Saṃyutta Nikāya
II. Nidāna Vagga
14. Dhātu-Saṃyuttaṃ
III. Kamma-Patha Vagga
Sutta 27
Dasa Kamma-Patha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
[168] Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
2. "Dhātuso va bhikkhave, sattā saṃsandanti samenti:|| ||
3. Pāṇ-ā-tipātino pāṇ-ā-tipātīhi saddhiṃ saṃsandanti samenti,||
adinn'ādāyino adinn'ādāyīhi saddhiṃ saṃsandanti samenti,||
kāmesu micchā-cārayo kāmesu micchā-cārīhi saddhiṃ saṃsandanti samenti,||
musā-vādino musā-vādīhi saddhiṃ saṃsandanti samenti,||
pisuṇāvācā pisuṇā-vācehi saddhiṃ saṃsandanti samenti,||
pharusā-vācā pharusā-vācehi saddhiṃ saṃsandanti samenti,||
sampha-p-palāpino sampha-p-palāpīhi saddhiṃ saṃsandanti samenti,||
abhijjhāluno abhijjhālūhi saddhiṃ saṃsandanti samenti,||
vyāpanna-cittā vyāpanna-cittehi saddhiṃ saṃsandanti samenti,||
micchā-diṭṭhikā micchā-diṭṭhikehi saddhiṃ saṃsandanti samenti.|| ||
Pāṇ-ā-tipātā paṭiviratā pāṇ-ā-tipātā paṭiviratehi saddhiṃ saṃsandanti samenti,||
adinn'ādānā paṭiviratā adinn'ādānā paṭiviratehi saddhiṃ saṃsandanti samenti,||
kāmesu micchā-cārā paṭiviratā kāmesu micchā-cārā paṭiviratehi saddhiṃ saṃsandanti samenti,||
musā-vādā paṭiviratā musā-vādā paṭiviratehi saddhiṃ saṃsandanti samenti,||
pisuṇāya vācāya paṭiviratā pisuṇāya vācāya paṭiviratehi saddhiṃ saṃsandanti samenti,||
pharusāya vācāya paṭiviratā pharusāya vācāya paṭiviratehi saddhiṃ saṃsandanti samenti,||
sampha-p-palāpā paṭiviratā sampha-p-palāpā paṭiviratehi saddhiṃ saṃsandanti samenti,||
anabhijjhāluno anabhijjhālūhi saddhiṃ saṃsandanti samenti,||
avyāpanna-cittā avyāpanna-cittehi saddhiṃ saṃsandanti samenti,||
sammā-diṭṭhikā sammā-diṭṭhikehi saddhiṃ saṃsandanti samentī" ti.|| ||
