Saṁyutta Nikāya
I. Sagātha Vagga

Sakka Saṁyutta

Suttas 1-25

 

---

[216]

Sutta 1

Suvīra Suttaṁ

[1.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ. Bhagavā etad avoca:|| ||

Bhuta-pubbaṁ bhikkhave Asurā deve abhiyaṁsu.|| ||

Atha kho bhikkhave Sakko devānaṁ Indo suvīraṁ deva-puttaṁ āmantesi.|| ||

"Ete tāta suvīra, Asurā deve abhiyan" ti.|| ||

Gaccha, tāta suvīra,||
Asure paccuyyāhīti.|| ||

Evaṁ bhaddaṁ tavāti kho bhikkhave suvīro deva-putto Sakkassa devānam indassa paṭi-s-sutvā pamādaṁ āpādesi.|| ||

Dutiyam pi kho bhikkhave Sakko devānaṁ Indo suvīraṁ deva-puttaṁ āmantesi:|| ||

Ete tāta suvīra, Asurā deve abhiyanti.|| ||

Gaccha tāta suvīra,||
Asure paccuyyāhīti.|| ||

Evaṁ bhaddaṁ tavāti kho bhikkhave suvīro deva-putto Sakkassa devānam indassa paṭi-s-sutvā dutiyam pi pamādaṁ āpādesi.|| ||

Tatiyam pi kho bhikkhave Sakko devānaṁ Indo suvīraṁ deva-puttaṁ āmantesi:|| ||

Ete tāta suvīra,||
Asurā deve abhiyanti.|| ||

Gaccha tāta suvīra,||
Asure paccuyyāhīti.|| ||

Evaṁ bhaddaṁ tavāti kho bhikkhave suvīro deva-putto Sakkassa devānam indassa paṭi-s-sutvā tatiyam pi pamādaṁ āpādesi.|| ||

[217] Atha kho bhikkhave Sakko devānaṁ Indo suvīraṁ deva-puttaṁ gāthāya ajjhabhāsi:|| ||

Anuṭṭhahaṁ avāyamaṁ sukhaṁ yatrādhigacchati,||
Suvīra tattha gacchāhi mañca tatth'eva pāpayāti.|| ||

(Suvīro:)|| ||

Alasassa anuṭṭhātā na ca kiccāni kāraye,||
Sabbakāmasamiddhassa tamme sakka varaṁ disāti|| ||

(Sakko:)|| ||

Yatthālaso anuṭṭhātā accantaṁ sukhamedhati,||
Suvīra tattha gacchāhi mañca tatth'eva pāpayāti.|| ||

(Suvīro:)|| ||

Akammunā devaseṭṭha sakka vindemu yaṁ sukhaṁ,||
Asokaṁ anupāyāsaṁ tamme sakka varaṁ disāti.|| ||

(Sakko:)|| ||

Sace atthi akammena koci kvaci na jīvati,||
Nibbāṇassa hi so Maggo suvīra tattha gacchāhi mañca tatth'eva pāpayāti.|| ||

So hi nāma bhikkhave,||
Sakko devānaṁ Indo sakaṁ puññaphalaṁ upajīvamāno devānaṁ Tāvatiṁsānaṁ issariyādhipaccaṁ rajjaṁ kārento uṭṭhānaviriyassa vaṇṇa-vādī bhavissati.|| ||

Idha kho taṁ bhikkhave sobhetha,||
yaṁ tumhe evaṁ svākkhāte Dhamma-Vinaye pabba-jitā samānā uṭṭhaheyyātha ghaṭeyyātha vāyameyyātha appattassa pattiyā anadigatassa adhigamāya asacchi-katassa sacchi-kiriyāyāti.|| ||

 

§

 

Sutta 2

Susīma Suttaṁ

[2.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā Bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

Bhūta-pubbaṁ bhikkhave Asurā deve abhiyaṁsu.|| ||

Atha kho bhikkhave Sakko devānaṁ Indo susīmaṁ deva-puttaṁ āmantesi:|| ||

Ete tāta susīma,||
Asurā deve abhiyanti.|| ||

Gaccha tāta susīma,||
Asure paccuyyāhīti.|| ||

Evaṁ bhaddantavāti kho bhikkhave susīmo deva-putto Sakkassa devānam indassa paṭi-s-sutvā pamādaṁ āpādesi.|| ||

[218] Dutiyam pi kho bhikkhave Sakko devānaṁ Indo susīmaṁ deva-puttaṁ āmantesi.|| ||

Ete tāta susīma,||
Asurā deve abhiyanti.|| ||

Gaccha tāta susīma,||
Asure paccuyyāhīti.|| ||

Evaṁ bhaddantavāti kho bhikkhave susīmo deva-putto Sakkassa devānam indassa paṭi-s-sutvā pamādaṁ āpādesi.|| ||

Tatiyam pi kho bhikkhave Sakko devānaṁ Indo susīmaṁ deva-puttaṁ āmantesi.|| ||

Ete tāta susīma,||
Asurā deve abhiyanti.|| ||

Gaccha tāta susīma,||
Asure paccuyyāhīti.|| ||

Evaṁ bhaddantavāti kho bhikkhave susīmo deva-putto Sakkassa devānam indassa paṭi-s-sutvā pamādaṁ āpādesi.|| ||

Atha kho bhikkhave Sakko devānaṁ Indo susīmaṁ deva-puttaṁ gāthāya ajjhabhāsi.|| ||

Anuṭṭhahaṁ avāyamaṁ sukhaṁ yatrādhigacchati,||
Susīma tattha gacchāhi mañca tatth'eva pāpayāti.|| ||

(Susīmo:)|| ||

Alasassa anuṭṭhātā na ca kiccāni kāraye,||
Sabbakāmasamiddhassa tamme sakka varaṁ disāti,|| ||

(Sakko:)|| ||

Yatthālaso anuṭṭhātā accantaṁ sukhamedhati,||
Susīma tattha gacchāhi mañca tatth'eva pāpayāti.|| ||

(Susīmo:)|| ||

Akammunā devaseṭṭha sakka vindemu yaṁ sukhaṁ,||
Asokaṁ anupāyāsaṁ tamme sakka varaṁ disāti.|| ||

(Sakko:)|| ||

Sace atthi akammena koci kvaci na jīvati,||
Nibbāṇassa hi so Maggo susīma tattha gacchāhi mañca tatth'eva pāpayāti.|| ||

So hi nāma bhikkhave Sakko devānaṁ Indo sakaṁ puññaphalaṁ upajivamāno devānaṁ Tāvatiṁsānaṁ issariyādhipaccaṁ rajjaṁ kārento uṭṭhānaviriyassa vaṇṇa-vādī bhavissati.|| ||

Idha kho taṁ bhikkhave sobhetha,||
yaṁ tumhe evaṁ svākkhāte Dhamma-Vinaye pabba-jitā samānā uṭṭhaheyyātha ghaṭeyyātha vāyameyyātha appattassa pattiyā anadhigatassa adhigamāya asacchi-katassa sacchi-kiriyāyā" ti.|| ||

 

§

 

Sutta 3

Dhajagga Suttaṁ

[3.1][rhyc][bodh][than][piya] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo"ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

Bhūta-pubbaṁ bhikkhave dev-ā-sura-saṅgāmo samupabbūḷho ahosi.|| ||

Atha kho bhikkhave Sakko devānaṁ Indo deve Tāvatiṁse āmantesi:|| ||

Sace mārisā devānaṁ saṅgāma-gatānaṁ [219] uppajjeyya bhayaṁ vā||
chambhitattaṁ vā||
lomahaṁso vā||
mameva tasmiṁ samaye dhajggaṁ ullokeyyātha.|| ||

Mamaṁ hi vo dhajaggaṁ ullokayataṁ yaṁ bhavissati bhayaṁ vā||
chambhitattaṁ vā||
lomahaṁso vā,||
so pahiyyissati.|| ||

No ce me dhajaggaṁ ullokeyyātha,||
atha pajāpatissa devarājassa dhajaggaṁ ullokeyyātha.|| ||

Pajāpatissa hi vo devarājassa dhajaggaṁ ullokayataṁ yaṁ bhavissati bhayaṁ vā||
chambhitattaṁ vā||
lomahaṁso vā,||
so pahiyyissati.|| ||

