Saṃyutta Nikāya
II. Nidāna Vagga
16. Kassapa Saṃyutta
Sutta 3
Cand'Ūpama Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][bit][pts][bodh] Ekaṃ samayaṃ Sāvatthiyaṃ -|| ||
Cand'ūpamā bhikkhave,||
kulāni upasaṇkamatha apakasseva [198] kāyaṃ,||
apakassacittaṃ,||
niccanavakā kulesu appagabbhā.|| ||
Seyyathā pi bhikkhave,||
puriso charūdapānaṃ vā olokeyya pabbata-visamaṃ vā nadī-viduggaṃ vā apakasseva kāyaṃ,||
apakassacittaṃ,||
evam eva kho,||
bhikkhave,||
cand'ūpamā kulāni upasaṇkamatha apakasseva kāyaṃ apakassacittaṃ,||
niccanavakā kulesu appagabbhā.|| ||
Kassapo bhikkhave,||
candūpamo kulāni upasaṇkamati apakasseva kāyaṃ apakassacittaṃ,||
niccanavako kulesu appagabbho.|| ||
Taṃ kim maññatha bhikkhave?|| ||
Kathaṃ-rūpo bhikkhu arahati kulāni upasaṇkamitun" ti?|| ||
"Bhagava mūlakā no bhante dhammā,||
Bhagavannettikā,||
Bhagavam-paṭisaraṇā.|| ||
Sādhu vata bhante,||
Bhagavantaṃ yeva paṭibhātu etassa bhāsitassa attho.|| ||
Bhagavato sutvā bhikkhu dhāressantī" ti.|| ||
Atha kho Bhagavā ākāse pāṇiṃ cālesi.|| ||
"Seyyathā pi bhikkhave,||
ayaṃ ākāse pāṇi na sajjati,||
na gayhati||
na bajjhati.|| ||
Evam eva kho bhikkhave,||
yassa kassaci bhikkhuno kulāni upasaṇkamato kulesu cittaṃ na sajjati,||
na gayhati||
na bajjhati,||
"labhantu lābha-kāmā,||
puññakāmā karontu pana puññānī" ti.|| ||
Yathā sakena lābhena atta-mano hoti sumano,||
evaṃ paresaṃ lābhena atta-mano hoti sumano.|| ||
Eva-rūpo kho bhikkhave,||
bhikkhu arahati kulāni upasaṇkamituṃ.|| ||
Kassapassa bhikkhave,||
kulāni upasaṇkamato kulesu cittaṃ na sajjati,||
na gayhati,||
na bajjhati||
"labhantu lābha-kāmā,||
puññakāmā karontu pana puññānī" ti.|| ||
Yathā sakena lābhena atta-mano hoti sumano,||
evaṃ paresaṃ lābhena atta-mano hoti sumano.|| ||
Eva-rūpo kho bhikkhave,||
bhikkhū arahati kulāni upasaṇkamituṃ.|| ||
§
[199] Taṃ kiṃ maññatha bhikkhave?|| ||
Kathaṃ-rūpassa bhikkhuno a-parisuddhā Dhamma-desanā hoti,||
kathaṃ-rūpassa bhikkhuno parisuddhā Dhamma-desanā hotī" ti?|| ||
"Bhagava mūlakā no bhante,||
dhammā,||
Bhagavannettikā Bhagavam-paṭisaraṇā.|| ||
Sādhu vata bhante,||
Bhagavantaṃ yeva paṭibhātu etassa bhāsitassa attho Bhagavato sutvā bhikkhū dhāressantī" ti.|| ||
"Tena hi bhikkhave suṇātha,||
sādhukaṃ manasi-karotha bhāsissāmī" ti.|| ||
"Evaṃ bhante" ti kho te bhikkhū Bhagavato paccassosuṃ.|| ||
Bhagavā etad avoca:|| ||
"Yo hi koci bhikkhave,||
bhikkhū evañcitto paresaṃ Dhammaṃ deseti:|| ||
'Aho vata me Dhammaṃ suṇeyyuṃ,||
sutvā ca pana Dhammaṃ pasīdeyyuṃ,||
pasannā ca pana me pasannākāraṃ kareyyun' ti.|| ||
Eva-rūpassa kho bhikkhave,||
bhikkhuno a-parisuddhā Dhamma-desanā hoti.|| ||
Yo ca kho bhikkhave,||
bhikkhū evañcitto paresaṃ Dhammaṃ deseti:|| ||
'Svākkhāto Bhagavatā dhammo sandiṭṭhiko akāliko ehi passiko opanayiko paccattaṃ veditabbo viññūhī' ti.|| ||
Aho vata me Dhammaṃ suṇeyyuṃ,||
sutvā ca pana Dhammaṃ ājāneyyuṃ,||
ājānitvā ca pana tathattāya paṭipajjeyyun" ti.|| ||
Iti Dhamma-sudhammataṃ paṭicca paresaṃ Dhammaṃ deseti.|| ||
Kāruññaṃ paṭicca paresaṃ Dhammaṃ deseti.|| ||
Anuddayaṃ paṭicca paresaṃ Dhammaṃ deseti.|| ||
Anukampaṃ upādāya paresaṃ Dhammaṃ deseti.|| ||
Eva-rūpassa kho bhikkhave,||
bhikkhuno parisuddhā Dhamma-desanā hoti.|| ||
Kassapo bhikkhave,||
evaṃ-citto paresaṃ Dhammaṃ deseti:||
"svākkhāto Bhagavatā dhammo sandiṭṭhiko akāliko ehi passiko opanayiko paccattaṃ veditabbo viññūhī'ti.|| ||
Aho vata [200] me Dhammaṃ suṇeyyuṃ,||
sutvā ca pana Dhammaṃ ājāneyyuṃ,||
ājānitvā ca pana tathattāya paṭipajjeyyun" ti.|| ||
Iti Dhamma-sudhammataṃ paṭicca paresaṃ Dhammaṃ deseti.|| ||
Kāruññaṃ paṭicca paresaṃ Dhammaṃ deseti.|| ||
Anuddayaṃ paṭicca paresaṃ Dhammaṃ deseti.|| ||
Anukampaṃ upādāya paresaṃ Dhammaṃ deseti.|| ||
Kassapena vā hi vo bhikkhave,||
ovadissāmi,||
yo vā panassa Kassapasadiso.|| ||
Ovaditehi ca pana vo tathattāya paṭipajjitabban" ti.|| ||
