Saṁyutta Nikāya
II. Nidāna Vagga
14. Dhātu-Saṁyuttaṁ
II. Dutiya Vagga

Sutta 16

Sa-Gātha Suttaṁ

 

---

[157]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Dhātusova bhikkhave, sattā saṁsandanti samenti.|| ||

Hīn-ā-dhimuttikā hīn-ā-dhimuttikehi saddhiṁ saṁsandanti samenti.|| ||

3. Atītam pi bhikkhave, addhānaṁ dhātuso va sattā saṁsandiṁsu samiṁsu.|| ||

Hīn-ā-dhimuttikā hīn-ā-dhimuttikehi saddhiṁ saṁsandiṁsu samiṁsu.|| ||

4. Anāgatam pi bhikkhave addhānaṁ dhātuso va sattā saṁsandissanti samessanti:|| ||

Hīn-ā-dhimuttikā hīn-ā-dhimuttikehi saddhiṁ saṁsandissanti samessanti.|| ||

5. Etarahi pi bhikkhave, pacc'uppannaṁ addhānaṁ dhātuso va sattā saṁsandanti samenti.|| ||

Hīn-ā-dhimuttikā hīn-ā-dhimuttikehi saddhiṁ saṁsandanti samenti.|| ||

6. Seyyathā pi bhikkhave, pi gūtho gūthena saṁsandati sameti.|| ||

Muttaṁ muttena saṁsandati sameti.|| ||

Khelo khelena saṁsandati sameti.|| ||

Pubbo pubbena saṁsandati sameti.|| ||

Lohitaṁ lohitena saṁsandati sameti.|| ||

Evam eva kho bhikkhave, dhātuso va sattā saṁsandanti samenti:|| ||

Hīn-ā-dhimuttikā hīn-ā-dhimuttikehi saddhiṁ saṁsandanti samenti.|| ||

7. Atītam pi bhikkhave, addhānaṁ dhātuso va sattā saṁsandiṁsu samiṁsu:|| ||

Hīn-ā-dhimuttikā hīn-ā-dhimuttikehi saddhiṁ saṁsandiṁsu samiṁsu.|| ||

8. Anāgatam pi bhikkhave, addhānaṁ dhātuso va sattā saṁsandissanti samessanti:|| ||

Hīn-ā-dhimuttikā hīn-ā-dhimuttikehi saddhiṁ saṁsandissanti samessanti.|| ||

9. Etarahi pi bhikkhave, pacc'uppannaṁ addhānaṁ dhātuso va sattā saṁsandanti samenti:|| ||

Hīn-ā-dhimuttikā hīn-ā-dhimuttikehi saddhiṁ saṁsandanti samenti.|| ||

 

§

 

[158] 10. Dhātuso va bhikkhave, sattā saṁsandanti samenti:|| ||

Kalyāṇ-ā-dhimuttikā kalyāṇ-ā-dhimuttikehi saddhiṁ saṁsandanti samenti.|| ||

11. Atītam pi bhikkhave, addhānaṁ dhātuso va sattā saṁsandiṁsu samiṁsu:|| ||

Kalyāṇ-ā-dhimuttikā kalyāṇ-ā-dhimuttikehi saddhiṁ saṁsandiṁsu samiṁsu.|| ||

12. Anāgatam pi bhikkhave, addhānaṁ dhātuso va sattā saṁsandissanti samessanti.|| ||

Kalyāṇ-ā-dhimuttikā kalyāṇ-ā-dhimuttikehi saddhiṁ saṁsandissanti samessanti.|| ||

13. Etarahi pi bhikkhave, pacc'uppannaṁ addhānaṁ dhātuso va sattā saṁsandanti samenti:|| ||

Kalyāṇ-ā-dhimuttikā kalyāṇ-ā-dhimuttikehi saddhiṁ saṁsandanti samenti.|| ||

14. Seyyathā pi bhikkhave, khīraṁ khīrena saṁsandati sameti.|| ||

Telaṁ telena saṁsandati sameti.|| ||

Sappi sappinā saṁsandati sameti.|| ||

Madhu madhunā saṁsandati sameti.|| ||

Phāṇitaṁ phāṇitena saṁsandati sameti.|| ||

Evam eva kho bhikkhave, dhātuso va sattā saṁsandanti samenti:|| ||

Kalyāṇ-ā-dhimuttikā kalyāṇ-ā-dhimuttikehi saddhiṁ saṁsandanti samenti.|| ||

15. Atītam pi bhikkhave, addhānaṁ dhātuso va sattā saṁsandiṁsu samiṁsu.|| ||

16. Anāgatam pi bhikkhave, addhānaṁ dhātuso va sattā saṁsandissanti samessanti:|| ||

17. Etarahi pi bhikkhave, pacc'uppannaṁ addhānaṁ dhātuso va sattā saṁsandanti samenti:|| ||

Kalyāṇ-ā-dhimuttikā kalyāṇ-ā-dhimuttikehi saddhiṁ saṁsandanti samentī" ti.|| ||

18. Idam avoca Bhagavā.|| ||

Idaṁ vatvā Sugato athāparaṁ etad avoca Satthā:

Saṁsaggā vanatho jāto||
asaṁsaggena chijjati,||
parittaṁ dārum āruyha||
yathā sīde mahaṇṇave

Evaṁ kusītam āgamma||
sādhujīvī pi sīdati,||
tasmā taṁ parivajjeyya||
kusītaṁ hīnavīriyaṁ,|| ||

Pavivittehi ariyehi||
pahit'attehi jhāyihi,||
niccaṁ āraddha-viriyehi||
paṇḍitehi sahāvaseti.|| ||