Majjhima Nikāya
III. Upari Paṇṇāsa
5. Saḷāyatana Vagga
Sutta 144
Chann'Ovāda Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][chlm][pts][upal] Evaṃ me sutaṃ:
Ekaṃ samayaṃ Bhagavā Rājagahe viharati Veḷuvane Kalandaka nivāpe.|| ||
Tena kho pana samayen'āyasmā ca Sāriputto āyasmā ca Mahā Cundo āyasmā ca Channo||
Gijjhakūṭe pabbate viharanti.|| ||
Tena kho pana samayen'āyasmā Channo||
ābādhiko hoti dukkhito bāḷha-gilāno.
Atha kho āyasmā Sāriputto sāyanha-samayaṃ paṭi sallānā vuṭṭhito||
yen āyasmā Mahā Cundo ten'upasaṅkami.|| ||
Upasan-kamitvā āyasmantaṃ mahācundaṃ etad avoca:|| ||
"Āyām āvuso Cunda,||
yen āyasmā Channo ten'upasaṅkamissāma Gilānapucchakā" ti.|| ||
"Evam āvuso" ti kho āyasmā Mahā Cundo||
āyasmato Sāriputtassa paccassosi.|| ||
Atha kho āyasmā ca Sāriputto āyasmā ca Mahā Cundo||
yen āyasmā Channo ten'upasaṅkamiṃsu.|| ||
Upasan-kamitvā āyasmatā Channena saddhiṃ sammodiṃsu.|| ||
Sammodanīyaṃ [264] kathaṃ sārāṇīyaṃ vitisāretvā eka-m-antaṃ nisīdiṃsu.|| ||
Eka-m-antaṃ nisinno kho āyasmā Sāriputto āyasmantaṃ Channaṃ etad avoca:|| ||
"Kacci te āvuso Channa khamanīyaṃ,||
kacci yāpanīyaṃ,||
kacci dukkhā vedanā||
paṭi-k-kamanti no abhi-k-kamanti,||
paṭikkamosānaṃ paññāyati no abhi-k-kamo" ti?|| ||
"Na me āvuso Sāriputta khamanīyaṃ,||
na yāpanīyaṃ,||
bāḷhā me dukkhā vedanā||
abhi-k-kamanti no paṭi-k-kamanti,||
abhi-k-kam'osānaṃ paññāyati no paṭikkamo||
seyyathā pi āvuso balavā puriso tiṇhena sikharena muddhānaṃ abhimantheyya||
evam eva kho āvuso adhimattā vātā muddhānaṃ upahananti.|| ||
Na me āvuso Sāriputta khamanīyaṃ,||
na yāpanīyaṃ,||
bāḷhā me dukkhā vedanā||
abhi-k-kamanti no paṭi-k-kamanti,||
abhi-k-kam'osānaṃ paññāyati no paṭikkamo||
seyyathā pi āvuso balavā puriso daḷhena varattakhaṇḍena sīse sīsaveṭhaṃ dadeyya,||
evam eva kho āvuso adhimattā me sīse vedanā.|| ||
Na me āvuso khamanīyaṃ,||
na yāpanīyaṃ,||
bāḷhā me dukkhā vedanā||
abhi-k-kamanti no paṭi-k-kamanti,||
abhi-k-kam'osānaṃ paññāyati no paṭikkamo||
seyyathā pi āvuso dakkho go-ghātako vā||
go-ghātakantevāsī vā||
tiṇhena govikantanena kucchiṃ parikanenteyya,||
evam eva kho āvuso adhimattā vātā kucchiṃ parikantanti.|| ||
Na me āvuso khamanīyaṃ,||
na yāpanīyaṃ,||
bāḷhā me dukkhā vedanā||
abhi-k-kamanti no paṭi-k-kamanti,||
abhi-k-kam'osānaṃ paññāyati no paṭikkamo||
seyyathā pi āvuso dve balavanto purisā dubbalataraṃ purisaṃ nānā-bāhāsu gahetvā aṅg'ārakāsuyā santāpeyyuṃ,||
samparitāpeyyuṃ,||
evam eva kho āvuso adhimanto kāyasmiṃ ḍāho.|| ||