No ce pajāpatissa devarājassa dhajaggaṁ ullokeyyātha,||
atha varuṇassa devarājassa dhajaggaṁ ullokeyyātha.|| ||

Varuṇassa hi vo devarājassa dhajaggaṁ ullokayataṁ yaṁ bhavissati bhayaṁ vā||
chambhitattaṁ vā,||
lomahaṁso vā,||
so pahiyyissati.|| ||

No ve varuṇassa devarājassa dhajaggaṁ ullokeyyātha,||
atha īsānassa devarājassa dhajaggaṁ ullokeyyātha.|| ||

Īsānassa hi vo devarājassa dhajaggaṁ ullokayataṁ yaṁ bhavissati bhayaṁ vā||
chambhitattaṁ vā||
lomahaṁso vā,||
so pahiyyissati.|| ||

Taṁ kho pana bhikkhave Sakkassa vā devānam indassa dhajaggaṁ ullokayataṁ,||
pajāpatissa vā devarājassa dhajaggaṁ ullokayataṁ,||
varuṇassa vā devarājassa dhajaggaṁ ullokayataṁ,||
īsānassa vā devarājassa dhajaggaṁ ullokayataṁ,||
yaṁ bhavissati bhayaṁ vā||
chambhitattaṁ vā||
lomahaṁso vā,||
so pahīyethāpi no pi pahīyetha.|| ||

Taṁ kissa hetu?|| ||

Sakko hi bhikkhave devānaṁ Indo avīta-rāgo avītadoso avītamoho bhīrucchamhī utrāsi palāyīti.|| ||

Ahaṁ ca kho bhikkhave evaṁ vadāmi:|| ||

Sace tumhākaṁ bhikkhave arañña-gatānaṁ vā||
rukkha-mūla-gatānaṁ vā||
suññ-ā-gāra-gatānaṁ vā||
uppajjeyya bhayaṁ vā||
chambhitattaṁ vā||
lomahaṁso vā,||
mameva tasmiṁ samaye anussareyyātha."|| ||

Iti pi so Bhagavā arahaṁ Sammā Sambuddho vijjā-caraṇa-sampanno Sugato loka-vidū anuttaro purisa-damma-sārathi Satthā deva-manussānaṁ Buddho Bhagavā" ti.|| ||

Mamaṁ hi vo bhikkhave anussarataṁ yaṁ bhavissati bhayaṁ vā||
chambhitattaṁ vā||
lomahaṁso vā,||
so pahiyyissati.|| ||

[220] No ce maṁ anussareyyātha,||
atha dhammaṁ anussareyyātha:|| ||

"Svākkhāto Bhagavatā dhammo sandiṭṭhiko akāliko ehi passiko opanayiko paccattaṁ veditabbo viññūhī" ti.|| ||

Dhammaṁ hi vo bhikkhave anussarataṁ yaṁ bhavissati bhayaṁ vā||
chambhitattaṁ vā||
lomahaṁso vā,||
so pahiyyissati.|| ||

No ce dhammaṁ anussareyyātha,||
atha Saṅghaṁ anussareyyātha:|| ||

"Su-paṭipanno Bhagavato sāvaka-saṅgho.|| ||

Ujupaṭipanno Bhagavato sāvaka-saṅgho.|| ||

Ñāya-paṭipanno Bhagavato sāvaka-saṅgho.|| ||

Sāmīcipaṭipanno Bhagavato sāvaka-saṅgho.|| ||

Yad idaṁ cattāri purisa-yugāni,||
aṭṭha purisa-puggalā,||
esa Bhagavato sāvaka-saṅgho āhuneyyo pāhuneyyo dakkhiṇeyyo añjali-karaṇīyo anuttaraṁ puñña-k-khettaṁ lokassā' ti.|| ||

Saṅghaṁ hi vo bhikkhave anussarataṁ yaṁ bhavissati bhayaṁ vā||
chambhitattaṁ vā||
lomahaṁso vā||
so pahiyyissati.|| ||

Taṁ kissa hetu?|| ||

Tathāgato hi bhikkhave arahaṁ Sammā Sambuddho vīta-rāgo vitadoso vītamoho abhīru acchamhī anutrāsī apalāyī" ti.|| ||

Idam avoca Bhagavā.|| ||

Idaṁ vatvā Sugato athāparaṁ etad avoca Satthā:|| ||

Araññe rukkha-mūle vā suññāgāreva1 bhikkhavo,||
Anussaretha sambuddhaṁ bhayaṁ tumahāka no siyā.|| ||

No ce Buddhaṁ sareyyātha lokajeṭṭhaṁ narāsabhaṁ,||
Atha dhammaṁ sareyyātha niyyānikaṁ sudesitaṁ.|| ||

No ce dhammaṁ sareyyātha niyyānikaṁ sudesitaṁ,||
Atha Saṅghaṁ sareyyātha puñña-k-khettaṁ anuttaraṁ.|| ||

Evaṁ Buddhaṁ sarantānaṁ dhammaṁ Saṅghañca bhikkhavo,||
Bhayaṁ vā chambhitattaṁ vā lomahaṁso na hessatī ti.|| ||

 

§

 

Sutta 4

Vepacitti Suttaṁ

[4.1][rhyc][bodh][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"bhikkhavo' ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

[221] "Bhūta-pubbaṁ bhikkhave dev-ā-sura-saṅgāmo samupabbūḷho ahosi.|| ||

Atha kho bhikkhave Vepacitti asurindo Asure āmantesi:|| ||

Sace mārisā dev-ā-sura-saṅgāme samūpabbūḷhe Asurā jineyyuṁ,||
devā parājeyyuṁ,||
yena taṁ sakkaṁ devānam indaṁ kaṇṭhapañcamehi bandhanehi bandhitvā mama santike āneyyātha Asurapuranti.|| ||

Sakko pi kho bhikkhave devānaṁ Indo deve Tāvatiṁse āmantesi.|| ||

Sace mārisā dev-ā-sura-saṅgāme samūpabbūḷhe devā jineyyuṁ,||
Asurā parājeyyuṁ,||
yena taṁ Vepacittiṁ asurindaṁ kaṇṭhapañcamehi bandhanehi bandhitvā mama santike āneyyātha sudhammaṁ sabhanti.|| ||

Tasmiṁ kho pana bhikkhave saṅgāme devā jiniṁsu.|| ||

Asurā parājiṁsu.|| ||

Atha kho bhikkhave devā Tāvatiṁsā Vepacittiṁ asurindaṁ kaṇṭhapañcamehi bandhanehi bandhitvā Sakkassa devānam indassa santike ānesuṁ sudhammaṁ sabhaṁ.|| ||

Tatra sudaṁ bhikkhave Vepacitti asurindo kaṇṭhapañcamehi bandhanehi baddho sakkaṁ devānam indaṁ sudhammaṁ sabhaṁ pavisantañ ca||
ni-k-khamantañ ca||
asabbhāhi pharusāhi vācāhi akkosati,||
paribhāsati.|| ||

Atha kho bhikkhave mātalī saṅgāhako sakkaṁ devānam indaṁ gāthāya ajjhabhāsi:|| ||

Bhayā nu Maghavā Sakka dubbalyā no titikkhasi,||
Suṇanto pharusaṁ vācaṁ sammukhā Vepacittinoti.|| ||

(Sakko:)|| ||

Nāhaṁ bhayā na dubbalyā khamāmi Vepacittino,||
Kathañhi mādiso viññū bālena paṭisaṁyujeti.|| ||

Bhiyyo bālā pabhijjeyyuṁ no c'assa paṭisedhako Tasmā bhūsena daṇḍena dhīro bālaṁ nisedhayeti.|| ||

Etad eva ahaṁ maññe bālassa paṭisedhanaṁ,||
Paraṁ saṅkupitaṁ ñatvā yo sato upasammatī ti.|| ||

(Mātali:)|| ||

Etad eva titikkhāya vajjaṁ passāmi vāsava,||
Yadā naṁ maññati bālo bhayā myāyaṁ titikkhati,||
Ajjhārūhati dummedho goḷva bhiyyo palāyinanti.|| ||

