Saṁyutta Nikāya
II. Nidāna Vagga
20. Opamma Saṁuttaṁ

Sutta 9

Nāga Suttaṁ

 

---

[268]

[1][rhyc] EVAṀ ME SUTAṀ:|| ||

Ekaṁ samayaṁ Bhagavā Sāvatthiyaṁ viharati.||
Jetavane Anāthapiṇḍikassa ārāme.|| ||

[2] Tena kho pana samayena aññataro navo bhikkhu ati-velaṁ kulāni upasaṅkamati,||
tam enaṁ bhikkhū evam āhaṁsu:|| ||

"Mā āyasmā ati-velaṁ kulāni upasaṅkamī" ti.|| ||

[3] So bhikkhūhi vuccamāno evam āha:|| ||

"Ime hi nāma therā bhikkhū kulāni upasaṅkamitabbaṁ maññissanti,||
kim aṅgaṁ panāhan" ti.|| ||

[4] Atha kho sambahulā bhikkhū yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ nisīdiṁsu.|| ||

[269] [5] Eka-m-antaṁ nisinnā kho te bhikkhū Bhagavantaṁ etad avocuṁ:|| ||

"Idha bhante aññataro navo bhikkhu ati-velaṁ kulāni upasaṅkamati||
tam enaṁ bhikkhū evam āhaṁsu:|| ||

'Mā āyasmā evaṁ ati-velaṁ kulāni upasaṅkamī' ti.|| ||

So bhikkhū bhikkhūhi vuccamāno evam āha:|| ||

'Ime hi nāma therā bhikkhū kulāni upasaṅkamitabbaṁ maññissanti,||
kim aṅgaṁ panāhan' ti" ti.|| ||

[6] "Bhūta-pubbaṁ bhikkhave,||
araññāyatane mahāsarasi,||
taṁ nāgā upanissāya viharanti,||
te taṁ sarasiṁ ogāhetvā soṇḍāya bhisamūlālaṁ abbhuggahetvā suvikkhālitaṁ vikkhāletvā akaddamaṁ saṅkhāritvā ajjhoharanti.|| ||

Tesaṇ taṁ vaṇṇāya c'eva hoti balāya ca,||
na ca tatonidānaṁ maraṇaṁ vā nigacchanti,||
maraṇa-mattaṁ vā dukkhaṁ.|| ||

[7] Tesaṁ yeva kho pana bhikkhave,||
mahā-nāgānaṁ anusikkhamānā taruṇā bhiṅkacchāpā,||
taṁ sarasiṁ ogāhetvā soṇḍāya bhisamūlālaṁ abbhuggahetvā na suvikkhālitaṁ vikkhāletvā sakaddamaṁ saṅkh-ā-ditvā ajjhoharanti.|| ||

Tesaṇ taṁ n'eva vaṇṇāya c'eva hoti na balāya,||
tato nidānaṁ maraṇaṁ vā nigacchanti,||
maraṇa-mattaṁ vā dukkhaṁ.|| ||

[8] Evam eva kho bhikkhave,||
idha therā bhikkhū pubbaṇha-samayaṁ nivāsetvā patta-cīvaram ādāya gāmaṁ vā nigamaṁ vā piṇḍāya pavisanti.|| ||

Te tattha dhammaṁ bhāsanti||
tesaṇ gihī pasannā karaṁ karonti,||
te taṁ lābhaṁ agadhitā amucchitā anajjhopanna,||
ādīnavadassāvino nissaraṇa-paññā paribhuñjanti.|| ||

Tesaṇ taṁ vaṇṇāya c'eva hoti balāya ca,||
na ca tatonidānaṁ maraṇaṁ vā nigacchantali,||
maraṇa-mattaṁ vā dukkhaṁ.|| ||

[9] Tesaṁ yeva kho pana bhikkhave,||
therānaṁ bhikkhūnaṁ anusikkhamānā navā bhikkhū pubbaṇha-samayaṁ nivāsetvā patta-cīvaram ādāya gāmaṁ vā nigamaṁ vā piṇḍāya pavisanti.|| ||

[10] Te tattha dhammaṁ bhāsanti,||
tesaṇ gihī pasannā [270] kāraṁ karonti,||
te taṁ lābhaṁ gadhitā mucchitā ajjhopannā anādīnavadassāvino anissaraṇa-paññā paribhuñjanti.|| ||

Tesaṇ taṁ n'eva vaṇṇāya hoti na balāya,||
te tatonidānaṁ maraṇaṁ vā nigacchanti,||
maraṇa-mattaṁ vā dukkhaṁ.|| ||

[11] Tasmātiha bhikkhave,||
evaṁ sikkhitabbaṁ:|| ||

'Agathitā amucchitā anajjhopannā ādīnavadassāvino nissaraṇa-paññā lābhaṁ paribhuñjissāmā' ti.|| ||

Evaṁ hi vo bhikkhave, sikkhitabban" ti.|| ||