Saṁyutta Nikāya
II. Nidāna Vagga
14. Dhātu-Saṁyuttaṁ
I. Nānatta Vagga Paṭhama
1. Bāhira-Pañcakaṁ

Sutta 9

Paṭhama Phassa
[Lābha-Nānatta]
Suttaṁ

 

---

[146]

[1] Evaṁ me sutaṁ||
Ekaṁ samayaṁ Sāvatthiyaṁ viharati Jetavane Anāthapiṇḍikassa ārāme.|| ||

2. "Dhātu-nānattaṁ bhikkhave, paṭicca uppajjati saññā-nānattaṁ,||
saññā-nānattaṁ paṭicca uppajjati saṅkappa-nānattaṁ,||
saṅkappa-nānattaṁ paṭicca uppajjati phassa-nānattaṁ,||
phassa-nānattaṁ paṭicca uppajjati vedanā-nānattaṁ,||
vedanā-nānattaṁ paṭicca uppajjati chanda-nānattaṁ,||
chanda-nānattaṁ paṭicca uppajjati pariḷāhā-nānattaṁ,||
pariḷāha-nānattaṁ paṭicca uppajjati pariyesanā-nānattaṁ,||
pariyesanā-nānattaṁ paṭicca uppajjati lābha-nānattaṁ.|| ||

3. Katamañ ca bhikkhave, dhātu-nānattaṁ?|| ||

Rūpa-dhātu,||
sadda-dhātu,||
gandha-dhātu,||
rasa-dhātu,||
phoṭṭhabba-dhātu,||
dhamma-dhātu,||
mano-viññāṇa-dhātu.|| ||

Idaṁ vuccati bhikkhave dhātu-nānattaṁ.|| ||

4. Kathañ ca bhikkhave, dhātu-nānattaṁ paṭicca uppaj- [147] jati saññā-nānattaṁ,||
saññā-nānattaṁ paṭicca uppajjati saṅkappa-nānattaṁ,||
saṅkappa-nānattaṁ paṭicca uppajjati phassa-nānattaṁ,||
phassa-nānattaṁ paṭicca uppajjati vedanā-nānattaṁ,||
vedanā-nānattaṁ paṭicca uppajjati chanda-nānattaṁ,||
chanda-nānattaṁ paṭicca uppajjati pariḷāhā-nānattaṁ,||
pariḷāha-nānattaṁ paṭicca uppajjati pariyesanā-nānattaṁ,||
pariyesanā-nānattaṁ paṭicca uppajjati lābha-nānattaṁ?|| ||

5. Rūpa-dhātuṁ bhikkhave, paṭicca uppajjati rūpa-saññā,||
rūpa-saññaṁ paṭicca uppajjati rūpa-saṅkappo,||
rūpa-saṅkappaṁ paṭicca uppajjati rūpa-samphasso,||
rūpa-samphassaṁ paṭicca uppajjati rūpa-samphassajā vedanā,||
rūpa-samphassajaṁ vedanaṁ paṭicca uppajjati rūpa-c-chando,||
rūpa-c-chandaṁ paṭicca uppajjati rūpa-pariḷāho,||
rūpa-pariḷāhaṁ paṭicca uppajjati rūpa-pariyesanā,||
rūpa-pariyesanaṁ paṭicca uppajjati rūpa-lābho.|| ||

6. Sadda-dhātuṁ bhikkhave, paṭicca uppajjati sadda-saññā,||
sadda-saññaṁ paṭicca uppajjati sadda-saṅkappo,||
sadda-saṅkappaṁ paṭicca uppajjati sadda-samphasso,||
sadda-samphassaṁ paṭicca uppajjati sadda-samphassajā vedanā,||
sadda-samphassajaṁ vedanaṁ paṭicca uppajjati sadda-c-chando,||
sadda-c-chandaṁ paṭicca uppajjati sadda-pariḷāho,||
sadda-pariḷāhaṁ paṭicca uppajjati sadda-pariyesanā,||
sadda-pariyesanaṁ paṭicca uppajjati saddalābho.|| ||

