Saṁyutta Nikāya
II. Nidāna Vagga
12. Nidāna Saṁyutta
7. Mahā Vagga

Sutta 63

Putta-Maṁsa Suttaṁ

 

---

 

[1][pts][bodh][than][olds] Sāvatthiyaṁ —|| ||

[98] "Cattāro me bhikkhave, āhārā bhūtānaṁ vā||
sattāṇaṁ ṭhitiyā sambhavesīnaṁ vā anuggahāya.|| ||

Katame cattāro?|| ||

Kabalīṅkāro āhāro||
oḷāriko vā||
sukhumo vā,||
phasso dutiyo,||
mano-sañcetanā tatiyā,||
viññāṇaṁ catutthaṁ.|| ||

Ime kho bhikkhave, cattāro āhārā bhūtānaṁ vā||
sattāṇaṁ ṭhitiyā sambhavesīnaṁ vā anuggahāya.|| ||

 

§

 

Kathaṁ ca bhikkhave,||
kabalīṅkāro āhāro daṭṭhabbo?|| ||

Seyyathā pi, bhikkhave,||
dve jayampatikā parittaṁ sambalam ādāya kantāramaggaṁ paṭipajjeyyuṁ,||
tesam assa eka-puttako piyo manāpo.|| ||

Atha kho tesaṁ bhikkhave,||
dvinnaṁ jayampatikānaṁ kantāra-gatānaṁ yā parittā sambalamattā,||
sā parikkhayaṁ pariyādānaṁ gaccheyya.|| ||

Siyā ca n'esaṁ kantarāvaseso anittiṇṇo.|| ||

Atha kho tesaṁ bhikkhave,||
dvinnaṁ jayampatikānaṁ evam assa:|| ||

'Amhākaṁ kho yā parittā sambalamattā,||
sā parikkhīṇā pariyādinnā.|| ||

Atthi c'āyaṁ kantārāvaseso an'atthiṇṇo.|| ||

Yannuna mayaṁ imaṁ eka-puttakaṁ piyaṁ manāpaṁ vadhitvā vallūrañca soṇḍikañca karitvā puttamaṁsāni khādantā evantaṁ kantārāvasesaṁ nitthareyyāma,||
mā sabb'eva tayo vinassimhā' ti.|| ||

Atha kho te bhikkhave, dve jayampatikā taṁ eka-puttakaṁ piyaṁ manāpaṁ vadhitvā vallūrañ ca||
soṇḍikañ ca||
karitvā puttamaṁsāni khādantā evaṁtaṁ kantārāvasesaṁ nitthareyyuṁ.|| ||

Te puttamaṁsāni c'eva khādeyyuṁ,||
ure ca patipiṁseyyuṁ.|| ||

'Kahaṁ eka-puttaka,||
kahaṁ eka-puttakā' ti?|| ||

Taṁ kiṁ maññatha bhikkhave?|| ||

Api nu te davāya vā āhāraṁ āhareyyuṁ?|| ||

Madāya vā āhāraṁ āhareyyuṁ?|| ||

[99] Maṇḍanāya vā āhāraṁ āhareyyuṁ?|| ||

Vibhūsanāya vā āhāraṁ āhareyyuṁ?"|| ||

"No h'etaṁ bhante" ti.|| ||

"Nanu te bhikkhave,||
yāva-d-eva kantārassa nittharaṇatthāya āhāraṁ āhareyyun" ti?|| ||

"Evaṁ bhante" ti.|| ||

"Evam eva khv'āhaṁ bhikkhave,||
kabaliṅkāro āhāro daṭṭhabbo ti vadāmi.|| ||

Kabaliṅkāre bhikkhave āhāre pariññāte pañcakāma-guṇiko rāgo pariññato hoti.|| ||

Pañcakāma-guṇike rāge pariññate n'atthi taṁ saṁyojanaṁ,||
yena saṁyojanena saṁyutto ariya-sāvako puna imaṁ lokaṁ āgaccheyya.|| ||

■

Kathañ ca bhikkhave, phass-ā-hāro daṭṭhabbo?|| ||

Seyyathā pi, bhikkhave,||
gāvī niccammā kuḍḍañce nissāya tiṭṭheyya,||
ye kuḍḍanissitā pāṇā te naṁ khādeyyuṁ.|| ||

Rukkhañce nissāya tiṭṭheyya,||
ye rukkhanissitā pāṇā te naṁ khādeyyuṁ.

Udakañce nissāya tiṭṭheyya,||
ye udakanissitā pāṇā te naṁ khādeyyuṁ.

