Saṁyutta Nikāya
II. Nidāna Vagga
20. Opamma Saṁuttaṁ

Sutta 11

Paṭhama Singālaka Suttaṁ

 

---

[271]

[1][rhyc] EVAṀ ME SUTAṀ:|| ||

Ekaṁ samayaṁ Bhagavā Sāvatthiyaṁ viharati.||
Jetavane Anāthapiṇḍikassa ārāme.|| ||

[2] "Assuttha no tumhe bhikkhave,||
rattiyā paccūsa-samayaṁ sigālassa vassamānassā" ti?|| ||

"Evaṁ bhante" ti.|| ||

[3] "Eso kho bhikkhave,||
jara-singālo ukkaṇṇakena nāma rogajātena phuṭṭho.|| ||

So yena yena icchati,||
tena tena gacchati.|| ||

Yattha yattha icchati,||
tattha tattha tiṭṭhati.|| ||

Yattha yattha icchati,||
tattha tattha nisīdati.|| ||

Yattha yattha [272] icchati,||
tattha tattha nipajjati.|| ||

Sītako pi naṁ vāto upavāyati.|| ||

[4] Sādhu khvassa bhikkhave,||
yaṁ idh'ekacco Sakya-puttiya-paṭiñño eva-rūpam pi atta-bhāva-paṭilābhaṁ paṭisaṁvedayetha.|| ||

[5] Tasmātiha bhikkhave,||
evaṁ sikkhitabbaṁ:|| ||

'Appamattā viharissāmā' ti.|| ||

[6] Evaṁ hi vo bhikkhave, sikkhitabban" ti.|| ||