7. Gandha-dhātuṁ bhikkhave, paṭicca uppajjati gandha-saññā,||
gandha-saññaṁ paṭicca uppajjati gandha-saṅkappo,||
gandha-saṅkappaṁ paṭicca uppajjati gandha-samphasso,||
gandha-samphassaṁ paṭicca uppajjati gandha-samphassajā vedanā,||
gandha-samphassajaṁ vedanaṁ paṭicca uppajjati gandha-c-chando,||
gandha-c-chandaṁ paṭicca uppajjati gandha-pariḷāho,||
gandha-pariḷāhaṁ paṭicca uppajjati gandha-pariyesanā,||
gandha-pariyesanaṁ paṭicca uppajjati gandha-lābho.|| ||

8. Rasa-dhātuṁ bhikkhave, paṭicca uppajjati rasa-saññā,||
rasa-saññaṁ paṭicca uppajjati rasa-saṅkappo,||
rasa-saṅkappaṁ paṭicca uppajjati rasa-samphasso,||
rasa-samphassaṁ paṭicca uppajjati rasa-samphassajā vedanā,||
rasa-samphassajaṁ vedanaṁ paṭicca uppajjati rasa-c-chando,||
rasa-c-chandaṁ paṭicca uppajjati rasa-pariḷāho,||
rasa-pariḷāhaṁ paṭicca uppajjati rasa-pariyesanā,||
rasa-pariyesanaṁ paṭicca uppajjati rasa-lābho.|| ||

9. Phoṭṭhabba-dhātuṁ bhikkhave, paṭicca uppajjati phoṭṭhabba-saññā,||
phoṭṭhabba-saññaṁ paṭicca uppajjati phoṭṭhabba-saṅkappo,||
phoṭṭhabba-saṅkappaṁ paṭicca uppajjati phoṭṭhabba-samphasso,||
phoṭṭhabba-samphassaṁ paṭicca uppajjati phoṭṭhabba-samphassajā vedanā,||
phoṭṭhabba-samphassajaṁ vedanaṁ paṭicca uppajjati phoṭṭhabba-c-chando,||
phoṭṭhabba-c-chandaṁ paṭicca uppajjati phoṭṭhabba-pariḷāho,||
phoṭṭhabba-pariḷāhaṁ paṭicca uppajjati phoṭṭhabba-pariyesanā,||
phoṭṭhabba-pariyesanaṁ paṭicca uppajjati phoṭṭhabba-lābho.|| ||

10. Dhamma-dhātuṁ bhikkhave, paṭicca uppajjati dhamma-saññā,||
dhamma-saññaṁ paṭicca uppajjati dhamma-saṅkappo,||
dhamma-saṅkappaṁ paṭicca uppajjati dhamma-samphasso,||
dhamma-samphassaṁ paṭicca uppajjati dhamma-samphassajā vedanā,||
dhamma-samphassajā vedanaṁ paṭicca uppajjati dhamma-c-chando,||
dhamma-c-chandaṁ paṭicca uppajjati dhamma-pariḷāho,||
dhamma-pariḷāhaṁ paṭicca uppajjati dhamma-pariyesanā,||
dhamma-pariyesanaṁ paṭicca uppajjati dhamma-lābho.|| ||

11. Evaṁ kho bhikkhave, dhātu-nānattaṁ paṭicca uppajjati saññā-nānattaṁ,||
saññā-nānattaṁ paṭicca uppajjati saṅkappa-nānattaṁ,||
saṅkappa-nānattaṁ paṭicca uppajjati phassa-nānattaṁ,||
phassa-nānattaṁ paṭicca uppajjati vedanā-nānattaṁ,||
vedanā-nānattaṁ paṭicca uppajjati chanda-nānattaṁ,||
chanda-nānattaṁ paṭicca uppajjati pariḷāhā-nānattaṁ,||
pariḷāha-nānattaṁ paṭicca uppajjati pariyesanā-nānattaṁ,||
pariyesanā-nānattaṁ paṭicca uppajjati lābha-nānattaṁ" ti.|| ||