Ākāsañce nissāya tiṭṭheyya,||
ye ākāsanissitā pāṇā te naṁ khādeyyuṁ.|| ||

Yaññad'eva hi sā bhikkhave,||
gāvī niccammā nissāya tiṭṭheyya,||
ye tannissitā tannissitā pāṇā te naṁ khādeyyuṁ.|| ||

Evam eva khv'āhaṁ bhikkhave phass-ā-hāro daṭṭhabbo ti vadāmi.|| ||

Phasse bhikkhave,||
āhāre pariññāte tisso vedanā pariññātā honti.|| ||

Tīsu vedanāsu pariññātāsu ariya-sāvakassa n'atthi kiñci uttariṁ karaṇīyanti vadāmi.|| ||

■

Kathañ ca bhikkhave,||
mano-sañcetan-āhāro daṭṭhabbo?|| ||

Seyyathā pi, bhikkhave, aṅg'ārakāsu sādhika-porisā puṇṇā aṅgārānaṁ vīt'accikānaṁ vīta-dhūmānaṁ.|| ||

Atha puriso āgaccheyya jīvit-u-kāmo amarit-u-kāmo sukha-kāmo dukkha-paṭikkulo.|| ||

Tam enaṁ dve balavanto purisā nānā bāhāsu gahetvā taṁ aṅg'ārakāsuṁ upakaḍḍheyyuṁ.|| ||

Atha kho bhikkhave,||
tassa purisassa ārakāvassa cetanā ārakā patthanā ārakā paṇidhi.|| ||

[100] Taṁ kissa hetu?|| ||

Evaṁ hi bhikkhave, tassa purisassa hoti:|| ||

Imañ c'āhaṁ aṅg'ārakāsuṁ papatissāmi,||
tato nidānaṁ maraṇaṁ vā nigacchāmi,||
maraṇa-mattaṁ vā dukkhan ti.|| ||

Evam eva khv'āhaṁ bhikkhave,||
Mano-sañcetan-āhāro daṭṭhabbo ti vadāmi.|| ||

Mano-sañcetanāya bhikkhave,||
āhāre pariññāte tisso taṇhā pariññātā honti.|| ||

Tīsu taṇhāsu pariññātāsu ariya-sāvakassa n'atthi uttariṁ karaṇīyan ti vadāmi.|| ||

■

Katañ ca bhikkhave,||
viññāṇ-ā-hāro daṭṭhabbo?|| ||

Seyyathā pi, bhikkhave,||
coraṁ āgucāriṁ gahetvā rañño dasseyyuṁ:|| ||

'Ayante deva, coro āgucārī,||
imassa yaṁ icchtaṁ taṁ daṇḍaṁ paṇehī' ti.|| ||

Tam enaṁ rājā evaṁ vadeyya:|| ||

'Gacchatha, bho,||
imaṁ purisaṁ pubbaṇha-samayaṁ sattisatena hanathā' ti.|| ||

Tam enaṁ pubbaṇha-samayaṁ sattisatena haneyyuṁ.|| ||

Atha rājā majjhantikaṁ samayaṁ evaṁ vadeyya:|| ||

'Ambho, kathaṁ so puriso' ti?|| ||

'Tath'eva deva jīvatī' ti.|| ||

Tam enaṁ rājā evaṁ vadeyya:|| ||

'Gacchatha bho,||
taṁ purisaṁ majjhantikasamayaṁ sattisatena hanathā' ti.|| ||

Tam enaṁ majjhantikasamayaṁ sattisatena haneyyuṁ.|| ||

Atha rājā sāyaṇhasamayaṁ evaṁ vadeyya:|| ||

'Ambho, kathaṁ so puriso' ti?|| ||

'Tath'eva deva jīvatī' ti.|| ||

Tam enaṁ rājā evaṁ vadeyya:|| ||

'Gacchatha bho,||
taṁ purisaṁ sāyaṇhasamayaṁ sattisatena hanathā' ti.|| ||

Tam enaṁ sāyaṇha-samayaṁ sattisatena haneyyuṁ.|| ||

Taṁ kiṁ maññatha bhikkhave?|| ||

Api nu so puriso divasaṁ tīhi sattisatehi haññamāno tato nidānaṁ dukkhaṁ domanassaṁ paṭisaṁvedayethā" ti?|| ||

"Ekissā pi bhante,||
sattiyā haññamāno tato nidānaṁ dukkhaṁ domanassaṁ paṭisaṁvedayetha.|| ||

Ko pana vādo tīhi sattisatehi haññamāno" ti.|| ||

"Evam eva khv'āhaṁ bhikkhave,||
viññāṇ-ā-hāro daṭṭhabbo' ti vadāmi.|| ||

Viññāṇe bhikkhave, āhāre pariññāte nāma-rūpaṁ pariññātaṁ hoti.|| ||

Nāma-rūpe pariññāte ariya-sāvakassa n'atthi kiñci uttariṁ karaṇīyanti vadāmī" ti.|| ||