Na me āvuso khamanīyaṃ,||
na yāpanīyaṃ,||
bāḷhā me dukkhā vedanā,||
abhi-k-kamanti no paṭi-k-kamanti,||
abhi-k-kam'osānaṃ paññāyati no paṭikkamo||
satthaṃ āvuso Sāriputta āharissāmi nāvakaṅkhāmi jīvitan" ti.|| ||
Mā āyasmā Channo satthaṃ āharesi.|| ||
Yāpet āyasmā Channo,||
yāpentaṃ mayaṃ āyasmantaṃ Channaṃ icchāma,||
sace āyasmato Channassa n'atthi sappāyāni bhojanāni,||
ahaṃ āyasmato Channassa sappāyāni bhojanāni pariyesissāmi,||
sace āyasmato Channassa n'atthi sappāyāni bhesajjāni,||
ahaṃ āyasmato Channassa sappāyāni bhesajjāni pariyesissāmi,||
sace āyasmato Channassa n'atthi patirūpā upaṭṭhākā,||
ahaṃ āyasmantaṃ Channaṃ upaṭṭhahissāmi,||
māyasmā Channo satthaṃ āharesi,||
yāpet āyasmā Channo,||
yāpentaṃ mayaṃ āyasmantaṃ Channaṃ icchāmā" ti.|| ||
"Na me āvuso Sāriputta n'atthi sappāyāni bhojanāni,||
atthi me sappāyāni bhojanāni,||
na pi me n'atthi sappāyāni bhesajjāni,||
atthi me sappāyāni bhesajjāni,||
na pi me n'atthi patirūpā upaṭṭhākā,||
atthi me patirūpā upaṭṭhākā.|| ||
Api ca me āvuso Satthā pariciṇṇo dīgha-rattaṃ manāpen'eva no amanāpena,||
etaṃ hi āvuso sāvakassa patirūpaṃ yaṃ Satthāraṃ paricareyya manāpen'eva no amanāpena;|| ||
'Taṃ anupavajjaṃ Channo bhikkhu satthaṃ āharissatī' ti|| ||
evam etaṃ āvuso Sāriputta dhārehī" ti.|| ||
"Puccheyyāma mayaṃ āyasmantaṃ Channaṃ||
kañcīd eva desaṃ,||
sace āyasmā Channo okāsaṃ karoti pañhassa veyyākaraṇāyā" ti.|| ||
"Pucch'āvuso Sāriputta sutvā vedissāmā" ti.|| ||
"Cakkhuṃ āvuso Channa,||
cakkhu-viññāṇaṃ||
cakkhu-viññāṇa-viññātabbe dhamme,|| ||
'Etaṃ mama,||
eso ham asmi,||
[265] eso me attā' ti samanupassasi?|| ||
■
Sotaṃ āvuso Channa,||
sota-viññāṇaṃ||
sota-viññāṇa-viññātabbe dhamme,|| ||
'Etaṃ mama,||
eso ham asmi,||
eso me attā' ti samanupassasi?|| ||
■
Ghānaṃ āvuso Channa,||
ghāna-viññāṇaṃ||
ghāna-viññāṇa-viññātabbe dhamme,|| ||
'Etaṃ mama,||
eso ham asmi,||
eso me attā' ti samanupassasi?|| ||
■
Jivhaṃ āvuso Channa,||
jivhā-viññāṇaṃ||
jivhā-viññāṇa-viññātabbe dhamme,|| ||
'Etaṃ mama,||
eso ham asmi,||
eso me attā' ti samanupassasi?|| ||
■
Kāyaṃ āvuso Channa,||
kāya-viññāṇaṃ||
kāya-viññāṇa-viññātabbe dhamme,|| ||
'Etaṃ mama,||
eso ham asmi,||
eso me attā' ti samanupassasi?|| ||
■
Manaṃ āvuso Channa,||
mano-viññāṇaṃ||
mano-viññāṇa-viññātabbe dhamme,|| ||
'Etaṃ mama,||
eso ham asmi,||
eso me attā' ti samanupassasi" ti?|| ||
"Cakkhuṃ āvuso Sāriputta,||
cakkhu-viññāṇaṃ||
cakkhu-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā' ti samanupassāmi.|| ||
