Dutiya Vedanānā
[No Vedanā-Nānatta]
Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[pts][bodh][olds] Evaṁ me sutaṁ:|| ||

Ekaṁ samayaṁ Sāvatthiyaṁ viharati Jetavane Anāthapiṇḍikassa ārāme.|| ||

2. "Dhātu-nānattaṁ bhikkhave, paṭicca uppajjati phassa-nānattaṁ,||
phassa-nānattaṁ paṭicca uppajjati vedanā-nānattaṁ.|| ||

No vedanā-nānattaṁ paṭicca uppajjati phassa-nānattaṁ,||
no phassa-nānattaṁ paṭicca uppajjati dhātu-nānattaṁ.|| ||

3. Katamañ ca bhikkhave dhātu-nānattaṁ?|| ||

4. Cakkhu-dhātu||
sota-dhātu||
ghāṇa-dhātu||
jivhā-dhātu||
kāya-dhātu||
mano-dhātu.|| ||

Idaṁ vuccati bhikkhave dhātu-nānattaṁ.|| ||

4. Kathañ ca bhikkhave, dhātu-nānattam paṭicca uppajjati phassa-nānattaṁ,||
phassa-nānattaṁ paṭicca uppajjati vedanā-nānattaṁ.|| ||

No vedanā-nānattaṁ paṭicca uppajjati phassa-nānattaṁ,||
no phassa-nānattaṁ paṭicca uppajjati dhātu-nānattaṁ?|| ||

5. Cakkhu-dhātum bhikkhave, paṭicca uppajjati cakkhu-samphasso||
cakkhu-samphassaṁ paṭicca uppajjati cakkhu-samphassajā vedanā.|| ||

No cakkhu-samphassajaṁ vedanaṁ [143] paṭicca uppajjati cakkhu-samphasso,||
no cakkhu-samphassaṁ paṭicca uppajjati cakkhu-dhātu.|| ||

6. Sota-dhātuṁ paṭicca uppajjati sota-samphasso,||
sota-samphassaṁ paṭicca uppajjati sota-samphassajā vedanā.|| ||

No sota-samphassajaṁ vedanaṁ paṭicca uppajjati cakkhu-samphasso,||
no sota-samphassaṁ paṭicca uppajjati sota-dhātu.|| ||

7. Ghāṇa-dhātuṁ paṭicca uppajjati ghāṇa-samphasso,||
ghāṇa-samphassaṁ paṭicca uppajjati ghāṇa-samphassajā vedanā.|| ||

No ghāṇa-samphassajaṁ vedanaṁ paṭicca uppajjati ghāṇa-samphasso,||
no ghāṇa-samphassaṁ paṭicca uppajjati ghāṇa-dhātu.|| ||

8. Jivhā-dhātuṁ paṭicca uppajjati jivhā-samphasso,||
jivhā-samphassaṁ paṭicca uppajjati jivhā-samphassajā vedanā.|| ||

No jivhā-samphassajaṁ vedanaṁ paṭicca uppajjati jivhā-samphasso,||
no jivhā-samphassaṁ paṭicca uppajjati jivhā-dhātu.|| ||

9. Kāya-dhātuṁ paṭicca uppajjati kāya-samphasso,||
kāya-samphassaṁ paṭicca uppajjati kāya-samphassajā vedanā.|| ||

No kāya-samphassajaṁ vedanaṁ paṭicca uppajjati kāya-samphasso,||
no kāya-samphassaṁ paṭicca uppajjati kāya-dhātu.|| ||

10. Mano-dhātuṁ paṭicca uppajjati mano-samphasso,||
mano-samphassaṁ paṭicca uppajjati mano-samphassajā vedanā.|| ||

No mano-samphassajaṁ vedanaṁ paṭicca uppajjati mano-samphasso,||
no mano-samphassaṁ paṭicca uppajjati mano-dhātu.|| ||

11. Evaṁ kho bhikkhave, dhātu-nānattaṁ paṭicca uppajjati phassa-nānattaṁ||
phassa-nānattaṁ paṭicca uppajjati vedanā-nānattaṁ.|| ||

No vedanā-nānattaṁ paṭicca uppajjati phassa-nānattaṁ,||
no phassa-nānattaṁ paṭicca uppajjati dhātu-nānattan" ti.|| ||