Uppāda Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

2. "Yo bhikkhave, paṭhavī-dhātuyā uppādo ṭhiti abhinibbatti pātu-bhāvo,||
dukkhasseso uppādo,||
rogānaṁ ṭhīti,||
jarā-maraṇassa pātu-bhāvo.|| ||

3. Yo āpo-dhātuyā uppādo ṭhiti abhinibbatti pātu-bhāvo,||
dukkhasseso uppādo,||
rogānaṁ ṭhiti,||
jarā-maraṇassa pātu-bhāvo.|| ||

4. Yo tejo-dhātuyā uppādo ṭhiti abhinibbatti pātu-bhāvo,||
dukkhasseso uppādo,||
rogānaṁ ṭhiti,||
jarā-maraṇassa pātu-bhāvo.|| ||

5. Yo vāyo-dhātuyā uppādo ṭhiti abhinibbatti pātu-bhāvo,||
dukkhasseso uppādo,||
rogānaṁ ṭhiti,||
jarā-maraṇassa pātu-bhāvo.|| ||

6. Yo ca kho bhikkhave, paṭhavī-dhātuyā nirodho vūpasamo atthaṅgamo||
dukkhasseso nirodho,||
rogānaṁ vūpasamo,||
jarā-maraṇassa atthaṅgamo.|| ||

7. Yo āpo-dhātuyā nirodho vūpasamo atthaṅgamo,||
dukkhasseso nirodho,||
rogānaṁ vūpasamo,||
jarā-maraṇassa atthaṅgamo.|| ||

8. Yo tejo-dhātuyā nirodho vūpasamo atthaṅgamo,||
dukkhasseso nirodho,||
rogānaṁ vūpasamo,||
jarā-maraṇassa atthaṅgamo.|| ||

9. Yo vāyo-dhātuyā nirodho vūpasamo atthaṅgamo,||
dukkhasseso nirodho,||
rogānaṁ vūpasamo,||
jarā-maraṇassa atthaṅgamo" ti.|| ||