■
Sotaṃ āvuso Sāriputta,||
sota-viññāṇaṃ||
sota-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā' ti samanupassāmi.|| ||
■
Ghānaṃ āvuso Sāriputta,||
ghāna-viññāṇaṃ||
ghāna-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā' ti samanupassāmi.|| ||
■
Jivhaṃ āvuso Sāriputta,||
jivhā-viññāṇaṃ||
jivhā-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā' ti samanupassāmi.|| ||
■
Kāyaṃ āvuso Sāriputta,||
kāya-viññāṇaṃ||
kāya-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā' ti samanupassāmi.|| ||
■
Manaṃ āvuso Sāriputta,||
mano-viññāṇaṃ||
mano-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā' ti samanupassāmi" ti.|| ||
"Cakkhusmiṃ āvuso Channa,||
cakkhu-viññāṇe,||
cakkhu-viññāṇa-viññātabbesu dhammesu||
kiṃ disvā||
kiṃ abhiññāya||
cakkhuṃ||
cakkhu-viññāṇaṃ||
cakkhu-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassasi?|| ||
■
Sotasmiṃ āvuso Sāriputta,||
sota-viññāṇaṃ||
sota-viññāṇa-viññātabbe dhamme:||
kiṃ disvā||
kiṃ abhiññāya||
sotuṃ||
sota-viññāṇaṃ||
sota-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassasi?|| ||
■
Ghānasmiṃ āvuso Channa,||
ghāna-viññāṇe,||
ghāna-viññāṇa-viññātabbesu dhammesu||
kiṃ disvā||
kiṃ abhiññāya||
ghānaṃ||
ghāna-viññāṇaṃ||
ghāna-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassasi?|| ||
■
Jivhāya āvuso Channa,||
jivha-viññāṇe,||
jivhā-viññāṇa-viññātabbesu dhammesu||
kiṃ disvā||
kiṃ abhiññāya||
jivhaṃ||
jivhā-viññāṇaṃ||
jivhā-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassasi?|| ||
■
Kayasmiṃ āvuso Channa,||
kaya-viññāṇe,||
kaya-viññāṇa-viññātabbesu dhammesu||
kiṃ disvā||
kiṃ abhiññāya||
kayaṃ||
kaya-viññāṇaṃ||
kaya-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassasi?|| ||
■
Manasmiṃ āvuso Channa,||
mano-viññāṇe,||
mano-viññāṇa-viññātabbesu dhammesu||
kiṃ disvā||
kiṃ abhiññāya||
manaṃ||
mano-viññāṇaṃ||
mano-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassasi?|| ||
"Cakkhusmiṃ āvuso Sāriputta,||
cakkhu-viññāṇe||
cakkhu-viññāṇa-viññātabbesu dhammesu||
nirodhaṃ disvā||
nirodhaṃ abhiññāya||
cakkhuṃ||
cakkhu-viññāṇaṃ||
cakkhu-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassāmi.|| ||
■
Sotasmiṃ āvuso Sāriputta,||
sota-viññāṇe||
sota-viññāṇa-viññātabbesu dhammesu||
nirodhaṃ disvā||
nirodhaṃ abhiññāya||
sotaṃ||
sota-viññāṇaṃ||
sota-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassāmi.|| ||
■
Ghānasmiṃ āvuso Sāriputta,||
ghāna-viññāṇe||
ghāna-viññāṇa-viññātabbesu dhammesu||
