Saṁyutta Nikāya
II. Nidāna Vagga
14. Dhātu-Saṁyuttaṁ
II. Dutiya Vagga

Sutta 22

Kusita [Kusita-Mulaka-Tik'Eka] Suttaṁ

 

---

[165]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Dhātuso va bhikkhave, sattā saṁsandanti samenti:|| ||

Kusītā kusītehi saddhiṁ saṁsandanti samenti,||
muṭṭha-s-satino muṭṭhassatīhi saddhiṁ saṁsandanti samenti,||
duppaññā duppaññehi saddhiṁ saṁsandanti samenti.|| ||

Āraddha-viriyā āraddha-viriyehi saddhiṁ saṁsandanti samenti,||
upatthika-satino upatthikasatīhi saddhiṁ saṁsandanti samenti,||
paññavanto paññavantehi saddhiṁ saṁsandanti samenti.|| ||

3. Atītam pi bhikkhave addhānaṁ dhātuso va sattā saṁsandiṁsu samiṁsu:|| ||

Kusītā kusītehi saddhiṁ saṁsandiṁsu samiṁsu,||
muṭṭha-s-satino muṭṭhassatīhi saddhiṁ saṁsandiṁsu samiṁsu,||
duppaññā duppaññehi saddhiṁ saṁsandiṁsu samiṁsu.|| ||

Āraddha-viriyā āraddha-viriyehi saddhiṁ saṁsandiṁsu samiṁsu,||
upatthika-satino upatthikasatīhi saddhiṁ saṁsandiṁsu samiṁsu,||
paññavanto paññavantehi saddhiṁ saddhiṁ saṁsandiṁsu samiṁsu.|| ||

4. Anāgatam pi bhikkhave addhānaṁ dhātuso va sattā saṁsandissanti samessanti:|| ||

Kusītā kusītehi saddhiṁ saṁsandissanti samessanti,||
muṭṭha-s-satino muṭṭhassatīhi saddhiṁ saṁsandissanti samessanti,||
duppaññā duppaññehi saddhiṁ saṁsandissanti samessanti.|| ||

Āraddha-viriyā āraddha-viriyehi saddhiṁ saṁsandissanti samessanti,||
upatthika-satino upatthikasatīhi saddhiṁ saṁsandissanti samessanti,||
paññavanto paññavantehi saddhiṁ saṁsandissanti samessanti.|| ||

5. Etarahi pi bhikkhave, pacc'uppannaṁ addhānaṁ dhātuso va sattā saṁsandanti samenti:|| ||

Kusītā kusītehi saddhiṁ saṁsandanti samenti,||
muṭṭha-s-satino muṭṭhassatīhi saddhiṁ saṁsandanti samenti,||
duppaññā duppaññehi saddhiṁ saṁsandanti samenti.|| ||

Āraddha-viriyā āraddha-viriyehi saddhiṁ saṁsandanti samenti,||
upatthika-satino upatthikasatīhi saddhiṁ saṁsandanti samenti,||
paññavanto paññavantehi saddhiṁ saṁsandanti samenti" ti.|| ||