Saṁyutta Nikāya
II. Nidāna Vagga
12. Nidāna Saṁyutta
6. Rukkha Vagga

Sutta 60

Nidāna (Paṭicca-Samuppāda) Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[92]

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Kurūsu viharati Kammāssa-dammaṁ nāma Kurūnaṁ nigamo.|| ||

2. Atha kho āyasmā Ānando yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

3. Eka-m-antaṁ nisinno kho āyasmā Ānando Bhagavantaṁ etad avoca:|| ||

"Acchariyaṁ bhante, abbhūtaṁ bhante.|| ||

Yā ca gambhīro c'āyaṁ bhante,||
paṭicca-samuppādo gambhīrāvabhāso ca,||
atha ca pana me uttānakuttānako viya khāyatī" ti.|| ||

"Mā hevaṁ Ānanda, mā hevaṁ Ānanda!|| ||

Gambhīro c'āyaṁ Ānanda.|| ||

Paṭicca-samuppādo||
gambhirāvabhāso||
ca etassa Ānanda.|| ||

Dhammassa aññāṇā||
ananubodhā||
appaṭivedhā||
evam ayaṁ pajā||
tant'ākula-kajātā guḷāguṇṭhika||
jātā muñjababbajabhūtā||
apāyaṁ||
duggatiṁ||
vinipātaṁ||
saṁsāraṁ||
nāti-vattati.|| ||

5. Upādānīyesu Ānanda, dhammesu assādānupassino viharato viññāṇassa avakkanti hoti.|| ||

Viññāṇa-paccayā nāma-rūpaṁ.|| ||

Nāma-rūpa-paccayā saḷāyatanaṁ.|| ||

Saḷāyatana-paccayā phasso.|| ||

Phassa-paccayā vedanā.|| ||

Vedanā-paccayā taṇhā.|| ||

Taṇhā-paccayā upādānaṁ.|| ||

Upādāna-paccayā bhavo.|| ||

Bhava-paccayā jāti.|| ||

Jāti-paccayā jarā-māraṇaṁ,||
soka-parideva-dukkha-domanass-upāyāsā sambhavanti.|| ||

Evam etassa kevalassa dukkha-k-khandhassa samudayo hoti.|| ||

6. Seyyathā pi Ānanda, mahārukkho,||
tassa yāni c'eva mūlāni adhogamāni yāni ca tiriyaṅgamāni,||
sabbāni tāni uddhaṁ ojaṁ abhiharanti.|| ||

Evaṁ hi so Ānanda mahārukkho tadāhāro tadūpādāno ciraṁ dīgham addhānaṁ tiṭṭheyya.|| ||

7. Evam eva kho Ānanda,||
upādānīyesu dhammesu assādānupassino viharato viññāṇassa avakkanti hoti.|| ||

Viññāṇa-paccayā nāma-rūpaṁ.|| ||

Nāma-rūpa-paccayā saḷāyatanaṁ.|| ||

Saḷāyatana-paccayā phasso.|| ||

Phassa-paccayā vedanā.|| ||

Vedanā-paccayā taṇhā.|| ||

Taṇhā-paccayā [93] upādānaṁ.|| ||

Upādāna-paccayā bhavo.|| ||

Bhava-paccayā jāti.|| ||

Jāti-paccayā jarā-māraṇaṁ,||
soka-parideva-dukkha-domanass-upāyāsā sambhavanti.|| ||

Evam etassa kevalassa dukkha-k-khandhassa samudayo hoti.|| ||

8. Upādānīyesu Ānanda,||
dhammesu ādīnavānupassino viharato viññāṇassa avakkanti na hoti.|| ||

Viññāṇa-nirodhā nāma-rūpa-nirodho.|| ||

Nāma-rūpa-nirodhā saḷāyatana-nirodho.|| ||

Saḷāyatana-nirodhā phassa-nirodho.|| ||

Phassa-nirodhā vedanā-nirodho.|| ||

Vedanā-nirodhā taṇhā-nirodho.|| ||

Taṇhā-nirodhā upādāna-nirodho.|| ||

Upādāna-nirodhā bhava-nirodho.|| ||

Bhava-nirodhā jāti-nirodho.|| ||

Jāti-nirodhā jarā-māraṇaṁ,||
soka-parideva-dukkha-domanass-upāyāsā nirujjhanti.|| ||

Evam etassa kevalassa dukkha-k-khandhassa nirodho hotī.|| ||

9. Seyyathā pi Ānanda, mahārukkho,||
atha puriso āgaccheyya kuddāla-piṭakaṁ ādāya||
so taṁ rukkhaṁ mūle chindeyya||
mūle chetvā paliṁ khaṇeyya||
paliṁ khaṇitvā mūlāni uddhareyya antamaso usīranāḷamattānipi,||
so taṁ rukkhaṁ khaṇḍākhaṇḍikaṁ chindeyya||
khaṇḍākhaṇḍikaṁ chetvā phāleyya||
phāletvā sakalikaṁ sakalikaṁ kareyya||
sakalikaṁ sakalikaṁ karitvā vāt'ātape visoseyya,||
vāt'ātape visosetvā agginā ḍaheyya||
agginā ḍahetvā masiṁ kareyya||
masiṁ karitvā mahāvāte vā opuneyya||
nadiyā vā sīgha-sotāya pavāheyya.|| ||

Evaṁ hi so Ānanda mahārukkho ucchinnanamūlo assa||
tālā-vatthu-kato anabhāva-kato āyatiṁ anuppāda-dhammo.|| ||

10. Evam eva kho Ānanda,||
upādānīyesu dhammesu ādīnavānupassino viharato viññāṇassa avakkanti na hoti.|| ||