pattabbaṃ idam pi yamp'icchaṃ na labhati tampi dukkhaṃ.|| ||
Maraṇa-dhammānaṃ āvuso,||
sattāṇaṃ evaṃ icchā uppajjati: aho vata mayaṃ na maraṇa-dhammā assāma,||
na ca vata no maraṇaṃ āgaccheyyāti.|| ||
Na kho pan'etaṃ icchāya pattabbaṃ idam pi yamp'icchaṃ na labhati tampi dukkhaṃ.|| ||
Soka parideva dukkha domanass'upāyāsa dhammānaṃ] āvuso,||
sattāṇaṃ evaṃ icchā uppajjati: aho vata mayaṃ na [soka parideva dukkha domanass'upāyāsa dhammā] assāma,||
na ca vata no soka parideva dukkha domanass'upāyāsā āgaccheyyunti.|| ||
Na kho pan'etaṃ icchāya pattabbaṃ,||
idam pi yamp'icchaṃ na labhati tampi dukkhaṃ.|| ||
20. Katame cāvuso saṅkhittena pañc'upādāna-k-khandhā dukkhā?|| ||
Seyyath'īdaṃ:||
rūp'ūpādāna-k-khandho vedan'ūpādāna-k-khandho saññ'ūpādāna-k-khandho saṅkhār'ūpādāna-k-khandho viññāṇ'ūpādāna-k-khandho.
Ime vuccant'āvuso saṅkhittena pañc'ūpādāna-k-khandhā dukkhā.|| ||
Idaṃ vuccat'āvuso dukkhaṃ ariya-saccaṃ.|| ||
21. Katamañ c'āvuso,||
dukkha-samudayo ariya-saccaṃ?|| ||
Yā'yaṃ taṇhā pono-bhavikā nandi-rāga-sahagatā tatra tatr-ā-bhinandinī,||
seyyath'īdaṃ:||
kāma-taṇhā bhava-taṇhā vi- [251] bhava-taṇhā.|| ||
Idaṃ vuccat'āvuso dukkha-samudayo ariya-saccaṃ.|| ||
22. Katamañ c'āvuso dukkha-nirodho ariya-saccaṃ?|| ||
Yo tassā yeva taṇhāya asesa-virāga-nirodho cāgo paṭinissaggo mutti anālayo.
Idaṃ vuccat'āvuso dukkha-nirodho ariya-saccaṃ.|| ||
23. Katamañ c'āvuso dukkha-nirodha-gāminī paṭipadā ariya-saccaṃ?|| ||
Ayameva Ariyo Aṭṭhaṅgiko Maggo,||
seyyath'īdaṃ: sammā-diṭṭhi sammā-saṅkappo sammā-vācā sammā-kammanto sammā ājīvo sammā-vāyāmo sammā-sati sammā-samādhi.|| ||
24. Katamā cāvuso sammā-diṭṭhi?|| ||
Yaṃ kho āvuso dukkhe ñāṇaṃ dukkha-samudaye ñāṇaṃ dukkha-nirodhe ñāṇaṃ dukkha-nirodha-gāminiyā paṭipadāya ñāṇaṃ.
Ayaṃ vuccat'āvuso sammā-diṭṭhi.|| ||
25. Katamo cāvuso sammā-saṅkappo?|| ||
Nekkhamma-saṅkappo avyāpāda-saṅkappo avihiṃsā-saṅkappo.
