Saṁyutta Nikāya
II. Nidāna Vagga
14. Dhātu-Saṁyuttaṁ
III. Kamma-Patha Vagga

Sutta 26

Satta Kamma-Patha Suttaṁ

 

---

[167]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Dhātuso va bhikkhave, sattā saṁsandanti samenti:|| ||

3. Pāṇ-ā-tipātino pāṇ-ā-tipātīhi saddhiṁ saṁsandanti samenti,||
adinn'ādāyino adinn'ādāyīhi saddhiṁ saṁsandanti samenti,||
kāmesu micchā-cārayo kāmesu micchā-cārīhi saddhiṁ saṁsandanti samenti,||
musā-vādino musā-vādīhi saddhiṁ saṁsandanti samenti,||
pisuṇāvācā pisuṇā-vācehi saddhiṁ saṁsandanti samenti,||
pharusā-vācā pharusā-vācehi saddhiṁ saṁsandanti samenti,||
sampha-p-palāpino sampha-p-palāpīhi saddhiṁ saṁsandanti samenti.|| ||

Pāṇ-ā-tipātā paṭiviratā pāṇ-ā-tipātā paṭiviratehi saddhiṁ saṁsandanti samenti,||
adinn'ādānā paṭiviratā adinn'ādānā paṭiviratehi saddhiṁ saṁsandanti samenti,||
kāmesu micchā-cārā paṭiviratā kāmesu micchā-cārā paṭiviratehi saddhiṁ saṁsandanti samenti,||
musā-vādā paṭiviratā musā-vādā paṭiviratehi saddhiṁ saṁsandanti samenti,||
pisuṇāya vācāya1 paṭiviratā pisuṇāya vācāya paṭiviratehi saddhiṁ saṁsandanti samenti,||
pharusāya vācāya paṭiviratā pharusāya vācāya paṭiviratehi saddhiṁ saṁsandanti samenti,||
sampha-p-palāpā paṭiviratā sampha-p-palāpā paṭiviratehi saddhiṁ saṁsandanti samenti" ti.|| ||