(Sakko:)|| ||

[222] Kāmaṁ maññatu vā mā vā bhayā myāyaṁ titikkhati,||
Sadatthaparamā atthā khantyā bhiyyo na vijjati.|| ||

Yo have balavā santo dubbalassa titikkhati,||
Tamāhu paramaṁ khantiṁ niccaṁ khamati dubbalo.|| ||

Abalantaṁ balaṁ āhu yassa bālabalaṁ balaṁ,||
Balassa dhammaguttassa paṭivattā na vijjati.|| ||

Tass'eva tena pāpiyo yo kuddhaṁ paṭikujjhati,||
Kuddhaṁ appaṭikujjhanto saṅgāmaṁ jeti dujjayaṁ.|| ||

Ubhinnamatthaṁ carati attano ca parassa ca,||
Paraṁ saṅkupitaṁ ñatvā yo sato upasammati.|| ||

Ubhinnaṁ tikicchantānaṁ1 attano ca parassa ca,||
Janā maññanti bāloti ye Dhammassa akovidāti|| ||

So hi nāma bhikkhave Sakko devānaṁ Indo sakaṁ puññaphalaṁ upajīvamāno devānaṁ Tāvatiṁsānaṁ issariyādhipaccaṁ rajjaṁ kārento khanti-soraccassa vaṇṇa-vādī bhavissati.|| ||

"Idha kho taṁ bhikkhave sobhetha,||
yaṁ tumhe evaṁ svākkhāte Dhamma-Vinaye pabba-jitā samānā khamā ca bhaveyyātha soratā cā" ti.|| ||

 

§

 

Sutta 5

Subhāsitajaya Suttaṁ

[5.1][rhyc][bodh][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Bhūta-pubbaṁ bhikkhave dev-ā-sura-saṅgāmo samupabbūḷho ahosi.|| ||

Atha kho bhikkhave Vepacitti asurindo sakkaṁ devānam indaṁ etad avoca:|| ||

"Hotu devānam Inda subhāsitena jayoti. Hotu Vepacitti subhāsitena jayo" ti.|| ||

Atha kho bhikkhave devā ca Asurā ca pārisajje ṭhapesuṁ:|| ||

"Ime no su-bhāsitaṁ du-b-bhāsitaṁ ājānissantī" ti.|| ||

Atha kho bhikkhave Vepacitti asurindo sakkaṁ devānam indaṁ etad avoca:|| ||

"Bhaṇa devānam Inda gāthan" ti.|| ||

Evaṁ vutte bhikkhave Sakko devānaṁ Indo Vepacittiṁ asurindaṁ etad avoca:|| ||

"Tumhe khvettha Vepacitti, pubbadevā.|| ||

Bhaṇa Vepacitti, gāthan" ti.|| ||

[223] Evaṁ vutte bhikkhave Vepacitti asurindo imaṁ gāthaṁ abhāsi.|| ||

Bhiyyo bālā pabhijjeyyuṁ no c'assa paṭisedhako,||
Tasmā bhūsena daṇḍena dhīro bālaṁ nisedhayeti.|| ||

Bhāsitāya kho pana bhikkhave Vepacittinā asurindena gāthāya Asurā anumodiṁsu,||
devā tuṇhī ahesuṁ.|| ||

Atha kho bhikkhave Vepacitti asurindo sakkaṁ devānam indaṁ etad avoca: bhaṇa devānam Inda gāthanti.|| ||

Evaṁ vutte bhikkhave Sakko devānaṁ Indo imaṁ gāthaṁ abhāsi:|| ||

Etad eva ahaṁ maññe bālassa paṭisedhanaṁ,||
Paraṁ saṅkupitaṁ ñatvā yo sato upasammatī ti.|| ||

Bhāsitāya kho pana bhikkhave Sakkena devānam indena gāthāya devā anumodiṁsu.|| ||

Asurā tuṇhī ahesuṁ.|| ||

Atha kho bhikkhave Sakko devānaṁ Indo Vepacittiṁ asurindaṁ etad avoca:|| ||

"Bhaṇa Vepacitti gāthan" ti.|| ||

Evaṁ vutte bhikkhave Vepacitti asurindo imaṁ gāthaṁ abhāsi:|| ||

Etad eva titikkhāya vajjaṁ passāmi vāsava,||
Yadā naṁ maññati bālo bhayā myāyaṁ titikkhati,||
Ajjhāruhati dummedho goḷva bhiyyo palāyinanti.|| ||

Bhāsitāya kho pana bhikkhave Vepacittinā asurindena gāthāya Asurā anumodiṁsu.|| ||

Devā tuṇhī ahesuṁ.|| ||

Atha kho bhikkhave Vepacitti asurindo sakkaṁ devānam indaṁ etad avoca:|| ||

"Bhaṇa devānam Inda gāthan" ti.|| ||

Evaṁ vutte bhikkhave Sakko devānaṁ Indo imā gāthāyo abhāsi:|| ||

Kāmaṁ maññatu vā mā vā bhayā myāyaṁ titikkhati,||
Sadatthaparamā atthā khantyā bhiyyo na vijjati.|| ||

Yo have balavā santo dubbalassa titikkhati,||
Tamāhu paramaṁ khantiṁ niccaṁ khamati dubbalo.|| ||

Abalantaṁ balaṁ āhu yassa bālabalaṁ balaṁ,||
Balassa dhammaguttassa paṭivattā na vijjati.|| ||

Tass'eva tena pāpiyo yo kuddhaṁ paṭikujjhati,||
Kuddhaṁ appaṭikujjhanto saṅgāmaṁ jeti dujjayaṁ.|| ||

Ubhinnamatthaṁ carati attano ca parassa ca,||
Paraṁ saṅkupitaṁ ñatvā yo sato upasammati.|| ||

[224] Ubhinnaṁ tikicchantānaṁ attano ca parassa ca,||
Janā maññanti bālo ti ye Dhammassa akovidā ti.|| ||

Bhāsitāsu kho pana bhikkhave Sakkena donamindena gāthāsu devā anumodiṁsu,||
Asurā tuṇhī ahesuṁ.|| ||

Atha kho bhikkhave devānañ ca||
Asurānañ ca||
pārisajjā etad avocuṁ:|| ||

"Bhāsitā kho Vepacittinā asurindena gāthāyo.|| ||

Tā ca kho sadaṇḍāvacarā saSatthāvacarā||
iti bhaṇḍanaṁ||
iti viggahoti||
iti kalaho.|| ||

Bhāsitā kho pana Sakkena devānam indena gāthāyo.|| ||

Tā ca kho adaṇḍāvacarā asatthāvacarā||
iti abhaṇḍanaṁ||
iti aviggaho||
iti akalaho.|| ||

Sakkassa devānam indassa subhāsitena jayo" ti.|| ||

Iti kho bhikkhave Sakkassa devānam indassa subhāsitena jayo ahosī.|| ||

 

§

 

Sutta 6

Kulāvaka Suttaṁ

[6.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ-||
Bhūta-pubbaṁ bhikkhave dev-ā-sura-saṅgāmo samupabbūḷho ahosi.|| ||

Tasmiṁ kho pana bhikkhave saṅgāme Asurā jiniṁsu,||
devā parājiṁsu.|| ||

Parājitā ca kho bhikkhave devā apāyaṁsveva uttarena mukhā,||
abhiyaṁsveva ne Asurā.|| ||

Atha kho bhikkhave Sakko devānaṁ Indo Mātali saṅgāhakaṁ gāthāya ajjhabhāsi:|| ||

Kulāvakā Mātali simbalismiṁ īsāmukhena parivajjayassu,||
Kāmaṁ cajāma Asuresu pāṇaṁ māyime dijā vikulāvakā ahesun ti.|| ||

"Evaṁ bhaddan tavā" ti kho bhikkhave Mātali saṅgāhako Sakkassa devānam indassa paṭi-s-sutvā sahassayuttaṁ ājañña-rathaṁ paccudāvattesi.|| ||

Atha kho bhikkhave Asurānaṁ etad ahosi:|| ||

Paccudāvatto kho dāni Sakkassa devānam indassa sahassayutto [225] ājañña-ratho.|| ||