nirodhaṃ disvā||
nirodhaṃ abhiññāya||
ghānaṃ||
ghāna-viññāṇaṃ||
ghāna-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassāmi.|| ||
■
Jivhāya āvuso Sāriputta,||
jivha-viññāṇe||
jivhā-viññāṇa-viññātabbesu dhammesu||
nirodhaṃ disvā||
nirodhaṃ abhiññāya||
jivhaṃ||
jivhā-viññāṇaṃ||
jivhā-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassāmi.|| ||
■
Kāyasmiṃ āvuso Sāriputta,||
kāya-viññāṇe||
kāya-viññāṇa-viññātabbesu dhammesu||
nirodhaṃ disvā||
nirodhaṃ abhiññāya||
kāyaṃ||
kāya-viññāṇaṃ||
kāya-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassāmi.|| ||
■
Manasmiṃ āvuso Sāriputta,||
mano-viññāṇe||
[266] mano-viññāṇa-viññātabbesu dhammesu||
nirodhaṃ disvā||
nirodhaṃ abhiññāya||
manaṃ||
mano-viññāṇaṃ||
mano-viññāṇa-viññātabbe dhamme:|| ||
"N'etaṃ mama,||
n'eso ham asmi,||
na me so attā" ti samanupassāmi.|| ||
Evaṃ vutte āyasmā Mahā Cundo āyasmantaṃ Channaṃ etad avoca:|| ||
"Tasmātiha āvuso Channa,||
idam pi tassa Bhagavato sāsanaṃ niccakappaṃ sādhukaṃ manasi kātabbaṃ:|| ||
'Nissitassa calitaṃ,||
anissitassa calitaṃ n'atthi,||
calite asati passaddhi hoti,||
passaddhiyā sati nati na hoti,||
natiyā asati āgatigati na hoti,||
āgatigatiyā asati cutupapāto na hoti,||
cut'upapāte asati nevidha na huraṃ||
na ubhayam antarena esevanto dukkhassā' ti.|| ||
Atha kho āyasmā ca Sāriputto||
āyasmā ca Mahā Cundo||
āyasmantaṃ Channaṃ iminā ovādena ovaditvā uṭṭhāy āsanā pakkamiṃsu.|| ||
Atha kho āyasmā Channo acira-pakkantesu||
tesu āyasmantesu satthaṃ āharesi.|| ||
Atha kho āyasmā Sāriputto yena Bhagavā ten'upasaṅkami.|| ||
Upasan-kamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho āyasmā Sāriputto Bhagavantaṃ etad avoca:|| ||
"Āyasmatā bhante, Channena satthaṃ āharitaṃ,||
tassa kā gati ko abhisamparāyo" ti?|| ||
"Nanu te Sāriputta,||
Channena bhikkhunā sammukhāyeva anupavajjatā khyākatā" ti?|| ||
"Atthi bhante, pubbacīraṃ nāma Vajjigāmo,||
tatth āyasmato Channassa mitta kulāni||
suhajja kulāni||
upavajja kulānī" ti.|| ||
Honti hete Sāriputta,||
Channassa bhikkhuno mitta kulāni||
suhajja kulāni||
upavajjakulāni,||
na kho panāhaṃ Sāriputta,||
ettāvatā:|| ||
'Sa-upavajjo' ti vadāmi.|| ||
Yo kho Sāriputta imañ ca kāyaṃ nikkhipati,||
aññañ ca kāyaṃ upādiyati,||
tam ahaṃ:|| ||
'Sa-upavajjo' ti vadāmi.|| ||
Taṃ Channassa bhikkhuno n'atthi,||
anupavajjaṃ Channena bhikkhunā satthaṃ āharitan" ti.|| ||
Idam avoca Bhagavā. Attamano āyasmā Sāriputto Bhagavato bhāsitaṃ 'abhinandī' ti.|| ||
Chann'Ovāda Suttaṃ