Ayaṃ vuccat'āvuso sammā-saṅkappo.|| ||
26. Katamā cāvuso sammā-vācā?|| ||
Musā-vādā veramaṇī,||
pisuṇāya vācāya veramaṇī,||
pharusāya vācāya veramaṇī,||
sampha-p-palāpā veramaṇī.|| ||
Ayaṃ vuccat'āvuso sammā-vācā.|| ||
27. Katamo cāvuso sammā-kammanto?|| ||
Pāṇ-ā-tipātā veramaṇī,||
adinn'ādānā veramaṇī kāmesu micchā-cārā veramaṇī.|| ||
Ayaṃ vuttāvuso sammā-kammanto.|| ||
28. Katamo cāvuso sammā ājīvo?|| ||
Idh'āvuso ariya-sāvako micchā ājīvaṃ pahāya sammā ājīvena jīvikaṃ kappeti.|| ||
Ayaṃ vuccat'āvuso sammā ājīvo.|| ||
29. Katamo cāvuso sammā-vāyāmo?|| ||
Idh'āvuso,||
bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyāmati viriyaṃ arabhati cittaṃ paggaṇhāti padahati.|| ||
Uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati viriyaṃ ārabhati cittaṃ paggaṇhāti padahati.|| ||
Anuppannānaṃ kusalānaṃ dham- [252] mānaṃ uppādāya chandaṃ janeti vāyamati viriyaṃ ārabhati cittaṃ paggaṇhāti padahati.|| ||
Uppannānaṃ kusalānaṃ dhammānaṃ ṭhitiyā asammosāya bhiyyo bhāvāya vepullāya bhāvanāya pāripūriyā chandaṃ janeti vāyamati viriyaṃ ārabhati cittaṃ paggaṇhāti padahati.|| ||
Ayaṃ vuccat'āvuso sammā-vāyāmo.|| ||
30. Katamā cāvuso sammā-sati?|| ||
Idh'āvuso bhikkhu kāye kāy'ānupassī viharati ātāpī sampajāno satimā vineyya loke abhijjhā domanassaṃ.||
Vedanāsu vedan'ānupassī viharati ātāpī sampajāno satimā vineyya loke abhijjhā domanassaṃ.|| ||
Citte citt'ānupassī viharati ātāpī sampajāno satimā vineyya loke abhijjhā domanassaṃ|| ||
Dhammesu Dhamm'ānupassī viharati ātāpī sampajāno satimā vineyya loke abhijjhā domanassaṃ.|| ||
Ayaṃ vuccat'āvuso sammā-sati.|| ||
31. Katamo cāvuso, sammā-samādhi?|| ||
Idh'āvuso, bhikkhu vivicc'eva kāmehi vivicca akusalehi dhammehi sa-vitakkaṃ sa-vicāraṃ viveka-jaṃ pitisukhaṃ paṭhamaṃ-jhānaṃ upasampajja viharati.|| ||
Vitakka-vicāranaṃ vūpasamā ajjhattaṃ sampasādanaṃ cetaso ekodi-bhāvaṃ avitakkaṃ avicāraṃ samādhi-jaṃ pitisukhaṃ dutiyaṃ-jhānaṃ upasampajja viharati.|| ||
Pītiyā ca virāgā upekkhako ca viharati.
Sato ca sampajāno sukhaṃ ca kāyena paṭisaṃvesedeti.
Yantaṃ ariyā ācikkhanti 'Upekkhako satimā sukha-vihārī' ti tatiyaṃ dhānaṃ upasampajja viharati.|| ||
Sukhassa ca pahānā dukkhassa ca pahānā pubbe va somanassa domanassānaṃ atthaṅ-gamā adukkha-ṃ-asukhaṃ upekkhā sati pārisuddhiṃ catutthaṃ dhānaṃ upasampajja viharati.|| ||
Ayaṃ vuccat'āvuso sammā-samādhi.|| ||
Idaṃ vuccat'āvuso dukkha-nirodha-gāminī paṭipadā ariya-saccaṃ.|| ||
32. Tathāgaten āvuso, arahatā Sammā-SamBuddhena Bārāṇasiyaṃ Isipatane Migadāye anuttaraṃ Dhamma-cakkaṃ pavattitaṃ appavattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmiṃ,||
yad idaṃ imesaṃ catunnaṃ ariya-saccānaṃ ācikkhanā desanā paññapanā paṭṭhapanā vivaraṇā vibhajanā uttānīkammanti.|| ||
Idamavoc'āyasmā Sāriputto,||
atta-manā te bhikkhu āyasmato Sāriputtassa bhāsitaṃ abhinandunti.
Sacca-Vibhaṅga Suttaṃ