Dutiyam pi kho devā Asurehi saṅgāmessantīti bhītā Asurapurameva pāvisiṁsu.|| ||

Iti kho bhikkhave Sakkassa devānam indassa dhammen'eva jayo ahosi.|| ||

 

§

 

Sutta 7

Nadubbhiya Suttaṁ

[7.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ -|| ||

Bhūta-pubbaṁ bhikkhave Sakkassa devānam indassa raho-gatassa paṭisallīnassa evaṁ cetaso parivitakko udapādi:|| ||

Yo pi me assa paccatthiko tassa pāhaṁ na dubbheyyan ti.|| ||

Atha kho bhikkhave Vepacitti asurindo Sakkassa devānam indassa cetasā ceto-parivitakka maññāya yena Sakko devānaṁ Indo ten'upasaṅkami.|| ||

Addasā kho bhikkhave Sakko devānaṁ Indo Vepacittiṁ asurindaṁ dūrato'va āga-c-chantaṁ.|| ||

Disvāna Vepacittiṁ asurindaṁ etad avoca:|| ||

Tiṭṭha Vepacitti gahitosīti.|| ||

Yad eva te mārisa pubbe cittaṁ tad eva tvaṁ mārisa pahāsīti.|| ||

Sapassu ca me Vepacitti adubbhāyā ti.|| ||

Yaṁ musā bhaṇato pāpaṁ yaṁ pāpaṁ1 ariy'ūpavādino,||
Mittadduno ca yaṁ pāpaṁ yaṁ pāpaṁ akataññuno,||
Tam eva pāpaṁ phusati yo te dubbhe sujampatī ti.|| ||

 

§

 

Sutta 8

Verocanaasurinda Suttaṁ

[8.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ-|| ||

Tena kho pana samayena Bhagavā divā-vihāragato hoti paṭisallīno.|| ||

Atha kho Sakko ca||
devānaṁ Indo verocano ca||
asurindo yena Bhagavā ten'upasaṅkamiṁsu.|| ||

Upasaṅkamitvā paccekaṁ dvārabāhaṁ aṭṭhaṁsu.|| ||

Atha kho verocano asurindo Bhagavato santike imaṁ gāthaṁ abhāsi:|| ||

Vāyameth'eva puriso yāva atthassa nipphadā,||
Nipphannasobhino atthā verocanavaco idan" ti.|| ||

(Sakko:)|| ||

[226] Vāyameth'eva puriso yāva atthassa nipphadā,||
Nipphannasobhino atthā khantyā bhiyyo na vijjatī" ti.|| ||

(Verovano:)|| ||

Sabbe sattā atthajātā tattha tattha yathārahaṁ,||
Saṁyogaparamātv'eva sambhogā sabbapāṇinaṁ,||
Nipphannasobhino atthā verocanavaco idanti.|| ||

(Sakko:)|| ||

Sabbe sattā atthajātā tattha tattha yathārahaṁ,||
Saṁyogaparamātv'eva sambhogā sabbapāṇinaṁ,||
Nipphannasobhino atthā khantyā bhiyo na vijjatī ti.|| ||

 

§

 

Sutta 9

Araññāyatanaisi Suttaṁ

[9.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ-|| ||

Bhūta-pubbaṁ bhikkhave sambahulā isayo sīlavanto kalyāṇa-dhammā araññāyatane paṇṇakuṭīsu sammanti.|| ||

Atha kho bhikkhave Sakko ca||
devānaṁ Indo Vepacitti ca||
asurindo yena te isayo sīlavanto kalyāṇa-dhammā ten'upasaṅkamiṁsu.|| ||

Atha kho bhikkhave Vepacitti asurindo aṭaliyo upāhanā ārohitvā khaggaṁ olaggetvā chattena dāriyamānena aggadvārena assamaṁ pavisitvā te isayo sīlavante kalyāṇa-dhamme apabyāmato karitvā ati-k-kami.|| ||

Atha kho bhikkhave Sakko devānaṁ Indo aṭaliyo upāhanā orohitvā khaggaṁ aññesaṁ datvā chattaṁ apanāmetvā dvāren'eva assamaṁ pavisitvā te isayo sīlavante kalyāṇa-dhamme anuvātaṁ pañjaliko namassamāno aṭṭhāsi.|| ||

Atha kho bhikkhave te isayo sīlavanto kalyāṇa-dhammā sakkaṁ devānam indaṁ gāthāya ajjhabhāsiṁsu:|| ||

Gandho isīnaṁ ciradikkhitānaṁ kāyā cuto gacchati mālutena,||
Ito paṭikkama sahassanetta gandho isīnaṁ asuci devarājāti.|| ||

Gandho isīnaṁ ciradikkhitānaṁ kāyā cuto gacchatu mālutena,||
Sucitrapupphaṁ sirasmiṁ va mālaṁ [227] gandhaṁ etaṁ paṭikaṅkhāma bhante, na h'ettha devā paṭikkūlasaññinoti.|| ||

 

§

 

Sutta 10

Isayo Samuddaka Suttaṁ or Sambara Suttaṁ

[10.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ -|| ||

Bhūta-pubbaṁ bhikkhave sambahulā isayo sīlavanto kalyāṇa-dhammā samuddatīre paṇṇakuṭīsu sammanti.|| ||

Tena kho pana samayena bhikkhave dev-ā-sura-saṅgāmo samupabbūḷho ahosi,||
atha kho bhikkhave tesaṁ isīnaṁ sīlavantānaṁ kalyāṇa-dhammānaṁ etad ahosi.|| ||

Dhammikā kho devā,||
adhammikā Asurā.|| ||

Siyā pi no Asurato bhayaṁ.|| ||

Yannūna mayaṁ Sambaraṁ asurindaṁ upasaṅkamitvā abhayadakkhiṇaṁ yāceyyāmāti.|| ||

Atha kho bhikkhave te isayo sīlavanto kalyāṇa-dhammā seyyāthāpi nāma balavā puriso sammiñjitaṁ vā||
bāhaṁ pasāreyya pasāritaṁ vā||
bāhaṁ sammiñjeyya,||
evam eva samuddatīre paṇṇakuṭīsu antara-hitā sambarssa asurindassa pamukhe pātu-r-ahesuṁ.|| ||

Atha kho bhikkhave te isayo sīlavanto kalyāṇa-dhammā Sambaraṁ asurindaṁ gāthāya ajjhabhāsiṁsu:|| ||

Isayo Sambaraṁ pattā yā canti abhayadakkhiṇaṁ,||
Kāmaṁ karohi te dātuṁ bhayassa abhayassa vāti,|| ||

Isīnaṁ abhayaṁ n'atthi duṭṭhānaṁ sakkasevinaṁ,||
Abhayaṁ yā camānānaṁ bhayameva dadāmi voti,|| ||

Abhayaṁ yā camānānaṁ bhayameva dadāsi no. Paṭiggaṇhāma te etaṁ akkhayaṁ hotu te bhayaṁ.|| ||

Yādisaṁ vapate bījaṁ tādisaṁ harate phalaṁ,||
Kalyāṇakārī kalyāṇaṁ pāpakārī ca pāpakaṁ,||
Pavuttaṁ tāta te bījaṁ phalaṁ pacc'anubhossasī ti.|| ||

Atha kho bhikkhave te isayo sīlavanto kalyāṇa-dhammā Sambaraṁ asurindaṁ abhisapitvā seyyathā pi nāma balavā puriso sammiñjitaṁ vā||
bāhaṁ pasāreyya,||
pasāritaṁ vā||
bāhaṁ sammiñjeyya,||
evam eva Sambarassa asurindassa pamukhe antara-hitā samuddatīre paṇṇakuṭīsu pātu-r-ahesuṁ.|| ||

[228] Atha kho bhikkhave sambaro asurindo tehi isīhi sīlavantehi kalyāṇa-dhammehi abhisapito rattiyā sudaṁ ti-k-khattuṁ ubbijjatī ti.|| ||

 

---

Suvīra Vaggo Paṭhamo

---

 

Sutta 11

Devā (Satta Vatapada) Suttaṁ

[11.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Sakkassa bhikkhave devānam indassa pubbe manussabhūtassa satta vatapadāni samattāni samādinnāni ahesuṁ,||
yesaṁ samādinnattā Sakko sakkattaṁ ajjhagā.|| ||

