Saṁyutta Nikāya
II. Nidāna Vagga
21. Bhikkhu Saṁyutta

Sutta 3

Ghaṭo or Mahā-Nāga Suttaṁ

 

---

[275]

[1][rhyc][bodh][than] EVAṀ ME SUTAṀ:|| ||

Ekaṁ samayaṁ Bhagavā Sāvatthiyaṁ viharati.||
Jetavane Anāthapiṇḍikassa ārāme.|| ||

[2][rhyc] Tena kho pana samayen'āyasmā ca Sāriputto āyasmā ca Mahā-Moggallāno Rājagahe viharanti Veḷuvane Kalandakanivāpe eka-vihāre.|| ||

[3][rhyc] Atha kho āyasmā Sāriputto sāyaṇha-samayaṁ paṭisallāṇā vuṭṭhito yen'āyasmā Mahā-Moggallāno ten'upasaṅkami.|| ||

Upasaṅkamitvā āyasmatā Mahā-Moggallānena saddhiṁ sammodi.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdi.|| ||

[4][rhyc] Eka-m-antaṁ nisinno kho āyasmā Sāriputto āyasmantaṁ Mahā-Moggallānaṁ etad avoca:|| ||

"Vi-p-pasannāni kho te āvuso Moggallāna, indriyāni.|| ||

Parisuddho mukha-vaṇṇo pariyodāto,||
santena nūnāyasmā Mahā-Moggallāno ajja vihārena vihāsī" ti.|| ||

"Oḷārikena khv'āhaṁ āvuso,||
ajja vihārena vihāsiṁ.|| ||

Api ca me ahosi dhammī kathā" ti.|| ||

[5][rhyc] "Kena saddhiṁ pan'āyasmato Mahā-Moggallānassa ahosi dhammī kathā" ti?|| ||

"Bhagavatā kho me āvuso, saddhiṁ ahosi dhammī kathā" ti.|| ||

[6][rhyc] "Dūre kho āvuso, Bhagavā etarahi Sāvatthiyaṁ viharati Jetavane Anāthapiṇḍikassa ārāme.|| ||

Kiṁ nu kho āyasmā Mahā-Moggallāno Bhagavantaṁ iddhiyā upasaṅkami,||
udāhu Bhagavā āyasmantaṁ Mahā-Moggallānaṁ iddhiyā upasaṅkamī" ti?|| ||

[276] [7][rhyc] "Na khv'āhaṁ āvuso, Bhagavantaṁ iddhiyā upasaṅkamiṁ||
na pi maṁ Bhagavā iddhiyā upasaṅkami.|| ||

Api ca me yāvatā Bhagavā ettāvatā dibba-cakkhu visujjhi dibbā ca sota-dhātu.|| ||

Bhagavato pi yāvatāhaṁ ettāvatā dibba-cakkhu visujjhi dibbā ca sotadhātū" ti.|| ||

[8][rhyc] "Yathā kathaṁ pan'āyasmato Mahā-Moggallānassa Bhagavatā saddhiṁ ahosi dhammīkathā" ti?|| ||

[9][rhyc] "Idh'āhaṁ āvuso, Bhagavantaṁ etad avocaṁ:|| ||

'Āraddha-viriyo, āraddha-viriyo' ti bhante, vuccati.|| ||

Kittāvatā nu kho bhante, āraddha-viriyo hotī' ti?|| ||

[10][rhyc] Evaṁ vutte āvuso maṁ, Bhagavā etad avoca:|| ||

'Idha Moggallāna bhikkhu āraddha-viriyo viharati:|| ||

"Kāmaṁ taco ca nahārū ca aṭṭhī ca avasissatu||
sarīre, upasussatu maṁsa-lohitaṁ.||
Yaṁ taṁ purisa-thāmena purisa-viriyena purisa-parakkamena pattabbaṁ,||
na taṁ apāpuṇitvā viriyassa saṇṭhānaṁ bhavissatī" ti.|| ||

Evaṁ kho Moggallāna, āraddha-viriyo hotī' ti.|| ||

[11][rhyc] Evaṁ kho me āvuso, Bhagavatā saddhiṁ ahosi dhammīkathā" ti.|| ||

[12][rhyc] "Seyyathā pi āvuso, Himavato pabba-tarājassa parittā pāsāṇa-sakkharā yāva-d-eva upanikkhepanamattāya.|| ||

Evam eva kho mayaṁ āyasmato Mahā-Moggallānassa yāva-d-eva upanikkhepanamattāya.|| ||

Āyasmā hi Mahā-Moggallāno mahiddhiko mah-ā-nubhāvo,||
ākaṅkha-māno kappaṁ tiṭṭheyyā" ti.|| ||

[13][rhyc] "Seyyathā pi āvuso,||
mahatiyā loṇaghaṭāya parittā loṇasakkharā yāva-d-eva upanikkhepanamattāya.|| ||

Evam eva mayaṁ āyasmato Sāriputtassa yāva-d-eva upanikkhepanamattāya.|| ||

[277] [14][rhyc] Āyasmā hi Sāriputto Bhagavatā aneka-pariyāyena thomito vaṇṇito pasattho:|| ||

'Sāriputto va paññāya||
sīlena upasamena ca,||
So pi pāraṅgato bhikkhu||
eso paramo siyā'" ti.|| ||

[15][rhyc] Iti hete ubho mahā-nāgā aññamaññaṁ su-bhāsitaṁ subhāsitaṁ sulapitaṁ samanumodiṁsūti.|| ||