Saṁyutta Nikāya
II. Nidāna Vagga
14. Dhātu-Saṁyuttaṁ
IV. Catuttha Vagga

Sutta 31

Pubba Suttaṁ

 

---

[169]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. [170] "Pubbe me bhikkhave, sambodhā anabhi-sambuddhassa bodhisattass'eva sato etad ahosi:|| ||

3. 'Ko nu kho paṭhavi-dhātuyā assādo ko ādīnavo kiṁ nissaraṇaṁ?|| ||

Ko āpo-dhātuyā assādo ko ādīnavo kiṁ nissaraṇaṁ?|| ||

Ko tejo-dhātuyā assādo ko ādīnavo kiṁ nissaraṇaṁ?|| ||

Ko vāyo-dhātuyā assādo ko ādīnavo kiṁ nissaraṇan' ti?|| ||

4. Tassa mayhaṁ bhikkhave, etad ahosi:|| ||

5. Yaṁ kho paṭhavi-dhātuṁ paṭicca uppajjati sukhaṁ somanassaṁ,||
ayaṁ paṭhavi-dhātuyā assādo.|| ||

Yaṁ paṭhavi-dhātuyā aniccā dukkhā vipariṇāma-dhammā,||
ayaṁ paṭhavi-dhātuyā ādīnavo.|| ||

Yaṁ paṭhavi-dhātuyā chanda-rāga-vinayo chanda-rāga-p-pahāṇaṁ,||
idaṁ paṭhavi-dhātuyā nissaraṇaṁ.|| ||

6. Yaṁ āpo-dhātuṁ paṭicca uppajjati sukhaṁ somanassaṁ,||
ayaṁ āpo-dhātuyā assādo.|| ||

Yaṁ āpo-dhātu aniccā dukkhā vipariṇāma-dhammā,||
ayaṁ āpo-dhātuyā ādīnavo.|| ||

Yaṁ āpo-dhātuyā chanda-rāga-vinayo chanda-rāga-p-pahāṇaṁ,||
idaṁ āpo-dhātuyā nissaraṇaṁ.|| ||

7. Yaṁ tejo-dhātuṁ paṭicca uppajjati sukhaṁ somanassaṁ,||
ayaṁ tejo-dhātuyā assādo.|| ||

Yaṁ tejo-dhātu aniccā dukkhā vipariṇāma-dhammā,||
ayaṁ tejo-dhātuyā ādīnavo.|| ||

Yaṁ tejo-dhātuyā chanda-rāga-vinayo chanda-rāga-p-pahāṇaṁ,||
idaṁ tejo-dhātuyā nissaraṇaṁ.|| ||

8. Yaṁ vāyo-dhātuṁ paṭicca uppajjati sukhaṁ somanassaṁ,||
ayaṁ vāyo-dhātuyā assādo.|| ||

Yaṁ vāyo-dhātu aniccā dukkhā vipariṇāma-dhammā,||
ayaṁ vāyo-dhātuyā ādīnavo.|| ||

Yo vāyo-dhātuyā chanda-rāga-vinayo chanda-rāga-p-pahāṇaṁ,||
idaṁ vāyo-dhātuyā nissaraṇaṁ.|| ||

9. Yāva kīvañc'āhaṁ bhikkhave,||
imāsaṁ catunnaṁ dhātūnaṁ evaṁ assādañ ca||
assādato ādīnavañ ca||
ādīnavato nissaraṇañ ca||
nissaraṇato yathā-bhūtaṁ nābbhaññāsiṁ,||
n'eva tāvāhaṁ bhikkhave,||
sa-devake loke sa-Mārake sa-brahmake,||
sa-s-samaṇa-brāhmaṇiyā pajāya sadeva-manussāya anuttaraṁ sammā-sambodhiṁ abhisambuddhoti paccaññāsiṁ.|| ||

10. Yato cakkhv'āhaṁ bhikkhave,||
imāsaṁ catunnaṁ dhātūnaṁ evaṁ assādañ ca||
assādato ādīnavañ ca||
ādīnavato nissaraṇañ ca||
nissaraṇato yathā-bhūtaṁ abbhaññāsiṁ,||
ath'āhaṁ bhikkhave,||
sa-devake loke sa-Mārake sa-brahmake,||
sa-s-samaṇa-brāhmaṇiyā pajāya sadeva-manussāya anuttaraṁ sammā-sambodhiṁ abhisambuddhoti paccaññāsiṁ.|| ||

11. [171] Ñāṇañ ca pana me dassanaṁ udapādi:|| ||

'Akuppā me ceto-vimutti||
ayam antimā jāti||
n'atthi-dāni puna-b-bhavo'" ti.|| ||