Katamāni satta vatapadāni?|| ||

Yāva-jīvaṁ mātāpettibharo assaṁ.|| ||

Yāva-jīvaṁ kule jeṭṭhāpacāyī assaṁ.|| ||

Yāva-jīvaṁ saṇhavāco assaṁ.|| ||

Yāva-jīvaṁ apisuṇa-vāco assaṁ.|| ||

Yāva-jīvaṁ vigata-mala-maccherena cetasā agāraṁ ajjhāvaseyyaṁ,||
mutta-cāgo payatapāṇi vossagga-rato yā cayogo dāna-saṁvibhāga-rato.|| ||

Yāva-jīvaṁ saccavāco assaṁ.|| ||

Yāva-jīvaṁ akkodhano assaṁ.|| ||

Sace pi me kodho uppajjeyya khippameva naṁ paṭivineyyanti.|| ||

Sakkassa bhikkhave devānam indassa pubbe manusabhūtassa imāni satta vatapadāni samattāni samādinnāni ahesuṁ.|| ||

Yesaṁ samādinnattā Sakko sakkattaṁ ajjhagā ti.|| ||

Mātāpettibharaṁ jantuṁ kulejeṭṭhāpacāyinaṁ,||
Saṇhaṁ sakhilasambhāsaṁ pesuṇeyyappahāyinaṁ,||
Maccheravinaye yuttaṁ saccaṁ kodhābhibhūṁ naraṁ,||
Taṁ ve devā Tāvatiṁsā āhu sappuriso itī ti.|| ||

 

§

 

Sutta 12

Dutiya Devā (Satta-vata-pada) Suttaṁ

[12.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā [229] Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

Sakko bhikkhave devānaṁ Indo pubbe manussabhūto samāno magho nāma māṇavo ahosi.|| ||

Tasmā maghavāti vuccati.|| ||

Sakko bhikkhave devānaṁ Indo pubbe manussabhūto samāno pure pure dānaṁ adāsi.|| ||

Tasmā purindadoti vuccati.|| ||

Sakko bhikkhave devānaṁ Indo pubbe manussabhūto samāno sakkaccaṁ dānaṁ adāsi,||
tasmā Sakkoti vuccati.|| ||

Sakko bhikkhave devānaṁ Indo pubbe manussabhūto samāno āvasathaṁ adāsi.|| ||

Tasmā vāsavoti vuccati.|| ||

Sakko bhikkhave devānaṁ Indo sahassampi atthānaṁ muhuttena cinteti.|| ||

Tasmā sahassakkhoti vuccati.|| ||

Sakkassa bhikkhave devānam indassa sujā nāma Asurakaññā pajāpatī.|| ||

Tasmā sujampatīti vuccati.|| ||

Sakko bhikkhave devānaṁ Indo devānaṁ Tāvatiṁsānaṁ issariyādhipaccaṁ rajjaṁ kāreti.|| ||

Tasmā devānaṁ indoti vuccati.|| ||

Sakkassa bhikkhave devānam indassa pubbe manussabhūtassa sattavatapadāni samattāni samādinnāni ahesuṁ.|| ||

Yesaṁ samādinnattā Sakko sakkattaṁ ajjhagā.|| ||

Katamāni satta vatapadāni:|| ||

Yāva-jīvaṁ mātāpettibharo assaṁ.|| ||

Yāva-jīvaṁ kule jeṭṭhāpacāyī assaṁ.|| ||

Yāva-jīvaṁ saṇhavāco assaṁ.|| ||

Yāva-jīvaṁ apisuṇā-vāco assaṁ.|| ||

Yāva-jīvaṁ vigata-mala-maccherena cetasā agāraṁ ajjhāvaseyyaṁ,||
mutta-cāgo payata-pāṇī vossagga-rato yā cayogo dāna-saṁvibhāga-rato.|| ||

Yāva-jīvaṁ saccavāco assaṁ.|| ||

Yāva-jīvaṁ akkodhano assaṁ.|| ||

Sace pi me kodho uppajjeyya khippameva naṁ paṭivineyyanti.|| ||

Sakkassa bhikkhave devānam indassa pubbe manussabhūtassa imāni satta vatapadāni samattāni samādinnāni ahesuṁ,||
yesaṁ samādinnattā Sakko sakkattaṁ ajjhagāti.|| ||

[230] Mātāpettibharaṁ jantuṁ kulejeṭṭhāpacāyinaṁ Saṇhaṁ sakhilasambhāsaṁ pesuṇeyyappahāyinaṁ Maccheravinaye yuttaṁ saccaṁ kodhābhibhuṁ naraṁ Taṁ ve devā Tāvatiṁsā āhu sappuriso itī ti.|| ||

 

§

 

Sutta 13

Mahāli (Satta-Vata-Pada) Suttaṁ

[13.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā Vesāliyaṁ viharati Mahāvane Kūṭāgāra-sālāyaṁ.|| ||

Atha kho Mahāli licchavi yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho Mahāli licchavi Bhagavantaṁ etad avoca:|| ||

"Diṭṭho vo1 bhante Sakko devānaṁ Indo" ti.|| ||

"Diṭṭho me Mahāli Sakko devānaṁ Indo" ti.|| ||

"So hi nūna bhante sakkapaṭirūpako bhavissati.|| ||

Duddaso hi bhante Sakko devānaṁ Indo" ti.|| ||

Sakkañc'āhaṁ Mahāli pajānāmi, sakkakaraṇe ca dhamme.|| ||

Yesaṁ dhammānaṁ samādinnattā Sakko sakkattaṁ ajjhagā,||
tañ ca pajānāmi.|| ||

Sakko Mahāli devānaṁ Indo pubbe manussabhūto samāno magho nāma māṇavo ahosi.|| ||

Tasmā 'maghavā' ti vuccati.|| ||

Sakko Mahāli devānaṁ Indo pubbe manussabhūto samāno pure pure dānaṁ adāsi.|| ||

Tasmā purindado" ti vuccati.|| ||

Sakko Mahāli devānaṁ Indo pubbe manussabhūto samāno sakkaccaṁ dānaṁ adāsi.|| ||

Tasmā Sakko" ti vuccati.|| ||

Sakko Mahāli devānaṁ Indo pubbe manussabhūto samāno āvasathaṁ adāsi|| ||

"Tasmā vāsavo" ti vuccati.|| ||

Sakko Mahāli devānaṁ Indo sahassam pi atthānaṁ muhuttena cinteti.|| ||

"Tasmā sahassakkho" ti vuccati.|| ||

Sakkassa Mahāli devānam indassa sujā nāma Asurakaññā pajāpatī.|| ||

"Tasmā sujampatī" ti vuccati.|| ||

Sakko Mahāli devānaṁ Indo devānaṁ Tāvatiṁsānaṁ [231] issariyādhipaccaṁ rajjaṁ kāreti.|| ||

"Tasmā devānaṁ Indo" ti vuccati.|| ||

Sakkassa Mahāli devānam indassa pubbe manussabhūtassa satta vatapadāni samattāni samādinnāni ahesuṁ, yesaṁ samādinnattā Sakko sakkattaṁ ajjhagā.|| ||

Katamāni satta vatapadāni:|| ||

Yāva-jīvaṁ mātāpettibharo assaṁ.|| ||

Yāva-jīvaṁ kule jeṭṭhāpacāyī assaṁ.|| ||

Yāva-jīvaṁ saṇhavāco assaṁ.|| ||

Yāva-jīvaṁ apisuṇā-vāco assaṁ.|| ||

Yāva-jīvaṁ vigata-mala-maccherena cetasā agāraṁ ajjhāvaseyyaṁ,||
mutta-cāgo payata-pāṇī vossagga-rato yā cayogo dāna-saṁvibhāga-rato.|| ||

Yāva-jīvaṁ saccavāco assaṁ.|| ||

Yāva-jīvaṁ akkodhano assaṁ.|| ||

Sace pi me kodho uppajjeyya,||
khippameva naṁ paṭivineyyan ti.|| ||

Sakkassa Mahāli devānam indassa pubbe manussabhūtassa imāni satta vatapadāni samattāni samādinnāni ahesuṁ,||
yesaṁ samādinnattā Sakko sakkattaṁ ajjhagā ti.|| ||

