Abhinandana Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][olds] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Yo bhikkhave, paṭhavī-dhātuṁ abhinandati,||
dukkhaṁ so abhinandati.|| ||

Yo dukkhaṁ abhinandati,||
aparimutto so dukkhasmā vadāmi.|| ||

3. Yo āpo-dhātuṁ abhinandati,||
dukkhaṁ so abhinandati.|| ||

Yo dukkhaṁ abhinandati,||
aparimutto so dukkhasmāti vadāmi.|| ||

4. Yo tejo-dhātuṁ abhinandati,||
dukkhaṁ so abhinandati.|| ||

Yo dukkhaṁ abhinandati,||
aparimutto so dukkhasmāti vadāmi.|| ||

5. Yo vāyo-dhātuṁ abhinandati,||
dukkhaṁ so abhinandati.|| ||

Yo dukkhaṁ abhinandati,||
aparimutto so dukkhasmāti vadāmi.|| ||

6. [175] Yo ca kho bhikkhave, paṭhavī-dhātuṁ n'ābhinandati,||
dukkhaṁ so n'ābhinandati.|| ||

Yo dukkhaṁ n'ābhinandati,||
parimutto so dukkhasmāti vadāmi.|| ||

7. Yo āpo-dhātuṁ n'ābhinandati,||
dukkhaṁ so n'ābhinandati|| ||

Yo dukkhaṁ n'ābhinandati,||
parimutto so dukkhasmāti vadāmi.|| ||

8. Yo tejo-dhātuṁ n'ābhinandati,||
dukkhaṁ so n'ābhinandati.|| ||

Yo dukkhaṁ n'ābhinandati,||
parimutto so dukkhasmāti vadāmi.|| ||

9. Yo vāyo-dhātuṁ n'ābhinandati,||
dukkhaṁ so n'ābhinandati.|| ||

Yo dukkhaṁ n'ābhinandati,||
parimutto so dukkhasmāti vadāmī" ti.|| ||