Saṁyutta Nikāya
II. Nidāna Vagga
15. Anamat'agga-Saṁyuttaṁ
I. Paṭhama Vagga

Sutta 10

Eka-Puggala Suttaṁ

 

---

[185]

[1][pts][than] Evam me sutaṁ|| ||

Ekaṁ samayaṁ Bhagavā Rājagahe viharati Gijjhakūṭe pabbate.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

Bhagavā etad avoca:|| ||

"Anamat'aggoyaṁ bhikkhave, saṁsāro.|| ||

Pubbā koṭi na paññāyati avijjā-nīvaraṇānaṁ sattāṇaṁ taṇhā-saṁyojanānaṁ sandhāvataṁ saṁsarataṁ.|| ||

Ekapuggalassa bhikkhave, kappaṁ sandhāvato saṁsarato siyā evaṁ mahāatthikaṅkhalo aṭṭhipuñjo aṭṭhirāsi yathāyaṁ vepullo pabbato,||
sace saṁhārako assa,||
sambhatañ ca na vinasseyya.|| ||

Taṁ kissa hetu?|| ||

Anamat'aggoyaṁ bhikkhave, saṁsāro.|| ||

Pubbā koṭi na paññāyati avijjā-nīvaraṇānaṁ sattāṇaṁ taṇhā-saṁyojanānaṁ sandhāvataṁ saṁsarataṁ.|| ||

Evaṁ dīgha-rattaṁ vo bhikkhave,||
dukkhaṁ paccanubhūtaṁ tibbaṁ paccanubhūtaṁ,||
vyasanaṁ paccanubhūtaṁ,||
kaṭasi vaṇḍhitā.|| ||

Yāvañ c'idaṁ bhikkhave,||
alam eva sabba saṅkhāresu nibbindituṁ,||
alaṁ virajjituṁ,||
alaṁ vimuccitun" ti.|| ||

Idam avoca Bhagavā.|| ||

Idaṁ vatvā Sugato athāparaṁ etad avoca Satthā:|| ||

Ekassekena kappena||
puggalassaṭṭhisañcayo,||
Siyā pabbatasamo rāsi||
iti vuttaṁ mahesinā|| ||

So kho panāyaṁ akkhāto||
Vepullo pabbato mahā,||
Uttaro Gijjhakūṭassa||
Magadhānaṁ Giribbaje.|| ||

Yato ariya-saccāni||
samma-p-paññāya passati:||
Dukkhaṁ dukkhasamuppādaṁ||
dukkhassaca ati-k-kamaṁ,|| ||

Ariyañ caṭṭh'aṅgikaṁ Maggaṁ||
dukkh'ūpasama-gāminaṁ||
sasattakkhattu paramaṁ||
sandhāvitvāna puggalo,||
[186] dukkhass-antakaro hoti||
sabba-saṁyojana-k-khayā" ti.|| ||