Mātāpettibharaṁ jantuṁ kule jeṭṭhāpacāyinaṁ||
Saṇahaṁ sakhilasambhāsaṁ pesuṇeyyappahāyinaṁ||
Maccheravinaye yuttaṁ saccaṁ kodhābhibhūṁ naraṁ||
Taṁ ve devā Tāvatiṁsā āhu sappuriso itī ti.|| ||

 

§

 

Sutta 14

Daḷidda Suttaṁ

[14.1][rhyc][bodh][than] Evaṁ me sutaṁ:|| ||

Ekaṁ samayaṁ Bhagavā Rājagahe viharati Veḷuvane Kalandakanivāpe.|| ||

Tatra kho Bhagavā bhikkhū āmantesi:|| ||

"Bhikkhavo"ti.|| ||

"Bhadante" ti te bhikkhū Bhagavato paccassosuṁ Bhagavā etad avoca:|| ||

"Bhūta-pubbaṁ bhikkhave aññataro puriso imasmiṁ yeva Rājagahe manussa-daḷiddo ahosi, manussa-kapaṇo, manussa-varāko.|| ||

So Tathāgata-p-pavedite Dhamma-Vinaye saddhaṁ samādiyi.|| ||

Sīlaṁ samādiyi.|| ||

Sutaṁ samādiyi.|| ||

Cāgaṁ samādiyi.|| ||

Paññaṁ samādiyi.|| ||

So Tathāgata-p-pavedite Dhamma-Vinaye saddhaṁ samādiyitvā sīlaṁ samādiyitvā sutaṁ samādiyitvā cāgaṁ samādiyitvā paññaṁ samādiyitvā kāyassa bhedā param maraṇā [232] sugatiṁ saggaṁ lokaṁ upapajji devānaṁ Tāvatiṁsānaṁ saha-vyataṁ.|| ||

So aññe deve atirocati vaṇṇena c'eva yasasā ca.|| ||

Tatra sudaṁ bhikkhapava devā tāvatisaṁsā ujjhāyanti khīyanti vipācenti:|| ||

Acchariyaṁ vata bho abbhūtaṁ vata bho ayaṁ hi deva-putto pubbe manussa bhūto samāno manussa-daḷiddo ahosi,||
manussa-kapaṇo manussa-varāko.|| ||

So kāyassa bhedā param maraṇā sugatiṁ saggaṁ lokaṁ upapanno devānaṁ Tāvatiṁsānaṁ saha-vyataṁ.|| ||

So aññe deve atirocati vaṇṇena c'eva yasasā cā ti.|| ||

Atha kho bhikkhave Sakko devānaṁ Indo deve Tāvatiṁse āmantesi:|| ||

"Mā kho tumhe mārisā etassa deva-puttassa ujjhāyittha.|| ||

Eso kho mārisā deva-putto pubbe manussabhūto samāno Tathāgata-p-pavedite Dhamma-Vinaye saddhaṁ samādiyi.|| ||

Sīlaṁ samādiyi.|| ||

Sutaṁ samādiyi.|| ||

Cāgaṁ samādiyi.|| ||

Paññaṁ samādiyi.|| ||

So Tathāgata-p-pavedite Dhamma-Vinaye saddhaṁ samādiyitvā sīlaṁ samādiyitvā sutaṁ samādiyitvā cāgaṁ samādiyitvā paññaṁ samādiyitvā kāyassa bhedā param maraṇā sugatiṁ saggaṁ lokaṁ upapanno devānaṁ Tāvatiṁsānaṁ saha-vyataṁ.|| ||

So aññe deve atirocati vaṇṇena c'eva yasasā cā" ti.|| ||

Atha kho bhikkhave Sakko devānaṁ Indo deve Tāvatiṁse anunayamāno tāyaṁ velāyaṁ imā gāthāyo abhāsi:|| ||

Yassa saddhā Tathāgate acalā suppati-ṭ-ṭhitā||
Sīlañ ca yassa kalyāṇaṁ ariya-kantaṁ pasaṁsitaṁ,|| ||

Saṅghe pasādo yassatthi ujubhūtañ ca dassanaṁ,||
Adaḷiddoti taṁ āhu amoghaṁ tassa jīvitaṁ.|| ||

Tasmā saddhañca sīlañca pasādaṁ Dhamma-dassanaṁ,||
Anuyuñjetha medhāvī saraṁ Buddhāna sāsanan ti.|| ||

 

§

 

Sutta 15

Rāmaṇeyyaka Suttaṁ

[15.1][rhyc][bodh][than] Evaṁ me sutaṁ:|| ||

Ekaṁ samayaṁ Sāvatthiyaṁ-|| ||

Atha kho Sakko devānaṁ Indo yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhito kho Sakko devānaṁ Indo Bhagavantaṁ etad avoca:|| ||

"Kin nu kho bhante bhūmi-rāmaṇeyyakan" ti?|| ||

(Bhagavā:)|| ||

[233] Ārāmacetyā vanacetyā pokkharaññā sunimmitā,||
Manussarāmaṇeyyassa kalaṁ nāgghanti soḷasiṁ.|| ||

Gāme vā yadi vā raññe ninne vā yadi vā thale,||
Yattha Arahanto viharanti taṁ bhūmiṁ rāmaṇeyyakan ti.|| ||

 

§

 

Sutta 16

Yajamāna Suttaṁ

[16.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā Rājagahe viharati Gijjhakūṭe pabbate.|| ||

Atha kho Sakko devānaṁ Indo yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhito kho Sakko devānaṁ Indo Bhagavantaṁ gāthāya ajjhabhāsi:|| ||

Yajamānānaṁ manussānaṁ puññapekkhāna pāṇinaṁ,||
Karotaṁ opadhikaṁ puññaṁ kattha dinnaṁ maha-p-phalan ti.|| ||

(Bhagavā:)|| ||

Cattāro ca paṭipannā cattāro ca phale ṭhitā,||
Esa saṅgho ujubhūto paññāsīlasamāhito.|| ||

Yajamānānaṁ manussānaṁ puññapekkhāna pāṇinaṁ,||
Karotaṁ opadhikaṁ puññaṁ saṅghe dinnaṁ maha-p-phalan ti.|| ||

 

§

 

Sutta 17

Vandanā Suttaṁ

[17.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ -|| ||

Tena kho pana samayena Bhagavā divā-vihāragato hoti, paṭisallīno.|| ||

Atha kho Sakko ca devānaṁ Indo Brahmā ca sahampatī yena Bhagavā ten'upasaṅkamiṁsu,||
upasaṅkamitvā paccekaṁ dvārabāhaṁ nissāya aṭṭhaṁsu.|| ||

Atha kho Sakko devānaṁ Indo Bhagavato santike imaṁ gāthaṁ abhāsi:|| ||

Uṭṭhehi vīra vijita-saṅgāma pannabhāra anaṇa vicara loke,||
Cittañ ca te suvimutataṁ cando yathā paṇṇarasāya rattin ti.|| ||

[234] Na kho devānam Inda Tathāgatā evaṁ vanditabbā.|| ||

Evañ ca kho devānam Inda Tathāgatā vanditabbā:|| ||

Uṭṭhehi vīra vijita-saṅgāma satthavāha anaṇa vicara loke,||
Desassu Bhagavā dhammaṁ aññātāro bhavisntī ti.|| ||

 

§

 

Sutta 18

Gahaṭṭha-Vandanā or Sakkanamassana Suttaṁ

[18.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ-|| ||

Bhūta-pubbaṁ bhikkhave Sakko devānaṁ Indo mātalī saṅgāhakaṁ āmantesi:|| ||

"Yojehi samma Mātali sahassayuttaṁ ājañññarathaṁ. Uyyānabhūmiṁ gacchāma su-bhūmiṁ dassanāyā" ti.|| ||

"Evaṁ bhaddantavā" ti kho bhikkhave Mātali saṅgāhako Sakkassa devānam indassa paṭi-s-sutvā sahassayuttaṁ ājañññarathaṁ yochetvā Sakkassa devānam indassa paṭivedesi:|| ||

"Yutto kho te mārisa sahassayutto ājañññaratho yassa dāni kālaṁ maññasī" ti.|| ||

Atha kho bhikkhave Sakko devānaṁ Indo vejayantapāsādā orohanto pañjaliko sudaṁ puthuddisā namassati.|| ||

Atha kho bhikkhave Mātalisaṅgāhako sakkaṁ devānam indaṁ gāthāya ajjhabhāsi:|| ||

Taṁ namassanti tevijjā sabbe bhūmmā ca khattiyā,||
Cattāro ca Mahārājā tidasā ca yasassino,||
Atha kho nāma so yakkho yaṁ tvaṁ sakka namassasīti,|| ||

(Sakko:)|| ||

Maṁ namassanti tevijjā sabbe bhummā ca khattiyā,||
Cattāro ca Mahārājā tidasā ca yassasino.|| ||

Ahañ ca sīla-sampanne cirarattasamāhite,||
Sammā pabba-jite vande Brahma-cariyaparāyane.|| ||

Ye gaha-ṭ-ṭhā puññakarā sīlavanto upāsakā,||
Dhammena dāraṁ posenti te namassāmi mātalīti.|| ||

(Mātali:)|| ||

Seṭṭhā hi kira lokasmiṁ ye tvaṁ sakka namassasi,||
Aham pi te namassāmi ye namassasi vāsavā ti.|| ||

(Therā:)|| ||

Idaṁ vatvāna maghavā devarājā sujampati,||
Puthuddisā namassitvā pamukho ratham āruhī" ti.|| ||

 

§

[235]

Sutta 19

Satthāra-vandanā or Dutiya Sakkanamassana Suttaṁ

[19.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ-|| ||

Bhūta-pubbaṁ bhikkhave Sakko devānaṁ Indo Mātalisaṅgāhakaṁ āmantesi:|| ||

"Yyojehi samma Mātali,||
sahassayuttaṁ ājañññarathaṁ.|| ||

Uyyānabhūmiṁ gacchāma su-bhūmiṁ dassanāyā" ti.|| ||

Evaṁ bhaddantavāti kho bhikkhave Mātalisaṅgāhako Sakkassa devānam indassa paṭi-s-sutvā sahassayuttaṁ ājañññarathaṁ yochetvā Sakkassa devānam indassa paṭivedesi:|| ||

"Yutto kho te mārisa sahassayutto ājañññaratho yassa dāni kālaṁ maññasī" ti.|| ||

Atha kho bhikkhave Sakko devānaṁ Indo vejayantapāsādā orohanto pañjaliko sudaṁ Bhagavantaṁ namassati.|| ||

Atha kho bhikkhave Mātalisaṅgāhako Sakkaṁ devānam indaṁ gāthāya ajjhabhāsi:|| ||

Yaṁ hi devā manussā ca taṁ namassanti vāsava,|| ||

Atha ko nāma so yakkho yaṁ tvaṁ sakka namassasīti?|| ||

(Sakko:)|| ||

Yo idha Sammā Sambuddho asmiṁ loke sa-devake,||
Anomanāmaṁ Satthāraṁ taṁ namassāmi Mātali.|| ||

Yesaṁ rāgo ca doso ca avijjā ca virājitā,||
Khīṇ'āsavā Arahanto te namassāmi Mātali.|| ||

Ye rāga-dosa-vinayā avijjāsamatikkamā,|| ||

Sekhā apacayārāmā appamattānusikkhare,||
Te namassāmi mātalīti.|| ||

(Mātali:)|| ||

Seṭṭhā hi kira lokasmiṁ ye tvaṁ sakka namassasi,||
Aham pi te namassāmi ye namassasi vāsavāti.|| ||

(Therā:)|| ||

Idaṁ vatvāna maghavā devarājā sujampati,||
Bhagavantaṁ namassitvā pamukho ratham āruhī ti.|| ||

 

§

 

Sutta 20

Tatiya Sakkanamassana Suttaṁ

[20.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane ānāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Bhūta-pubbaṁ bhikkhave Sakko devānaṁ Indo Mātalisaṅgāhakaṁ āmantesi:|| ||

"Yojehi samma Mātali,||
sahassayuttaṁ ājañña-rathaṁ uyyāna-bhūmiṁ gacchāma su-bhūmiṁ dassanāyā" ti.|| ||

[236] "Evaṁ bhaddantavā" ti kho bhikkhave,||
Mātali saṅgāhako Sakkassa devānam indassa paṭi-s-sutvā sahassayuttaṁ ājañññarathaṁ yochetvā Sakkassa devānam indassa paṭivedesi:|| ||

Yutto kho te mārisa,||
sahassayutto ājañññaratho,||
yassaḷdāni kālaṁ maññasī ti.|| ||

Atha kho bhikkhave Sakko devānaṁ Indo vejayantapāsādā orohanto pañjaliko sudaṁ bhikkhu-saṅghaṁ namassati.|| ||

Atha kho bhikkhave, Mātali saṅgāhako sakkaṁ devānam indaṁ gāthāhi1 ajjhabhāsi:|| ||

Taṁ hi ete namasseyyuṁ pūtidehasayā narā,||
Nimuggā kuṇapasmete khuppipāsā samappitā.|| ||

Kin nu tesaṁ pihayasi anāgārāna vāsava,||
Ācāraṁ isinaṁ brūhi taṁ suṇoma vaco tavāti.|| ||

(Sakko:)|| ||

Etaṁ tesaṁ pihayāmi anāgārāna Mātali,||
Yamhā gāmā pakkamanti anapekkhā vajanti te.|| ||

Na tesaṁ koṭṭhe openti na kumbhe na khalopiyaṁ,||
Paraniṭṭhitamesānā tena yāpenti subbatā,||
Sumantamantino dhīrā tuṇhī-bhūtā samañcarā,|| ||

Devā viruddhā Asurehi puthu maccā ca Mātali,||
Aviruddhā viruddhesu attadaṇḍesu nibbutā,||
Sādānesu anādānā te namassāmi mātalīti,|| ||

(Mātali:)|| ||

Seṭṭhā hi kira lokasmiṁ ye tvaṁ sakka namassasi,||
Aham pi te namassāmi ye namassasi vāsavāti|| ||

(Therā:)|| ||

Idaṁ sutvāna maghavā devarājā sujampati,||
Bhikkhu-Saṅghaṁ namassitvā pamukho ratham āruhī ti.|| ||

 

---

3. Sakka-Pañcakaṁ

---

 

Sutta 21

Chetvā Suttaṁ

[21.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā [237] Sāvatthiyaṁ viharati Jetavane Anāthapiṇḍikassa ārāme.|| ||

Atha kho Sakko devānaṁ Indo yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhito kho Sakko devānaṁ Indo Bhagavantaṁ gāthāya ajjhabhāsi:|| ||

Kiṁ su chetvā sukhaṁ seti kiṁ su chetvā na socati,||
Kissassa ekadhammassa vadhaṁ rocesi gotamāti.|| ||

(Bhagavā:)|| ||

Kodhaṁ chetvā sukhaṁ seti kodhaṁ chetvā na socati,||
Kodhassa visamūlassa madhura-g-gassa vāsava,||
Vadhaṁ ariyā pasaṁ-santi taṁ hi chetvā na socatī ti.|| ||

 

§

 

Sutta 22

Dubbaṇṇiya Suttaṁ

[22.1][bit][rhyc][bodh][than] Evaṁ me sutaṁ:|| ||

Ekaṁ samayaṁ Sāvatthiyaṁ-|| ||

Bhūta-pubbaṁ bhikkhave,||
aññataro yakkho dubbaṇṇo okoṭimako Sakkassa devānam indassa āsane nisinno ahosi.|| ||

Tatra sudaṁ bhikkhave devā Tāvatiṁsā ujjhāyanti khīyanti vipācenti:|| ||

"Acchariyaṁ vata bho,||
abbhūtaṁ vata bho,||
ayaṁ yakkho dubbaṇṇo okoṭimako Sakkassa devānam indassa āsane nisinnoti.|| ||

Yathā yathā kho bhikkhave,||
devā Tāvatiṁsā ujjhāyanti khīyanti vipācenti,||
tathā tathā so yakkho abhirūpataro c'eva hoti dassanīyataro ca pāsādikataro ca.|| ||

Atha kho bhikkhave devā Tāvatiṁsā yena Sakko devānaṁ Indo ten'upasaṅkamiṁsu.|| ||

Upasaṅkamitvā sakkaṁ devānam indaṁ etad avocuṁ:|| ||

"Idha te mārisa aññataro yakkho dubbaṇṇo okoṭimako tumhākaṁ āsane nisinno.|| ||

Tatra sudaṁ mārisa devā Tāvatiṁsā ujjhāyanti khīyanti vipācenti:|| ||

"Acchariyaṁ vata bho||
abbhūtaṁ vata bho||
ayaṁ yakkho dubbaṇṇo okoṭimako [238] Sakkassa devānam indassa āsane nisinno" ti.|| ||

Yathā yathā kho mārisa devā Tāvatiṁsā ujjhāyanti khīyanti vipācenti,||
tathā tathā so yakkho abhirūpataro c'eva hoti dassanīyataro ca||
pāsādikataro cā ti.|| ||

So hi nūna mārisā ko'dhabhakkho yakkho bhavissatī ti.|| ||

Atha kho bhikkhave,||
Sakko devānaṁ Indo yena so ko'dhabhakkho yakkho ten'upasaṅkami.|| ||

Upasaṅkamitvā ekaṁsaṁ uttarā-saṅgaṁ karitvā dakkhiṇajāṇumaṇḍalaṁ paṭhaviyaṁ nihantvā yena so ko'dhabhakkho yakkho ten'añjaliṁ paṇāmetvā ti-k-khattuṁ nāmaṁ sāvesi Sakko'haṁ1 mārisa devānaṁ Indo,||
Sakko'haṁ mārisa devānaṁ Indo ti.|| ||

Yathā yathā kho bhikkhave,||
Sakko devānaṁ Indo nāmaṁ sāveti,||
tathā tathā so yakkho du-b-baṇṇataro c'eva ahosi okoṭimakataro ca.|| ||

Du-b-baṇṇataro c'eva hutvā okoṭimakataro ca tatth'ev'antara-dhāyī ti.|| ||

Atha kho bhikkhave Sakko devānaṁ Indo sake āsane nisīditvā deve Tāvatiṁse anunayamāno tāyaṁ velāyaṁ imā gāthāyo abhāsi.|| ||

Na sūpahatacitto'mhi nāvattena suvānayo,||
Na vo cirāhaṁ kujhāmi kodho mayi nāvatiṭṭhati.|| ||

Kuddho'haṁ pharusaṁ brūmi na ca dhammāni kittaye,||
Sanniggaṇhāmi attāṇaṁ sampassaṁ attham attano ti.|| ||

 

§

 

Sutta 23

Māyā Suttaṁ

[23.1][rhyc][bodh] Evaṁ me sutaṁ:|| ||

Ekaṁ samayaṁ Sāvatthiyaṁ -|| ||

Bhūta-pubbaṁ bhikkhave,||
Vepacitti asurindo ābādhiko ahosi, dukkhito bāḷha-gilāno.|| ||

Atha kho bhikkhavo,||
Sakko devānaṁ Indo yena Vepacitti asurindo ten'upasaṅkami gilānapucchako.|| ||

Addasā kho bhikkhave,||
Vepacitti asurindo sakkaṁ devānam indaṁ dūrato'va āga-c-chantaṁ.|| ||

Disvāna sakkaṁ devānam indaṁ etad avoca:|| ||

"Tikiccha maṁ devānam indā" ti.|| ||

[239] "Vācehi maṁ Vepacitti sambarīmāyan" ti.|| ||

"Na tāvāhaṁ vācemi yāvāhaṁ mārisa Asure paṭipucchāmī" ti.|| ||

Atha kho bhikkhave Vepacitti asurindo Asure paṭipucchi:|| ||

"Vācemahaṁ mārisā sakkaṁ devānam indaṁ sambarīmāyan" ti.|| ||

"Mā kho tvaṁ mārisa vācesi sakkaṁ devānam indaṁ sambarīmāyan" ti.|| ||

Atha kho bhikkhave Vepacitti asurindo sakkaṁ devānam indaṁ gāthāya ajjhabhāsi:|| ||

Māyāvī maghavā sakka devarājā sujampati,||
Upeti Nirayaṁ ghoraṁ sambaro'va sataṁ saman ti.|| ||

 

§

 

Sutta 24

Accaya Suttaṁ

[24.1][rhyc][bodh][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tena kho pana samayena dve bhikkhū sampayojesuṁ.|| ||

Tatreko bhikkhu accasarā.|| ||

Atha kho so bhikkhu tassa bhikkhuno santike accayaṁ accayato deseti.|| ||

So bhikkhu na paṭigaṇhāti.|| ||

Atha kho sambahulā bhikkhū yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ nisīdiṁsu.|| ||

Eka-m-antaṁ nisinnā kho te bhikkhū Bhagavantaṁ etad avocuṁ:|| ||

"Idha bhante dve bhikkhū sampayojesuṁ.|| ||

Tatreko bhikkhu accasarā.|| ||

Atha kho so bhante bhikkhu tassa bhikkhuno santike accayaṁ accayato deseti.|| ||

So bhikkhu na paṭigaṇhātī" ti.|| ||

Dve me bhikkhave bālā:|| ||

Yo ca accayaṁ accayato na passati,||
yo ca accayaṁ desentassa yathā-dhammaṁ na paṭigaṇhāti.|| ||

Ime kho bhikkhave, dve bālā.|| ||

Dve me bhikkhave paṇḍitā:|| ||

Yo ca accayaṁ accayato passati,||
yo ca accayaṁ desentassa yathā-dhammaṁ paṭigaṇhāti.|| ||

Ime kho bhikkhave dve paṇḍitā,|| ||

Bhūta-pubbaṁ bhikkhave Sakko devānaṁ Indo sudhammāyaṁ sabhāyaṁ deve Tāvatiṁse anunayamāno tāyaṁ velāyaṁ imaṁ gāthā abhāsi.|| ||

[240] Kodho vo vasamāyātu mā ca mitte hi vo jarā,||
Agarahiyaṁ mā garahittha mā ca bhāsittha pesuṇaṁ,||
Atha pāpajanaṁ kodho pabbato cābhimaddatī ti.|| ||

 

§

 

Sutta 25

Akko'dha Suttaṁ

[25.1][rhyc][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tena kho pana samayena dve bhikkhū sampayojesuṁ.|| ||

Tatreko bhikkhu accasarā.|| ||

Atha kho so bhikkhu tassa bhikkhuno santike accayaṁ accayato deseti.|| ||

So bhikkhu na paṭigaṇhā ti.|| ||

Atha kho sambahulā bhikkhū yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ nisīdiṁsu.|| ||

Eka-m-antaṁ nisinnā kho te bhikkhū Bhagavantaṁ etad avocuṁ:|| ||

Idha bhante dve bhikkhū sampayojesuṁ.|| ||

Tatreko bhikkhu accasarā.|| ||

Atha kho so bhante bhikkhu tassa bhikkhuno santike accayaṁ accayato deseti.|| ||

So bhikkhu na paṭigaṇhātī ti.|| ||

Dve me bhikkhave bālā:|| ||

Yo ca accayaṁ accayato na passati,||
yo ca accayaṁ desentassa yathā-dhammaṁ na paṭigaṇhāti.|| ||

Ime kho bhikkhave, dve bālā.|| ||

Dve me bhikkhave paṇḍitā:|| ||

Yo ca accayaṁ accayato passati,||
yo ca accayaṁ desentassa yathā-dhammaṁ paṭigaṇhāti.|| ||

Ime kho bhikkhave dve paṇḍitā.|| ||

Bhūta-pubbaṁ bhikkhave Sakko devānaṁ Indo sudhammāyaṁ sabhāyaṁ deve Tāvatiṁse anunayamāno tāyaṁ loyaṁ imaṁ gāthaṁ abhāsi.|| ||

Mā vo kodho ajjhabhavi mā ca kujjhittha kujjhanaṁ,||
A-k-kodho avihiṁsā ca ariyesu vasati sadā Atha pāpajanaṁ kodho pabbato vābhimaddatī ti.|| ||

Sakka-Saṁyuttaṁ Samattaṁ|| ||

Sagātha Vagga Niṭṭhita